پرەزيدەنت قاسىم-جومارت توقاەۆتىڭ بريۋسسەلگە جاساعان رەسمي ساپارى قازاقستان مەن ەۋروپالىق وداق اراسىنداعى ستراتەگيالىق سەرىكتەستىكتىڭ جاڭا كەزەڭىن ايقىنداپ بەردى. مەملەكەت باسشىسىن بەلگيا استاناسىنىڭ اۋەجايىندا قۇرمەت قاراۋىلى ساپ تۇزەپ قارسى الدى. پرەزيدەنتتى ەۋروپا وداعىنىڭ ورتالىق ازيا بويىنشا ارنايى وكىلى ەدۋاردس ستيپرايس باستاعان رەسمي تۇلعالار كۇتىپ الدى. بۇل ساپار ەكىجاقتى قارىم-قاتىناستىڭ بۇرىنعىدان دا ماڭىزدى سيپاتقا يە بولعانىن جانە ونى ودان ءارى نىعايتۋدىڭ قاجەتتىگىن كورسەتەدى.

ساپار اياسىندا ەۋروپالىق كەڭەستىڭ شتاب-پاتەرىندە ەۋروپالىق كەڭەس پرەزيدەنتى انتونيۋ كوشتامەن بەيرەسمي كەزدەسۋ ءوتتى. بۇل كەزدەسۋ ەرتەڭگى كەلىسسوزدەردىڭ باعىتىن ايقىنداپ، ماڭىزدى ماسەلەلەردى ەگجەي-تەگجەيلى تالقىلاۋعا مۇمكىندىك بەردى. مەملەكەت باسشىسىنىڭ الداعى كەستەسىندە ەۋروپالىق كەڭەس باسشىلارىمەن، سونداي-اق ەۋروپا كوميسسياسىنىڭ ءتورايىمى ۋرسۋلا فون دەر ليايەنمەن جانە بەلگيا پرەمەر-ءمينيسترى بارت دە ۆەۆەرمەن ماڭىزدى كەلىسسوزدەر جۇرگىزۋ جوسپارلانعان. ساپاردىڭ قورىتىندىسى بويىنشا بىرقاتار ماڭىزدى بىرلەسكەن قۇجاتتارعا قول قويىلادى دەپ كۇتىلۋدە.

ساپاردىڭ باستى باعىتتارىنىڭ ءبىرى – كولىك-لوگيستيكا سالاسىنداعى ءوزارا ءىس-قيمىلدى ارتتىرۋ. بريۋسسەلدە «قازاقستان تەمىر جولى» ۇلتتىق وپەراتورى مەن قازاقستاننىڭ بەلگياداعى ەلشىلىگىنىڭ ۇيىمداستىرۋىمەن ترانسكاسپي حالىقارالىق كولىك باعىتىن، ياعني ورتا كوريدوردى دامىتۋعا ارنالعان حالىقارالىق بيزنەس-كونفەرەنتسيا ءوتتى. شاراعا ەۋروپالىق پارلامەنت دەپۋتاتتارى، ەۋروكوميسسيا وكىلدەرى، حالىقارالىق قارجى ينستيتۋتتارى مەن DHL Global Forwarding, DB Cargo, HHLA International, Rhenus, Hellmann Worldwide Logistics, A.P. Moller – Maersk سەكىلدى الەمدىك دەڭگەيدەگى ءىرى لوگيستيكالىق كومپانيالاردان 100-دەن استام وكىل قاتىستى.

كونفەرەنتسيا اياسىندا جالپى سوماسى 462 ميلليون دوللاردى قۇرايتىن بىرقاتار كەلىسىمگە قول قويىلدى. اتالعان قاراجات كولىك ينفراقۇرىلىمىن جاڭعىرتۋعا جانە باعىتتىڭ وتكىزۋ قابىلەتىن ارتتىرۋعا جۇمسالادى. ماسەلەن، قازاقستاننىڭ كولىك مينيسترلىگى SITA كومپانياسىمەن مەملەكەتتىك اەروپورتتاردى تسيفرلاندىرۋ جانە بيومەتريالىق يدەنتيفيكاتسيانى ەنگىزۋ تۋرالى مەموراندۋمعا قول قويدى. سونىمەن قاتار «قازاۆتوجول» ۇلتتىق كومپانياسى مەن ەۋروپا قايتا قۇرۋ جانە دامۋ بانكى اراسىندا «اقتوبە – ۇلعايسىن» جوباسى بويىنشا نەسيەلىك كەلىسىم بەكىتىلدى. ودان بولەك، كتج-نىڭ ەنشىلەس ۇيىمى KTZ Express رۋمىنيانىڭ ميديا پورتىنداعى جوبانى ىسكە اسىرۋ بويىنشا Midia Marine Terminal كومپانياسىمەن، ال A.P. Moller – Maersk كومپانياسىمەن كونتەينەرلىك تاسىمالداردى ۇلعايتۋ بويىنشا كەلىسىمدەر جاساستى. تاراپتار ورتا كوريدوردى ەۋروپانىڭ Global Gateway باستاماسىمەن ينتەگراتسيالاۋ جانە لوگيستيكانى تسيفرلاندىرۋ ماسەلەلەرىنە ەرەكشە نازار اۋداردى.

پرەزيدەنت قاسىم-جومارت توقاەۆ Euronews باسىلىمىنا جازعان اۆتورلىق ماقالاسىندا قازاقستان مەن ەۋروپا وداعى اراسىنداعى ارىپتەستىكتىڭ ستراتەگيالىق مانىنە توقتالدى. 2015 جىلى قول قويىلعان كەڭەيتىلگەن ارىپتەستىك جانە ىنتىماقتاستىق تۋرالى كەلىسىمنەن بەرى ەۋروپا وداعى قازاقستاننىڭ نەگىزگى ساۋدا جانە ينۆەستيتسيالىق سەرىكتەسىنە اينالدى. ەلىمىزدە مىڭداعان ەۋروپالىق كومپانيالار جۇمىس ىستەپ، قازاقستان ەكونوميكاسىن مودەرنيزاتسيالاۋ مەن ارتاراپتاندىرۋعا ءوز ۇلەستەرىن قوسۋدا.

مەملەكەت باسشىسىنىڭ پايىمداۋىنشا، قازىرگى تەز وزگەرىپ جاتقان الەمدە قولدا بار جەتىستىكتەرمەن توقمەيىلسۋگە بولمايدى. ول سەرىكتەستىكتى جاڭا دەڭگەيگە كوتەرۋ ءۇشىن ەنەرگەتيكالىق قاۋىپسىزدىكتەن باستاپ، جاساندى ينتەللەكت، تسيفرلىق باسقارۋ جانە تەحنولوگيالىق ەكوسيستەمالاردى دامىتۋعا دەيىنگى اۋقىمدى باعىتتاردى قامتۋ قاجەت ەكەنىن اتاپ ءوتتى. بۇل باستامالار قازاقستاننىڭ ترانزيتتىك الەۋەتىن نىعايتىپ قانا قويماي، ەۋروپا مەن ازيا اراسىنداعى تۇراقتى كوپىر رەتىندەگى ءرولىن بەكىتە تۇسپەك. قازاقستاننىڭ ورتا كوريدوردى دامىتۋعا دەگەن بەلسەندىلىگىنە ەۋروپالىق بيزنەس پەن حالىقارالىق قارجى ينستيتۋتتارىنىڭ قىزىعۋشىلىعىنىڭ ارتۋى – ەكى تاراپتىڭ دا ورتاق مۇددەسىنىڭ ايقىن كورىنىسى.

ايانا قازتاي

Abai.kz