بۇل تۋرالى قازاقستان رەسپۋبليكاسى ورتالىق سايلاۋ كوميسسياسىنىڭ وتىرىسىندا بەلگىلى بولدى.

وسك-دە الداعى قۇرىلتاي سايلاۋىنا قاتىستى ماسەلەلەر بويىنشا وتىرىس ءوتتى. وندا قازاقستان رەسپۋبليكاسى ادىلەت ۆيتسە-ءمينيسترى بوتاگوز جاقسەلەكوۆا سويلەپ، جۇرگىزىلىپ جاتقان ساياسي رەفورمالاردىڭ ناتيجەسىندە ساياسي پارتيالار تۋرالى زاڭنامانىڭ كەزەڭ-كەزەڭىمەن جەتىلدىرىلگەنىن جانە كوپپارتيالىلىقتىڭ ودان ءارى دامۋىنا جول اشىلعانىن ايتتى. ونىڭ سوزىنشە، 2022 جىلى پارتيالاردى تىركەۋ شەگى 5 مىڭ مۇشەگە دەيىن تومەندەتىلىپ، پارتيا قۇرۋ تالاپتارى ايتارلىقتاي جەڭىلدەتىلگەن.

«سوڭعى جىلدارداعى تاجىريبە جۇرگىزىلگەن زاڭنامالىق رەفورمالاردىڭ تيىمدىلىگىن راستاپ وتىر. تىركەۋ شەگى تومەندەتىلگەننەن كەيىن 3 جاڭا ساياسي پارتيا تىركەلدى. بۇل ازاماتتاردىڭ بىرلەسۋ جونىندەگى كونستيتۋتسيالىق قۇقىعىن ىسكە اسىرۋ مۇمكىندىكتەرىنىڭ كەڭەيگەنىن كورسەتەدى»، – دەدى ول.

سونداي-اق ۆيتسە-مينيستر قازىرگى ۋاقىتتا قازاقستاندا سەگىز ساياسي پارتيا تىركەلگەنىن اتاپ ءوتتى. سونىڭ ءبىرى – AMANAT پارتياسى.

«ساياسي پارتيالاردىڭ سەزدەرىندە AMANAT پارتياسىنىڭ «ادىلەت» پارتياسىنا قوسىلۋى تۋرالى شەشىم قابىلداندى. قازىرگى ۋاقىتتا قاجەتتى ۇيىمداستىرۋشىلىق جانە قۇقىقتىق ءىس-شارالار جۇرگىزىلۋدە»، – دەدى جاقسەلەكوۆا.

ونىڭ بايانداماسىن قورىتىندىلاعان وسك توراعاسى نۇرلان ءابدىروۆ ورتالىق سايلاۋ كوميسسياسىنا AMANAT پارتياسىنان پارتيانىڭ الداعى قۇرىلتاي سايلاۋىنا قاتىسپايتىنى تۋرالى رەسمي حات كەلىپ تۇسكەنىن حابارلادى.

Abai.kz