گونكونگتە وتكەن قازاقستان فورۋمى ءوز جۇمىسىن اياقتادى. ءىس-شاراعا گونكونگ پەن قازاقستاننان كەلگەن 200-گە جۋىق مەملەكەتتىك قىزمەتكەر، بانك سالاسىنىڭ ماماندارى مەن بيزنەس وكىلدەرى قاتىستى.

فورۋمدى گونكونگ بانكتەر قاۋىمداستىعى (HKAB) ۇيىمداستىردى. ۇيىم تاراتقان مالىمەتكە سايكەس، جيىن ەكونوميكا، قارجى، ەنەرگەتيكا جانە تۇراقتى دامۋ سالالارىنداعى ىنتىماقتاستىق مۇمكىندىكتەرىن تالقىلاۋعا ارنالدى.

«گونكونگ پەن قازاقستان اراسىنداعى كوپىر: ورتالىق ازياداعى جاڭا مۇمكىندىكتەر» تاقىرىبىمەن وتكەن فورۋمدا بىرقاتار بەدەلدى سپيكەرلەر ءسوز سويلەدى. ولاردىڭ قاتارىندا «استانا» حالىقارالىق قارجى ورتالىعى اكىمشىلىگىنىڭ باسقارما مۇشەسى ءارى ونىمدەر جونىندەگى باس ديرەكتورى جانبولات قاقىشەۆ، گونكونگ ۆاليۋتا باسقارماسى توراعاسىنىڭ ورىنباسارى ارتۋر يۋەن، Invest Hong Kong ۇيىمىنىڭ ينۆەستيتسيا تارتۋ جونىندەگى باس ديرەكتورى الفا لاۋ جانە «ءبىر بەلدەۋ – ءبىر جول» جوباسى بويىنشا كوميسسار نيكولاس حو بولدى.

فورۋم اياسىندا ورتالىق ازياداعى تۇراقتى قارجىلاندىرۋ مەن ەكى تاراپ اراسىنداعى كاپيتال نارىعىن دامىتۋ ماسەلەلەرى بويىنشا پانەلدىك پىكىرتالاستار ۇيىمداستىرىلدى. بۇل كەزدەسۋلەر قاتىسۋشىلارعا ايماقتىڭ قارجى جۇيەسى مەن ينفراقۇرىلىمى جونىندە كەڭىرەك مالىمەت الۋعا مۇمكىندىك بەردى.

HKAB توراعاسى ءارى Bank of China (Hong Kong) بانكىنىڭ ۆيتسە-توراعاسى جانە باس اتقارۋشى ديرەكتورى سۋن ءيۋيدىڭ ايتۋىنشا، قازاقستان مەن قىتاي اراسىنداعى ەكونوميكالىق جانە ساۋدا بايلانىستارى جىل سايىن نىعايىپ كەلەدى. 2025 جىلدىڭ العاشقى ون ايىندا ەكى ەل اراسىنداعى ساۋدا كولەمى وتكەن جىلمەن سالىستىرعاندا 8,9 پايىزعا ءوسىپ، 39,8 ميلليارد اقش دوللارىنا جەتكەن.

سۋن يۋي گونكونگتىڭ «سۋپەر بايلانىستىرۋشى» رەتىندەگى ءرولىن پايدالانا وتىرىپ، قازاقستانمەن ەكونوميكالىق، ساۋدا جانە قارجى سالالارىنداعى ىنتىماقتاستىقتى ودان ءارى تەرەڭدەتە بەرەتىنىن ايتتى.

ۇيىم تاراتقان مالىمدەمەدە HKAB-تىڭ ساۋدا دالىزدەرى جونىندەگى بيزنەس كوميتەتى الداعى ۋاقىتتا دا ترانسشەكارالىق ساۋدا باعىتتارىنان تۋىندايتىن جاڭا مۇمكىندىكتەردى ءتيىمدى پايدالانۋعا قولداۋ كورسەتەتىنى اتاپ ءوتىلدى.

Abai.kz