بۇگىن استانادا قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى نۇرلان ءابدىروۆتىڭ توراعالىعىمەن قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋ جونىندەگى سايلاۋ ناۋقانى اياسىندا ورتالىق سايلاۋ كوميسسياسىنىڭ بەسىنشى وتىرىسى ءوتتى.

وتىرىسقا «اق جول» قازاقستاننىڭ دەموكراتيالىق پارتياسى قوعامدىق بىرلەستىگىنىڭ باسشىلىعى، ەقىۇ دياقب حالىقارالىق بايقاۋشىلارى، باس پروكۋراتۋرانىڭ، سىرتقى ىستەر، قارجى، ىشكى ىستەر، ادىلەت مينيسترلىكتەرىنىڭ، سونداي-اق بۇقارالىق اقپارات قۇرالدارىنىڭ وكىلدەرى قاتىستى. سونىمەن قاتار بەينەكونفەرەنتسيالىق رەجيمدە ەلوردا، وبلىستار جانە رەسپۋبليكالىق ماڭىزى بار قالالاردىڭ اۋماقتىق سايلاۋ كوميسسيالارىنىڭ توراعالارى مەن مۇشەلەرى قوسىلدى.

كۇن تارتىبىنە سايكەس شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ، سونداي-اق 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا «اق جول» قازاقستاننىڭ دەموكراتيالىق پارتياسى» قوعامدىق بىرلەستىگىنىڭ پارتيالىق ءتىزىمىن تىركەۋ ماسەلەلەرى قارالدى.

وتىرىستى اشقان ورتالىق سايلاۋ كوميسسياسىنىڭ توراعاسى نۇرلان ءابدىروۆ ەلىمىزدە شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ جۇمىستارىنىڭ جالعاسىپ جاتقاندىعىنا توقتالدى.

«سايلاۋ ناۋقانى اياسىندا سىرتقى ىستەر مينيسترلىگىنىڭ ۇسىنۋى بويىنشا شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ جۇمىستارى جالعاسۋدا. بۇل ءراسىم قۇرىلتاي سايلاۋىن دايىنداۋ مەن وتكىزۋدىڭ نەگىزگى ءىس-شارالارىنىڭ كۇنتىزبەلىك جوسپارىنا سايكەس 17 تامىز كۇنى ساعات 18:00-دە اياقتالادى», - دەپ اتاپ ءوتتى نۇرلان ءابدىروۆ.

ورتالىق سايلاۋ كوميسسياسى توراعاسىنىڭ ورىنباسارى مۇحتار ەرمان 2026 جىلعى 1 شىلدەدەن باستاپ قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا حالىقارالىق بايقاۋ ينستيتۋتى اشىلعان ساتتەن بەرى ورتالىق سايلاۋ كوميسسياسى 4 شەت مەملەكەتتەن جانە 3 حالىقارالىق ۇيىمنان كەلگەن 60 بايقاۋشىنى اككرەديتتەگەنىن اتادى.

«2026 جىلعى 17 شىلدەدەگى جاعداي بويىنشا سىرتقى ىستەر مينيسترلىگى ورتالىق سايلاۋ كوميسسياسىنا 4 شەت مەملەكەتتەن جانە 3 حالىقارالىق ۇيىمنان 16 بايقاۋشىنىڭ كانديداتۋراسىن اككرەديتتەۋ ءۇشىن ۇسىندى. اتاپ ايتقاندا، ەقىۇ پارلامەنتتىك اسسامبلەياسىنان - 1 كانديداتۋرا، ۇقشۇ پارلامەنتتىك اسسامبلەياسىنان اسسامبلەيانىڭ جاۋاپتى حاتشىسىن قوسا العاندا - 6 كانديداتۋرا، ەقىۇ دياقب ميسسياسىنان - 1 بايقاۋشى، گرۋزيادان - 2 كانديداتۋرا، ونىڭ ىشىندە گرۋزيا ورتالىق سايلاۋ كوميسسياسىنىڭ توراعاسى، يران يسلام رەسپۋبليكاسىنان - 2 كانديداتۋرا، ونىڭ ىشىندە يراننىڭ قازاقستانداعى ەلشىسى، شۆەتسيا كورولدىگىنەن - 2 كانديداتۋرا، ونىڭ ىشىندە شۆەتسيانىڭ قازاقستانداعى ەلشىسى جانە قىرعىز رەسپۋبليكاسىنان - 2 بايقاۋشى ۇسىنىلدى», - دەپ حابارلادى مۇحتار ەرمان.

سونداي-اق ول اككرەديتتەۋ جونىندەگى ۇسىنىستاردىڭ كەلىپ تۇسۋىنە قاراي بايقاۋشىلار تۋرالى مالىمەتتەر جاڭارتىلىپ وتىراتىنىن اتاپ ءوتتى. ماسەلەنى قاراۋ قورىتىندىسى بويىنشا ورتالىق سايلاۋ كوميسسياسىنىڭ مۇشەلەرى شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ تۋرالى قاۋلى قابىلدادى.

كۇن تارتىبىندەگى ەكىنشى ماسەلە بويىنشا بايانداما جاساعان ورتالىق سايلاۋ كوميسسياسىنىڭ مۇشەسى ءلاززات سۇيىندىك قۇرىلتاي دەپۋتاتى بولىپ سايلانۋ ءۇشىن ازامات قازاقستان رەسپۋبليكاسىنىڭ كونستيتۋتسياسىندا جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭدا بەلگىلەنگەن تالاپتارعا ساي بولۋى قاجەت ەكەندىگىنە توقتالىپ ءوتتى. اتاپ ايتقاندا، ازامات قازاقستان رەسپۋبليكاسىنىڭ ازاماتى بولۋى، سوڭعى 10 جىل بويى قازاقستان رەسپۋبليكاسىنىڭ اۋماعىندا تۇراقتى تۇرۋى جانە جاسى 25-تەن كەم بولماۋى ءتيىس. سونىمەن قاتار سوت ارەكەتكە قابىلەتسىز دەپ تانىعان، سوت ۇكىمىمەن باس بوستاندىعىنان ايىرۋ ورىندارىندا جازاسىن وتەپ جۇرگەن، سوتتالعاندىعى زاڭدا بەلگىلەنگەن تارتىپپەن جويىلماعان نەمەسە الىنباعان ازاماتتار، سىبايلاس جەمقورلىق قىلمىس نەمەسە سىبايلاس جەمقورلىق قۇقىق بۇزۋشىلىق جاساۋعا قاتىستى كىناسىن سوت زاڭدا بەلگىلەنگەن تارتىپپەن تانىعان قازاقستان رەسپۋبليكاسى ازاماتتارىنىڭ سايلانۋعا قۇقىعى جوق.

«ورتالىق سايلاۋ كوميسسياسىنا «اق جول» قازاقستاننىڭ دەموكراتيالىق پارتياسى 63 ادامنان تۇراتىن پارتيالىق ءتىزىمىن ۇسىندى. ورتالىق سايلاۋ كوميسسياسى جىبەرگەن ساۋالعا سايكەس ۋاكىلەتتى مەملەكەتتىك ورگاندار پارتيالىق تىزىمگە ەنگىزىلگەن ادامداردىڭ قۇرىلتاي دەپۋتاتى بولىپ سايلانۋ ءۇشىن كونستيتۋتسيا مەن سايلاۋ تۋرالى كونستيتۋتسيالىق زاڭنىڭ تالاپتارىنا سايكەستىگىنە تەكسەرۋ جۇرگىزدى. پارتيالىق تىزىمدەگى 22 كانديدات - ايەلدەر، جاستار جانە مۇگەدەكتىگى بار ادامدار بولىپ تابىلادى، ولار جالپى ءتىزىمنىڭ 34,9 پروتسەنتىن قۇرايدى. بەلگىلەنگەن كۆوتا ساقتالدى. پارتيالىق تىزىمگە ەنگىزىلگەن بارلىق ادامدار كونستيتۋتسيا مەن سايلاۋ تۋرالى كونستيتۋتسيالىق زاڭنىڭ تالاپتارىنا سايكەس كەلەدى» - دەدى ءلاززات سۇيىندىك.

«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 88-بابىنىڭ 2-تارماعىنا سايكەس، جوعارى وكىلدى ورگان دەپۋتاتتارىنىڭ الدىڭعى سايلاۋىندا داۋىس بەرۋگە قاتىسقان سايلاۋشىلاردىڭ 5 جانە ودان دا كوپ پايىز داۋىسىن العان ساياسي پارتيالار اعىمداعى سايلاۋ ناۋقانى بارىسىندا سايلاۋ جارناسىن تولەمەيدى. وسىعان وراي، ءلاززات سۇيىندىك «اق جول» قازاقستاننىڭ دەموكراتيالىق پارتياسى قازاقستان رەسپۋبليكاسى پارلامەنتى ءماجىلىسىنىڭ VIII سايلانىم دەپۋتاتتارىن سايلاۋدا سايلاۋشىلاردىڭ 8,41 پايىز داۋىسىن العانىن ەسكە سالدى.

وتىرىس سوڭىندا ورتالىق سايلاۋ كوميسسياسىنىڭ مۇشەلەرى حاتتامالارعا قول قويىپ، 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا «اق جول» قازاقستاننىڭ دەموكراتيالىق پارتياسىنىڭ پارتيالىق ءتىزىمىن تىركەۋ تۋرالى قاۋلى قابىلدادى. تىركەلگەن كانديداتتارعا ءتيىستى كۋالىكتەر تابىستالدى.

وتىرىس قورىتىندىسى بويىنشا پارتيا باسشىلىعى ءداستۇرلى بريفينگ بارىسىندا بۇقارالىق اقپارات قۇرالدارى وكىلدەرىنىڭ سۇراقتارىنا جاۋاپ بەردى.

Abai.kz