پرەمەر-مينيستر مەملەكەت باسشىسىنىڭ ۇلتتىق قۇرىلتايدىڭ V وتىرىسىندا العا قويعان مىندەتتەرى اياسىندا «دەرەكتەردى وڭدەۋ ورتالىقتارىنىڭ القابى» جوباسىنىڭ قازىرگى جاعدايى جونىندە كەڭەس وتكىزدى. 

جيىندا اتقارىلىپ جاتقان جۇمىستار تۋرالى  پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ، ەنەرگەتيكا ءمينيسترى ەرلان اقكەنجەنوۆ، پاۆلودار وبلىسىنىڭ اكىمى اسايىن بايحانوۆ، «قازاقتەلەكوم» اق باسقارما توراعاسى باعدات مۋسين باياندادى.

پاۆلودار وبلىسىنىڭ ەكىباستۇز قالاسىندا «دەرەكتەردى وڭدەۋ ورتالىقتارى القابى» جوباسىن جۇزەگە اسىرۋ شەڭبەرىندە جەر ۋچاسكەلەرى ايقىندالىپ، نەگىزگى كەلىسىمدەر جاسالدى، سونداي-اق قۋاتى 215 مۆت بولاتىن قوسالقى ستانسا ساتىپ الىندى. اتالعان شارالار جوبانىڭ ەنەرگەتيكالىق ينفراقۇرىلىمىنىڭ نەگىزىن قالىپتاستىرادى.

كەڭەس بارىسىندا ينۆەستورلار ءۇشىن ودان ءارى قاجەتتى جاعداي قالىپتاستىرۋ اياسىندا ەنەرگيامەن جابدىقتاۋدىڭ جەڭىلدەتىلگەن تاريفتىك مودەلى بەكىتىلىپ، ءتيىستى ينۆەستيتسيالىق جانە سالىقتىق پرەفەرەنتسيالار بەلگىلەندى.

باعدات مۋسين حالىقارالىق تەحنولوگيالىق جانە ينۆەستيتسيالىق كومپانيالاردى تارتۋ باعىتىندا جۇمىستار جۇرگىزىلىپ جاتقانىن باياندادى. اقش، قىتاي جانە ءۇندىستان ەلدەرىنەن «بۇلتتى» ەسەپتەۋ، ۇلكەن دەرەكتەردى وڭدەۋ جانە جي سالالارىندا جۇمىس ىستەيتىن 20-دان استام hyperscale-كومپانيالارمەن كەلىسسوزدەر جۇرگىزىلدى.

كەلىسسوزدەر قورىتىندىسى بويىنشا 100 مۆت-تان جوعارى قۋاتقا الدىن الا سۇرانىس قالىپتاستىرىلدى. سونىمەن قاتار «دەرەكتەردى وڭدەۋ ورتالىقتارى القابى» جوباسىنىڭ جالپى الەۋەتى 1 گۆت-قا دەيىن جەتەدى جانە ءىرى «زاكىرلىك» كليەنتتەردى ورنالاستىرۋعا ەسەپتەلگەن.

جالپى العاندا، «ءدوو القابى» جوباسىن جۇزەگە اسىرۋ قازاقستاندا ءىرى وڭىرلىك تسيفرلىق حابتى قالىپتاستىرۋعا جانە الەمدىك جەتەكشى تەحنولوگيالىق كومپانيالاردى تارتۋعا باعىتتالعان.

پرەمەر-مينيستر قاجەتتى نورماتيۆتىك شەشىمدەر قابىلداۋدى جەدەلدەتۋدى جانە جوبانىڭ بارلىق كەزەڭىنىڭ بەلگىلەنگەن مەرزىمدە ورىندالۋىن قامتاماسىز ەتۋدى تاپسىردى.

Abai.kz