قازاقستاندا بيىل سپۋتنيكتىك مونيتورينگ ناتيجەسىندە 884 زاڭسىز قوقىس پوليگونى انىقتالدى. ونىڭ 196-سى نەمەسە 22 پايىزى جويىلعان. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە ەكولوگيالىق رەتتەۋ جانە باقىلاۋ كوميتەتىنىڭ توراعاسى ەربولات قوجىقوۆ ءمالىم ەتتى.

ونىڭ ايتۋىنشا، زاڭسىز قوقىس ۇيىندىلەرىن انىقتاۋ جانە جويۋ جۇمىستارى 2018 جىلدان بەرى ەكولوگيا جانە تابيعي رەسۋرستار مينيسترلىگى مەن «قازاقستان عارىش ساپارى» ۇلتتىق كومپانياسىنىڭ بىرلەسكەن سپۋتنيكتىك مونيتورينگى ارقىلى جۇرگىزىلىپ كەلەدى.

– بيىلعى مونيتورينگ بارىسىندا ەلىمىز بويىنشا 884 زاڭسىز قوقىس پوليگونى انىقتالعان. قازىرگى ۋاقىتتا ولاردىڭ 196-سى جويىلدى. ەڭ كوپ زاڭسىز قوقىس پوليگونى اباي وبلىسىندا تىركەلگەن. وڭىردە 137 نىسان انىقتالسا، قوستاناي وبلىسىندا ولاردىڭ سانى 113-كە، ۇلىتاۋ وبلىسىندا 100-گە جەتكەن، – دەدى ەربولات قوجىقوۆ.

كوميتەت توراعاسىنىڭ مالىمەتىنشە، مونيتورينگ جۇمىستارى استانا، الماتى جانە شىمكەنت قالالارىندا، سونداي-اق اقتوبە، شىعىس قازاقستان جانە سولتۇستىك قازاقستان وبلىستارىندا ءالى دە جالعاسىپ جاتىر.

سونىمەن قاتار سوڭعى جىلدارى زاڭسىز قوقىس پوليگوندارىنىڭ سانى بىرتىندەپ ازايىپ كەلەدى. ماسەلەن 2020 جىلى ەل بويىنشا 8 884 زاڭسىز قوقىس ورنى انىقتالسا، 2025 جىلى بۇل كورسەتكىش 3 828-گە دەيىن تومەندەگەن.

الايدا كەيبىر وڭىرلەردە قوقىس ۇيىندىلەرىن جويۋ جۇمىستارى ءالى دە جەتكىلىكسىز. وسىعان بايلانىستى بيىل جەرگىلىكتى اتقارۋشى ورگانداردىڭ 15 لاۋازىمدى تۇلعاسى اكىمشىلىك جاۋاپكەرشىلىككە تارتىلىپ، ولارعا جالپى سوماسى 3,7 ملن تەڭگە ايىپپۇل سالىنعان.

Abai.kz