«قىز جىبەكتىڭ» كامزولى شاڭ باسقان ساندىقتان شىققاندا، استىنا كومىلگەن ءبىر شىندىق تا قوسا شىقتى.

قازاقتىڭ جىبەگى - مەرۋەرت وتەكەشوۆانىڭ  استانادا  پاتەر جالداپ تۇراتىنىن ەستىگەن جۇرت جابىلىپ قوناەۆ پەن نۇرقادىلەۆ بەرگەن پاتەرلەردى تۇگەندەۋگە كىرىستى. قاي كوشەدە تۇرعانىنا دەيىن ايتىپ، جارىسا جازىپ جاتىر. ال سول ۇيلەردىڭ نە ءۇشىن ساتىلعانىنا كەلگەندە ءۇنسىز…

بىراق مەرۋەرت وتەكەشوۆا وسى ۋاقىتقا دەيىن ەشكىمگە الاقان جايعان جوق. ەل ارالاپ جىلاعان جوق. ول قۋىرشاق قۇساپ كيىنىپ الىپ، «ءۇيىم جوق» دەپ كومەك سۇراعان ءانشى توقساقالداردىڭ قاتارىنا قوسىلعان جوق. بار قايعىسىن ىشىنە جۇتىپ، تەكتىلىگىن ساقتاپ كەلەدى.

بالكىم «قىز جىبەك» ءفيلمى دە قايتا تۇسىرىلەر. بىراق مەرۋەرتتىڭ جانارىنداعى تازالىقتى، بويىنداعى قازاقىلىقتى، تابيعي سۇلۋلىقتى ەشكىم ەندى ءدال ول سياقتى بەرە المايدى. ويتكەنى ول ءرول ويناعان جوق، ول قازاقتىڭ ءوزىن ەكرانعا الىپ شىقتى.

ەندەشە قازاقتىڭ باي-باعلاندارى، ميللياردىن كورسەتىپ ماقتاناتىن «مەتسەناتتار» ناعىز سىنالاتىن جەر وسى.

كەزىندە حالقى قادىر مىرزا الىگە، كۇلاش احمەتوۆا مەن قايىربەك اسانوۆقا تۋعان جەرلەرىندە ءۇي سالىپ بەرىپ، قۇرمەت كورسەتتى. ەندەشە، قازاقتىڭ سۇلۋلىعىن الەمگە تانىتقان مەرۋەرت اپايلارىنا دا ەل بولىپ ىقىلاس بىلدىرەتىن ۋاقىت كەلگەن شىعار.

قالتالى، جۇرەگى قازاق دەپ سوعاتىن ازاماتتار باس قوسىپ، مەرۋەرت وتەكەشوۆاعا ءبىر لايىقتى شاڭىراق كوتەرىپ بەرسە ەڭسەسى دە كوتەرىلىپ قالار ەدى. اسىرەسە، قازاق ونەرىنە كورسەتىلگەن قۇرمەت بولارى ءسوزسىز.

قۇمان مەن مەرۋەرتتىڭ تاعدىرىنىڭ ءوزى ءبىر فيلمگە سۇرانىپ تۇر. ال ءبىز ءتىرى اڭىزدارىمىزدىڭ قادىرىن تىرىسىندە باعالاي الماي ءجۇرمىز…

ريزا مولداشەۆا

Abai.kz