مەملەكەت باسشىسى قاسىم-جومارت توقاەۆ ۆولونتەر جىلىنىڭ جابىلۋ راسىمىندە سويلەگەن سوزىندە ەرىكتىلىك قىزمەتتىڭ قوعامداعى ماڭىزىن ەرەكشە اتاپ وتكەن ەدى. پرەزيدەنتتىڭ ايتۋىنشا، ەرىكتىلەر جىلى جاستاردىڭ بويىنداعى ەڭ اسىل قاسيەتتەردى دارىپتەپ، جاناشىرلىققا، جاۋاپكەرشىلىك پەن قامقورلىققا ۇندەگەن ەرەكشە كەزەڭ بولدى. بۇل يدەيالار بۇگىندە ەلىمىزدىڭ بارلىق وڭىرلەرىندە، اسىرەسە الماتى قالاسىندا ناقتى ىستەر ارقىلى جالعاسىپ كەلەدى.
الماتى – جاستار كوپ شوعىرلانعان، قوعامدىق بەلسەندىلىك جوعارى مەگاپوليستەردىڭ ءبىرى. سوڭعى جىلدارى قالادا ۆولونتەرلىك قوزعالىس جاڭا دەڭگەيگە كوتەرىلىپ، مىڭداعان جاس الەۋمەتتىك، ەكولوگيالىق جانە قايىرىمدىلىق جوبالارىنا اتسالىسۋدا. قالاداعى ەرىكتىلەر قارتتار ۇيلەرىنە كومەك كورسەتىپ، از قامتىلعان وتباسىلارعا قولداۋ ءبىلدىرىپ قانا قويماي، ءتۇرلى قوعامدىق شارالاردىڭ ۇيىمداستىرىلۋىنا دا بەلسەندى قاتىسىپ كەلەدى.
پرەزيدەنت ءوز سوزىندە: «ءبىز مۇقتاج جاندارعا قول ۇشىن بەرىپ، ءتۇرلى قيىندىقتارمەن بىرگە كۇرەستىك. وسىلايشا، ادامگەرشىلىك قۇندىلىقتاردى جوعارى باعالايتىن قوعام ەكەنىمىزدى تانىتتىق»، – دەگەن بولاتىن. بۇل سوزدەردىڭ شىنايى كورىنىسىن پاندەميا كەزەڭىندە الماتى ەرىكتىلەرىنىڭ قىزمەتىنەن انىق بايقاۋعا بولادى. ىندەت كەزىندە جۇزدەگەن ۆولونتەر ءدارى-دارمەك پەن ازىق-تۇلىك جەتكىزىپ، جالعىزباستى قارتتار مەن الەۋمەتتىك وسال توپتارعا كومەك كورسەتتى. ولار قوعامداعى ءوزارا قولداۋ مەن بىرلىكتىڭ ماڭىزدى ەكەنىن دالەلدەدى.
الماتى قالاسىنىڭ بەلسەندى ەرىكتىلەرىنىڭ ءبىرى تالعات كارىپبايدىڭ ايتۋىنشا، ۆولونتەرلىك قىزمەت ادامنىڭ ومىرگە دەگەن كوزقاراسىن وزگەرتەدى.
– ۆولونتەر بولۋ – تەك كومەك كورسەتۋ عانا ەمەس. بۇل – قوعامنىڭ ءبىر بولشەگى رەتىندە ءوز جاۋاپكەرشىلىگىڭدى سەزىنۋ. ءبىز ءتۇرلى اكتسيالار بارىسىندا جالعىزباستى قاريالارعا، كوپبالالى وتباسىلارعا جانە ەرەكشە كۇتىمدى قاجەت ەتەتىن جاندارعا قولداۋ كورسەتەمىز. وسىنداي جۇمىستارعا قاتىسقان سايىن ادامداردىڭ العىسىن كورىپ، ەڭبەگىڭنىڭ ناتيجەسىن سەزىنەسىڭ. ەڭ باستىسى، ەرىكتىلىك جاستاردى مەيىرىمدىلىككە، توزىمدىلىككە جانە ازاماتتىق بەلسەندىلىككە تاربيەلەيدى، – دەيدى ول.
بۇگىندە الماتىدا جاستار ۇيىمدارى، جوعارى وقۋ ورىندارى جانە قوعامدىق قورلار بىرلەسىپ جۇزەگە اسىرىپ جاتقان كوپتەگەن ەرىكتىلىك جوبالار بار. قالانى كوگالداندىرۋ، وزەن-كولدەردى تازالاۋ، اعاش وتىرعىزۋ، ەرەكشە قاجەتتىلىگى بار ازاماتتارعا قولداۋ كورسەتۋ سياقتى باستامالار جاستاردىڭ ازاماتتىق جاۋاپكەرشىلىگىن ارتتىرۋعا ىقپال ەتۋدە.
ۆولونتەرلىك قىزمەتتىڭ تاعى ءبىر ماڭىزدى قىرى – ونىڭ تاربيەلىك ءمانى. ەرىكتىلىكپەن اينالىسقان جاس ءوز ۋاقىتىن ءتيىمدى پايدالانۋدى، ادامدارمەن قارىم-قاتىناس جاساۋدى، كوشباسشىلىق قاسيەتتەردى دامىتۋدى ۇيرەنەدى. سونىمەن قاتار، قوعام الدىنداعى جاۋاپكەرشىلىكتى سەزىنىپ، وزگەلەردىڭ ماسەلەسىنە بەيجاي قاراماۋعا داعدىلانادى.
«الەمدى جايلاعان ىندەت قايىرىم مەن مەيىرىمنىڭ قانشالىقتى ماڭىزدى ەكەنىن انىق كورسەتتى»، – دەگەن پرەزيدەنت ءسوزى بۇگىن دە وزەكتىلىگىن جوعالتقان جوق. الماتى جاستارى جۇزەگە اسىرىپ جاتقان يگى باستامالار قوعامداعى مەيىرىم مەن جاناشىرلىق مادەنيەتىن نىعايتۋعا قىزمەت ەتىپ كەلەدى.
ەرىكتىلىك – تەك تەگىن ەڭبەك ەمەس، ول ازاماتتىق ۇستانىمنىڭ كورىنىسى. الماتىداعى ۆولونتەرلىك قوزعالىس وسى ۇستانىمنىڭ ناقتى دالەلى بولىپ وتىر. قوعام يگىلىگى ءۇشىن اتقارىلىپ جاتقان جۇمىستار جاستاردىڭ بەلسەندىلىگى مەن ەل بولاشاعىنا دەگەن جاۋاپكەرشىلىگىن ايقىن كورسەتەدى. سوندىقتان ۆولونتەرلىك مادەنيەتتى دامىتۋ – قايىرىمدى ءارى ءبىرتۇتاس قوعام قالىپتاستىرۋدىڭ ماڭىزدى تەتىكتەرىنىڭ ءبىرى بولىپ قالا بەرەدى.

Abai.kz