قازاقستاننىڭ جازبا مۇراسى – ۇلتتىق تاريحي جانە مادەني مۇرانىڭ اجىراماس بولىگى. عاسىرلار بويى تاريح، ءدىن، فيلوسوفيا، ادەبيەت، قۇقىق، عىلىم جانە قوعامدىق ومىرگە قاتىستى مول ءبىلىم قورى قولجازبالار مەن سيرەك جازبا ەسكەرتكىشتەرى ارقىلى ساقتالىپ كەلدى. بۇل دەرەككوزدەر قازاق دالاسىن ورتالىق ازيا، شىعىس ازيا جانە يسلام الەمىنىڭ كەڭ عىلىمي جەلىلەرىمەن بايلانىستىرعان زياتكەرلىك ۇدەرىس پەن مادەني اۋىس-كۇيىستى كورسەتەدى، سونداي-اق ايماقتىڭ وركەنيەتتەر مەن يدەيالاردىڭ ماڭىزدى توعىسقان ورنى بولعانىن ايقىندايدى.

سوڭعى جىلدارى تسيفرلىق تەحنولوگيالار مەن تسيفرلىق گۋمانيتاريستيكا سالاسىنىڭ دامۋى قولجازبا مۇرانى ساقتاۋ، زەرتتەۋ جانە تاراتۋ ءۇشىن جاڭا مۇمكىندىكتەر اشتى. تسيفرلاندىرۋ تەحنولوگيالارى نازىك ءارى وسال ماتەريالداردى ۇزاق مەرزىمگە ساقتاۋعا ىقپال ەتىپ قانا قويماي، سيرەك دەرەككوزدەرگە قولجەتىمدىلىكتى ەداۋىر كەڭەيتەدى. تسيفرلىق ارحيۆتەر، دەرەكقورلار جانە زاماناۋي زەرتتەۋ قۇرالدارى ارقىلى الەمنىڭ ءار تۇكپىرىندەگى عالىمدار تاريحي ماتىندەردى كەڭىرەك سالىستىرمالى جانە پانارالىق ايادا زەرتتەپ، تالداۋعا مۇمكىندىك اشىلدى.

قولجازبا مۇرانى ساقتاۋ، زەرتتەۋ جانە تاراتۋ سالاسىنداعى قازىرگى جاعداي مەن جاڭا مۇمكىندىكتەردى ەسكەرە وتىرىپ، سونداي-اق قازاقستاننىڭ قۇجاتتىق مۇراسىنىڭ ەداۋىر بولىگى شاعاتاي، اراب، پارسى، وسمان, ەسكى قازاق جانە توتە جازۋ سياقتى شىعىس تىلدەرى مەن جازۋلارىندا ساقتالعانىن نازارعا الا وتىرىپ، قازاقستاننىڭ شىعىس تىلدەرىندەگى قولجازبا مۇرانىڭ ءتىزىلىمى مەن ەلەكتروندىق دەرەكقورىن قۇرۋعا باعىتتالعان عىلىمي باعدارلاما ىسكە اسىرىلۋدا. بۇل قولجازبالار مەن سيرەك كىتاپتار ءوڭىردىڭ تاريحي دامۋىن، سونداي-اق ونىڭ كورشىلەس وركەنيەتتەرمەن زياتكەرلىك، مادەني جانە ساياسي بايلانىستارىن ءتۇسىنۋ ءۇشىن اسا قۇندى.

وسى تۇرعىدا «قازاقستاننىڭ قولجازبا مۇراسى: ساقتاۋ، زەرتتەۋ جانە تسيفرلىق گۋمانيتاريستيكا» اتتى حالىقارالىق كونفەرەنتسيا قازاقستان مەن ورتالىق ازياعا قاتىستى قولجازبا قورلارىن زەرتتەۋ سالاسىنداعى قازىرگى عىلىمي ىزدەنىستەردى، ساقتاۋ ستراتەگيالارىن جانە يننوۆاتسيالىق تاسىلدەردى تالقىلاۋ ماقساتىندا عالىمداردى، ارحيۆيستەردى، كىتاپحاناشىلاردى، مۋزەي ماماندارىن جانە تسيفرلىق گۋمانيتاريستيكا سالاسىنىڭ زەرتتەۋشىلەرىن ءبىر الاڭعا جيناۋدى كوزدەيدى. كونفەرەنتسيا قولجازبا داستۇرلەرىن زەردەلەۋگە، كونسەرۆاتسيالاۋ مەن عىلىمي كاتالوگتاۋدىڭ وزىق تاجىريبەلەرىمەن الماسۋعا، سونداي-اق جازبا مۇرانى زەرتتەۋدىڭ جاڭا تسيفرلىق قۇرالدارى مەن ءادىسنامالارىن تالقىلاۋعا ارنالعان پانارالىق الاڭ بولادى.

ءارتۇرلى سالالار مەن وڭىرلەردەن كەلگەن مامانداردى بىرىكتىرە وتىرىپ، كونفەرەنتسيا قازاقستاننىڭ قولجازبا مۇراسىن جۇيەلى تۇردە زەرتتەۋگە، ساقتاۋعا جانە تسيفرلىق تۇرعىدان جاڭعىرتۋعا ۇلەس قوسادى. بۇل باستاما ەلىمىزدىڭ باي جازبا داستۇرلەرىن جاھاندىق عىلىمي جانە تسيفرلىق ءبىلىم كەڭىستىگىنە ەنگىزۋگە قولداۋ كورسەتىپ، قولجازبا قورلارىمەن جۇمىس ىستەيتىن مەكەمەلەر اراسىنداعى ىنتىماقتاستىقتى نىعايتادى.

كونفەرەنتسيا قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ  ۆر28712621 باعدارلامالىق-نىسانالى قارجىلاندىرۋ اياسىندا قولداۋ تابۋدا.

كونفەرەنتسيا تاقىرىپتارى

1. قولجازبا مۇرانى ساقتاۋ جانە ارحيۆ ءىسى تاجىريبەلەرى

2. كوديكولوگيا جانە قولجازباتانۋ

3. تسيفرلىق يننوۆاتسيالار جانە قولجازبا مۇراسى

فورماتى: كونفەرەنتسيا اياسىندا پلەنارلىق باياندامالار، پانەلدىك پىكىرتالاستار جانە عىلىمي باياندامالار ۇسىنىلادى. كونفەرەنتسيا گيبريدتى فورماتتا (ونلاين جانە وفلاين) وتكىزىلەدى.

جۇمىس تىلدەرى: قازاق، ورىس، اعىلشىن, تۇرىك.

ماتەريالداردى ۇسىنۋ ءتارتىبى: كولەمى 150-250 سوزدەن تۇراتىن اڭداتپا eri-project@ayu.edu.kz ەلەكتروندىق پوشتاسىنا جىبەرىلۋى ءتيىس.

قاتىسۋ شارتتارى: كونفەرەنتسياعا قاتىسۋ تەگىن. قاتىسۋشىلار جول ءجۇرۋ جانە ساپار شىعىندارىن وزدەرى قامتاماسىز ەتەدى.

ماڭىزدى كۇندەر:

اڭداتپانى جىبەرۋ مەرزىمى: 2026 جىلى 30 ءساۋىر

قابىلداۋ تۋرالى حابارلاما: 2026 جىلى 4 مامىر

كونفەرەنتسيا كۇندەرى: 2026 جىلى 2-3 ماۋسىم

ۇيىمداستىرۋشىلار

ق.ا. ياساۋي اتىنداعى حقتۋ ەۋرازيا عىلىمي-زەرتتەۋ ينستيتۋتى، قر عجبم عك «عىلىم ورداسى» شجق رمك، گارۆارد ۋنيۆەرسيتەتىنىڭ دەۆيس اتىنداعى رەسەي جانە ەۋرازيا زەرتتەۋلەرى ورتالىعى، استانا IT ۋنيۆەرسيتەتى، يسلام تاريحىن، ونەرىن جانە مادەنيەتىن زەرتتەۋ ورتالىعى (IRCICA) جانە تۇركيا رەسپۋبليكاسى قولجازبالار باسقارماسى.

قوسىمشا باعدارلاما

كونفەرەنتسيادان كەيىن 2026 جىلى 4-10 ماۋسىمدا قولجازباتانۋ جانە جازبا مۇرانى زەرتتەۋدەگى تسيفرلىق تاسىلدەرگە ارنالعان جازعى مەكتەپ ءوتەدى. جازعى مەكتەپ تۋرالى تولىق اقپاراتتى مىنا سىلتەمەدەن الۋعا بولادى:https://qolzhazba.com/SummerSchool

بايلانىس

سۇراقتار مەن ۇسىنىستار بويىنشا حابارلاسۋ ءۇشىن: o.hanayi@ayu.edu.kz نەمەسە  a.muratbekova@ayu.edu.kz.

Abai.kz