مەملەكەت باسشىسى قاسىم-جومارت توقاەۆ رايىمبەك اۋدانىنىڭ 90 جىلدىق مەرەيتويىنا وراي تۇرعىندارعا قۇتتىقتاۋ جولدادى. ونى شالكودە جايلاۋىندا وتكەن «ءحانتاڭىرى قازىناسى» حالىقارالىق ەتنوفەستيۆالىنىڭ سالتاناتتى اشىلۋىندا قر پرەزيدەنتىنىڭ كەڭەسشىسى مالىك وتارباەۆ جەتكىزدى.

پرەزيدەنت قۇتتىقتاۋىندا وسى قاسيەتتى مەكەننەن ەل مۇددەسىنە ادال قىزمەت ەتكەن كوپتەگەن كورنەكتى تۇلعالاردىڭ شىققانىنا توقتالىپ، بۇگىندە اۋدان حالقى ەلىمىزدىڭ اۋىل شارۋاشىلىعى، تۋريزم جانە وزگە دە سالالارىنىڭ دامىتۋعا ەلەۋلى ۇلەس قوسىپ كەلە جاتقانىن اتاپ وتكەن.

«رايىمبەك – تاريحى تەرەڭ، ىنتىماعى جاراسقان بەرەكەلى ءوڭىر. وسى ونەگەلى ولكەدەن كوپتەگەن تۇعىرلى تۇلعالار شىعىپ، ۇلت مۇددەسى ءۇشىن قالتقىسىز قىزمەت ەتتى. بەردىبەك سوقپاقباەۆ، مۇقاعالي ماقاتاەۆ جانە وزگە دە كورنەكى قالامگەرلەر شوقتىعى بيىك شىعارمالار جازىپ، وسكەلەڭ ۇرپاقتىڭ بويىنا وتانشىلدىق، بىلىمپازدىق، ەڭبەكقورلىق قاسيەتتەرىن ءسىڭىردى.

قازىر اۋدان حالقى اۋىل شارۋاشىلىعى، تۋريزم جانە باسقا دا سالالاردا قاجىرلى ەڭبەك ەتىپ، تۋعان جەرىن كوركەيتۋگە اتسالىسىپ كەلەدى. سونداي-اق ولار ەل تاعدىرىنا اسەر ەتەتىن باستامالاردى ۇنەمى قولداپ، ۇيىمشىلدىقتىڭ وزىق ۇلگىسىن تانىتىپ ءجۇر. اۋدان تۇرعىندارىنىڭ جالپىحالىقتىق رەفەرەندۋمعا بەلسەنە قاتىسىپ، جاڭا كونستيتۋتسيانى قولداۋى – سونىڭ ايقىن دالەلى»، – دەلىنگەن قۇتتىقتاۋ حاتتا.

مەملەكەت باسشىسى سونداي-اق ءوڭىردىڭ دامۋىنا ۇلەس قوسىپ جۇرگەن بارلىق ازاماتقا ريزاشىلىعىن ءبىلدىرىپ، اۋدان تۇرعىندارىنا باق-بەرەكە، تولاعاي تابىس جانە ەل يگىلىگى جولىنداعى ەڭبەكتەرىنە تابىس تىلەگەن.

ايتا كەتەيىك، رايىمبەك اۋدانىنىڭ 90 جىلدىعىنا ارنالعان شارالار لەگى ءۇش كۇن بويى جالعاستى. مەرەيتوي اياسىندا عىلىمي-تانىمدىق كونفەرەنتسيالار، رەسپۋبليكالىق ايتىس پەن كونتسەرتتىك باعدارلامالار ۇيىمداستىرىلدى. ۇلان-اسىر توي شالكودە جايلاۋىندا «ءحانتاڭىرى قازىناسى» حالىقارالىق ەتنوفەستيۆالىمەن قورىتىندىلاندى.

Abai.kz