سپورتتىق گيمناستيكادان قازاقستان ەرلەر قۇراماسىنىڭ باپكەرلەر شتابى قىتايدىڭ تسزۋني قالاسىندا وتەتىن ازيا چەمپيوناتىنا قاتىساتىن قۇرامدى جاريالادى.

قر ۇوك مالىمەتىنشە، قۇرلىق بىرىنشىلىگىندە ەل نامىسىن مىنا سپورتشىلار قورعايدى:

- ميلاد كاريمي (ەركىن جاتتىعۋلار، قول تىرەپ سەكىرۋ، ات سناريادىندا جانە كەرمەدەگى جاتتىعۋلار)
- يلياس ازيزوۆ (كوپسايىس)
- دميتري پاتانين (ەركىن جاتتىعۋلار، قول تىرەپ سەكىرۋ، ساقينالارداعى جاتتىعۋلار، قوسسىرىق جانە كەرمە)
- رومان حەگاي (كوپسايىس)
- دياس تويشىبەك (ات سناريادىنداعى جاتتىعۋلار، قوسسىرىق جانە كەرمە)
- نۋرتان يدريسوۆ (كوپسايىس)

قازىر گيمناستار الداعى ازيا چەمپيوناتىنا دايىندىقتىڭ سوڭعى كەزەڭىندە. بەيجىڭدەگى (قىتاي) وقۋ-جاتتىعۋ جيىنى بارىسىندا قازاقستاندىق سپورتشىلار قىتاي ۇلتتىق قۇراماسىمەن بىرگە دايىندالىپ جاتىر.

ايتا كەتەيىك، الداعى ازيا چەمپيوناتى 2026 جىلى وتەتىن ازيا ويىندارى مەن الەم چەمپيوناتىنا ىرىكتەۋ جارىسى بولىپ سانالادى. جولدامالار كوماندالىق جارىستاردىڭ قورىتىندىسى بويىنشا ساراپقا سالىنادى. وسىعان بايلانىستى باپكەرلەر شتابى قۇرامدى جاساقتاۋ كەزىندە بىرنەشە سناريادتا ونەر كورسەتە الاتىن گيمناستارعا باسىمدىق بەردى. سول سەبەپتى جەكەلەي سناريادتارعا ماماندانعان سپورتشىلار تىزىمگە ەنگىزىلگەن جوق.

سونىمەن قاتار قازاقستان قۇراماسىنىڭ ازيا ويىندارىنا قاتىساتىن ناقتى قۇرامى قۇرلىق بىرىنشىلىگى اياقتالعاننان كەيىن بەلگىلى بولادى.

ازيا چەمپيوناتى 18-21 ماۋسىم ارالىعىندا وتەدى.

Abai.kz