بۇگىن الماتى وبلىسىنداعى كۇرتى سۋ قويماسىندا اۋقىمدى سەنبىلىك ءوتتى. وعان اۋىل تۇرعىندارى، جاستار، ەڭبەك ۇجىمدارى مەن ەرىكتىلەر قاتىستى. 800-گە تارتا ادام كوزدىڭ جاۋىن الاتىن كۇرتىنىڭ اينالاسىنان 5 تونناعا جۋىق قوقىس جينادى.

سۋرەت: الماتى وبلىسى اكىمدىگىنەن الىندى.

ءۇش كۇندىك دەمالىستا وڭىردەگى تۋريستىك نىسانداردىڭ تازالىعىنا ەرەكشە دەن قويىلعان. «تازالىق كۇنى» اكتسياسى «تازا قازاقستان» ەكولوگيالىق باعدارلاماسى اياسىندا جالعاسىپ جاتىر. كۇرتى سۋ قويماسى اتى اڭىزعا اينالعان «قىز جىبەك» كوركەم ءفيلمى ارقىلى حالىققا كەڭ تانىلعان مەكەن. تاريحي ايماق قازىر قايتا جاندانىپ، تۋريستەر ءجيى كەلەتىن دەمالىس ورنىنا اينالعان. بۇل جەرگە كۇنىنە 1500-2000-عا جۋىق ساياحاتشى كەلەدى. سوندىقتان تۇمسا تابيعاتتىڭ تازالىعى باستى نازاردا. بۇگىنگى سەنبىلىككە وبلىس اكىمى مارات سۇلتانعازيەۆ تە اتسالىسىپ، ەكولوگيالىق مادەنيەتتى ساقتاۋدىڭ ماڭىزىنا توقتالدى.

سۋرەت: الماتى وبلىسى اكىمدىگىنەن الىندى.

«الماتى وبلىسىندا قىزىقتاپ-كورەتىن تابيعاتى ەرەكشە نىساندار كوپ. وزەن-كول، تاۋ-قىراتىمەن قوسا جازىق دالاسى دا جانعا جايلىلىق سىيلايدى. ال ىلە اۋدانىنا كەلگەن قوناق دارحان دالانىڭ كەرەمەتىنە كۋا بولادى. قازىرگى تاڭدا كۇرتى سۋ قويماسى ۇلكەن تانىمالدىققا يە بولىپ، تۋريستەردىڭ سۇيىكتى مەكەنىنە اينالعان. سوندىقتان اۋماقتىڭ تازا ءارى جايلى بولۋى ماڭىزدى»، – دەدى ءوڭىر باسشىسى.

سۋرەت: الماتى وبلىسى اكىمدىگىنەن الىندى.

ايتا كەتەيىك، «تازالىق كۇنى» اكتسياسى وبلىستاعى تانىمال تۋريستىك باعىتتاردىڭ بارىندە قىزۋ جۇرگىزىلۋدە. اتاپ ايتقاندا،

كەگەن اۋدانى: كولساي، قايىڭدى كولدەرى;  ۇيعىر اۋدانى: «شارىن» مەملەكەتتىك ۇلتتىق تابيعي پاركى; ەڭبەكشىقازاق اۋدانى: ەسىك كولىنىڭ جاعالاۋى; جامبىل اۋدانى: ۇڭگىرتاس اۋىلىنداعى «جەر كىندىگى» تۋريستىك نىسانى; رايىمبەك اۋدانى: شالكودە جايلاۋى جانە تۇزكول كولىنىڭ جاعاسى; قوناەۆ قالاسى: «الماتى–وسكەمەن» تاسجولى بويى مەن «كوشپەندىلەر قالاشىعى» اۋماعى; تالعار اۋدانى: تالعار وزەنىنىڭ بويى; بالقاش اۋدانى:  جيدەلى اۋىلدىق وكرۋگىندە ورنالاسقان «زاۆيدوۆو» تۋريستىك كەشەنى;  ىلە اۋدانى: پەرۆوماي توعاندارى، «Sokol» سپورتتىق-تەحنيكالىق كەشەنى، «رىباتسكايا ۋسادبا» دەمالىس ورنى، «Tortuga» دەمالىس بازاسى جانە «Dubai Resort» اكۆاپاركى; الاتاۋ قالاسى: «ەڭبەك» جانە «زارەچنىي» شاعىن اۋداندارى. وبلىس بويىنشا بۇگىنگى تازالىق جۇمىستارىنا  12 مىڭعا جۋىق ادام قاتىسىپ، 135 ارنايى تەحنيكا جۇمىلدىرىلدى. ناتيجەسىندە 205 تونناعا جۋىق تۇرمىستىق قالدىق جينالىپ، ارنايى پوليگونعا شىعارىلدى.

سۋرەت: الماتى وبلىسى اكىمدىگىنەن الىندى.

«كەڭ بايتاق جەرىمىزدىڭ كوركىن ساقتاۋ – ارقايسىمىزدىڭ مىندەتىمىز. بۇگىن سەنبىلىككە قاتىسىپ، سۇلۋ مەكەننىڭ ءسانىن كەتىرگەن قوقىستاردى جينادىق. مۇندا وتباسىمىزبەن ءجيى كەلىپ تۇرامىز. كوزدىڭ جاۋىن الاتىن تابيعات جاۋھارىن قورعاۋ –بارشامىزدىڭ ورتاق جاۋاپكەرشىلىگىمىز»، – دەپ اتاپ ءوتتى سەنبىلىككە قاتىسقان اقشي اۋىلىنىڭ تۇرعىنى ءمولدىر توعاەۆا.

سۋرەت: الماتى وبلىسى اكىمدىگىنەن الىندى.

«تازالىق كۇنى» اكتسياسى ەرتەڭ، ياعني 3 مامىر كۇنى دە جالعاسىپ، ءۇش كۇن بويى وڭىردەگى تۋريستىك باعىتتاردا جۇرگىزىلگەن تازالىق شارالارى قورىتىندىلانادى.

Abai.kz