قازاقستاندا ازاماتتاردىڭ دەرەكتەرى مەن اقشاسىن ۇرلاعان قىلمىستىق توپ اشكەرەلەندى. ولار SMS-بلاستەر ارقىلى جالعان حابارلامالاردى جاپپاي تاراتقان.

قارجىلىق مونيتورينگ اگەنتتىگىنىڭ مالىمەتىنشە، ارنايى وپەراتسيا قازاقستان رەسپۋبليكاسىنىڭ باس پروكۋراتۋراسىنىڭ ۇيلەستىرۋىمەن جانە «TELE2» ۇيالى بايلانىس وپەراتورىنىڭ كيبەرقاۋىپسىزدىك ماماندارىنىڭ قاتىسۋىمەن جۇرگىزىلگەن. ايتا كەتەرلىگى، تمد اۋماعىندا مۇنداي الاياقتىق سحەمانىڭ جولى العاش رەت توقتاتىلىپ وتىر.

تەرگەۋ بارىسىندا كۇدىكتىلەردىڭ SMS-بلاستەر دەپ اتالاتىن ارنايى قۇرىلعىنى پايدالانعانى انىقتالعان. بۇل قۇرىلعى ۇيالى بايلانىس وپەراتورلارىنىڭ بازالىق ستانتسيالارىن يميتاتسيالاپ، 300 مەتر راديۋستا قۋاتتى سيگنال تاراتادى. سونىڭ ناتيجەسىندە پايدالانۋشىلاردىڭ تەلەفوندارى اۆتوماتتى تۇردە جالعان ءارى قورعانىسى ءالسىز جەلىگە قوسىلىپ وتىرعان، - دەپ حابارلادى ۆەدومستۆو.

وسى ءتاسىل ارقىلى ابونەنتتەردىڭ تەلەفوندارىنا جاپپاي جالعان SMS-حابارلامالار جىبەرىلگەن. قۇرىلعى ساعاتىنا 100 مىڭعا دەيىن حابارلاما تاراتا الادى جانە بايلانىس وپەراتورلارىنىڭ قورعانىس جۇيەلەرىن اينالىپ وتەدى.

قىلمىستىق توپ ءوز ارەكەتىن جاسىرۋ جانە اۋقىمىن كەڭەيتۋ ءۇشىن جابدىقتى اۆتوكولىكتەرگە ورناتىپ، قوزعالىس كەزىندە پايدالانعان. اسىرەسە ادامدار كوپ جينالاتىن ورىندار – بازارلار مەن ساۋدا-ويىن-ساۋىق ورتالىقتارىنىڭ ماڭى تاڭدالعان.

الاياقتار حابارلامالاردى «Beeline» جانە «Halyk Bank» اتىنان جىبەرىلگەندەي ەتىپ كورسەتكەن. وندا بونۋستاردى ايىرباستاۋ ۇسىنىلىپ، ارنايى سىلتەمەگە ءوتۋ سۇرالعان. سىلتەمەگە وتكەن ازاماتتار فيشينگتىك سايتتارعا ءتۇسىپ، جەكە دەرەكتەرىن – اتى-ءجونى، تەلەفون ءنومىرى، بانك كارتاسىنىڭ دەرەكتەمەلەرى، CVV-كود جانە SMS ارقىلى كەلگەن راستاۋ كودتارىن ەنگىزگەن، - دەلىنگەن قما حابارلاماسىندا.

وسىنىڭ ناتيجەسىندە كۇدىكتىلەر ازاماتتاردىڭ قۇپيا اقپاراتى مەن قارجىسىن يەمدەنگەن.

جەدەل-ىزدەستىرۋ ءىس-شارالارى بارىسىندا قىلمىستىق توپ سحەمانى جۇزەگە اسىرۋدىڭ باستاپقى كەزەڭىندە اشكەرەلەنىپ، ۇستالدى. بۇل كوپتەگەن ازاماتتاردىڭ الدانۋى مەن ءىرى قارجىلىق شىعىنداردىڭ الدىن الۋعا مۇمكىندىك بەرگەن.

قازىرگى ۋاقىتتا ءتورت كۇدىكتى قاماۋعا الىندى. تەرگەۋ جالعاسىپ جاتىر.

Abai.kz