استانا قالاسىندا ەرمەك سەركەباەۆ اتىنداعى №3 بالالار مۋزىكا مەكتەبىنىڭ ۇيىمداستىرۋىمەن قازاقتىڭ ۇلى ءانشىسى، كسرو حالىق ءارتىسى ەرمەك سەركەباەۆتىڭ 100 جىلدىعىنا ارنالعان «ەستەن كەتپەس - ەستى اۋەن» اتتى ەسەپ بەرۋ كونتسەرتى وتكىزىلدى.

بۇل كەش جاي عانا كونتسەرت ەمەس، ۋاقىتپەن ۇندەسكەن، جۇرەكتى تەربەگەن، كورەرمەندى تاڭعالدىرعان بىرەگەي مۋزىكالىق ءىس-شارا بولدى.

ءىس-شارانىڭ باستى ماقساتى – ەرمەك سەركەباەۆتىڭ باي شىعارماشىلىق مۇراسىن جاڭعىرتۋ، جاس تالانتتاردى قولداۋ جانە ونەردەگى ۇرپاق ساباقتاستىعىن اسەرلى تۇردە كورسەتۋ بولدى.

كونتسەرت باعدارلاماسى ەرەكشە فورماتتا ءوتتى. كەش نۇرعيسا تىلەنديەۆتىڭ «جەكپە-جەك» كۇيىمەن اشىلىپ، ودان ءارى ۇلتتىق جانە الەمدىك كلاسسيكامەن، سونداي-اق سەركەباەۆ رەپەرتۋارىنداعى شوقتىعى بيىك تۋىندىلارمەن جالعاسىن تاپتى. كورەرمەن قاۋىم «تىڭدا»، «نادو منوي نەبو سينەە»، «مورە شۋميت» سىندى جۇرەككە جاقىن اندەردى جاڭا قىرىنان تاماشالادى.

كەشتىڭ ەڭ تولقىتار تۇستارىنىڭ ءبىرى - ەرمەك سەركەباەۆتىڭ ءوز داۋىسىمەن، سيمفونيالىق وركەستردىڭ جاندى سۇيەمەلدەۋىمەن ۇسىنىلعان ەرەكشە مۋزىكالىق نومەر بولدى. بۇل ارحيۆتىك مۇرا مەن زاماناۋي ساحنانىڭ توعىسقان ءساتى رەتىندە كورەرمەنگە ۇمىتىلماس اسەر سىيلادى.

سونداي-اق، كەش بارىسىندا ماەسترونىڭ ۇلى - بايعالي سەركەباەۆتىڭ ارنايى بەينەقۇتتىقتاۋى ۇسىنىلدى. بۇل - ۇلى ونەر يەسىنە دەگەن قۇرمەت پەن ۇرپاقتار ساباقتاستىعىنىڭ ايقىن كورىنىسى بولدى.

وسىنداي تاعىلىمى مول كەشتە ونەر مەن ءومىر ساباقتاستىعىن جالعاپ، اكە جولىن جالعاستىرعان قازاق مۋزىكا ونەرىنىڭ بەلگىلى وكىلى بايعالي ەرمەكۇلى سەركەباەۆقا ءسوز بەرىلىپ، ول LED ەكران ارقىلى جۇرەكجاردى جىلى لەبىزىن جولدادى. سونىمەن قاتار، بايعالي سەركەباەۆ پەن باتىرحان شۇكەنوۆ رەپەرتۋارىنداعى «دجۋليا» شىعارماسى مەكتەپتىڭ جاس گيتاراشىلار ءانسامبلىنىڭ سۇيەمەلدەۋىمەن كورەرمەنمەن بىرگە ورىندالىپ، ەرەكشە اسەر قالدىردى.

ەرمەك سەركەباەۆتىڭ سۇيىكتى اندەرىنىڭ ءبىرى - «جايدارمان» حالىق ءانى «كەربەز سۇلۋ» ۆوكالدىق ءانسامبلىنىڭ ورىنداۋىندا شىرقالدى. سونداي-اق، بوريس موكروۋسوۆتىڭ «مورە شۋميت» شىعارماسى ماەسترو رەپەرتۋارىنان «جىگىتتەر» حورىنىڭ ورىنداۋىندا كورەرمەنگە جول تارتتى.

مەكتەبىمىزدىڭ 0 جانە 1 سىنىپ وقۋشىلارىنان جاڭادان قۇرالعان «اتامۇرا» جەتىگەنشىلەر توبى العاش رەت ساحناعا شىعىپ، «كەڭەس كۇيىن» ورىنداپ، كوپشىلىكتىڭ ىستىق ىقىلاسىنا بولەندى. ال ەرمەك سەركەباەۆ رەپەرتۋارىنداعى «ياپىراي» ءانى «ياپىراي» پەداگوگتەر مەن وقۋشىلار ءانسامبلىنىڭ ورىنداۋىندا ۇسىنىلىپ، جەكە پارتيادا ۆيولونچەلدە شامشەت ايمبەتوۆ ەرەكشە شەبەرلىك تانىتتى.

انتونيو ۆيۆالدي مۋزىكاسىنا نەگىزدەلگەن، وكسانا كرۋت وڭدەۋىندەگى «پوپپۋري ۆيۆالدي» شىعارماسىن فورتەپيانو سىنىبى پەداگوگتەرىنەن قۇرالعان كۆارتەت جوعارى دەڭگەيدە ورىندادى. كەلەسى كەزەكتە ۇستازدار ءانسامبلىنىڭ سۇيەمەلدەۋىمەن تۇرماعامبەت ىزتىلەۋۇلىنىڭ «ءتالىم» تەرمەسى شىرقالىپ، ونى جەكە داۋىستا نۇربالا وكتيابروۆا اسەرلى جەتكىزدى.

قازاق مۋزىكا ونەرىنىڭ كورنەكتى تۇلعاسى احمەت جۇبانوۆتىڭ «اق كوگەرشىن» شىعارماسىن ۇستازدار وركەسترىنىڭ سۇيەمەلدەۋىمەن «اينالايىن» بالالار حورى ورىنداپ، كەش كوركىن ودان ءارى اشا ءتۇستى.

كەشتىڭ قۇرمەتتى قوناقتارى قاتارىندا «تالاپ» كوممەرتسيالىق ەمەس اكتسيونەرلىك قوعامى پرەزيدەنتىنىڭ كەڭەسشىسى، استانا قالاسىنىڭ بالا قۇقىقتارى جونىندەگى ۋاكىلى، استانا قالاسىنىڭ قۇرمەتتى ازاماتى، ءبىلىم بەرۋ ءىسىنىڭ قۇرمەتتى قايراتكەرى بيمەندينا ءاسيما تەمكەقىزى جانە كەڭەستىك ءارى قازاقستاندىق سكريپكاشى، پروفەسسور، قازاقستاننىڭ ەڭبەك ەرى، قازاق كسر-ءىنىڭ حالىق ءارتىسى ايمان قوجابەكقىزى مۋساحودجاەۆا بولىپ، وزدەرىنىڭ جۇرەكجاردى تىلەكتەرىن ءبىلدىردى. بۇل - مەكتەپ ۇجىمى ءۇشىن ۇلكەن مارتەبە بولدى.

اتالعان كەشتىڭ نەگىزگى بولىگىندە مەكتەپتىڭ وقۋشىلارى مەن ۇستازدارى ونەر كورسەتىپ، ءوز شەبەرلىكتەرىن جوعارى دەڭگەيدە پاش ەتتى. ولار ۇسىنعان ءاربىر مۋزىكالىق ءنومىر كورەرمەننىڭ ىستىق ىقىلاسىنا بولەنىپ، كەش ەرەكشە اسەر مەن جارقىن ەموتسياعا تولى بولدى.

ساحنادا «اينالايىن» بالالار حورىنىڭ جاڭا قۇرامى، «جاس تولقىن» ءانسامبلى، «اتامۇرا»، «مۇراگەر» ۇجىمدارى جانە باسقا دا دارىندى جاس ونەرپازدار ونەر كورسەتتى.

سونىمەن قاتار، قر ۇلتتىق ۇلان ءان-بي ءانسامبلىنىڭ «ەرلەر حورى» جانە جاس كورەرمەن تەاترىنىڭ جاس ارتىستەرى دە قولداۋ ءبىلدىرىپ، ءوز ونەرلەرىن ۇسىندى.

كونتسەرتتىڭ شارىقتاۋ شەگى فينالدىق شىعارما بولدى. كۇلاش احمەتوۆانىڭ سوزىنە جازىلعان كەنتاۋ نازاربەكتىڭ «سەن – قازاقسىڭ!» ءانى «اينالايىن» بالالار حورىنىڭ جاڭا قۇرامى جانە بارلىق پەداگوگتەردىڭ بىرلەسكەن ورىنداۋىندا شىرقالىپ، زالعا ەرەكشە رۋح پەن قۋات سىيلادى.

اتالعان كەش ۇلتتىق ونەرگە تاعزىم ەتكەن، كورەرمەننىڭ رۋحىنا سەرپىن بەرىپ، جۇرەككە جول تاپقان ءىرى مۋزىكالىق وقيعا رەتىندە ەستە قالدى. كونتسەرت جوعارى دەڭگەيدە ۇيىمداستىرىلىپ، كورەرمەننىڭ زور ىقىلاسىنا يە بولدى. كەش سوڭىندا اتا-انالار مەن قوناقتار وزدەرىنىڭ جىلى لەبىزدەرىن ءبىلدىرىپ، الەۋمەتتىك جەلىلەردە ريزاشىلىقتارىن جاۋدىرىپ، جاس ونەرپازدارعا اق تىلەكتەرىن ارنادى.

Abai.kz