نۇربول نازارباەۆ سوتتى ءوزىنىڭ تولەمگە قابىلەتسىزدىگىنە تاعى دا سەندىرە المادى.

الماتى وبلىستىق سوتىنىڭ اپەللياتسيالىق القاسى ءبىرىنشى ينستانتسيا شەشىمىن وزگەرىسسىز قالدىرىپ، قازاقستاننىڭ بۇرىنعى پرەزيدەنتىنىڭ جيەنىنە تولەم قابىلەتتىلىگىن قالپىنا كەلتىرۋ پروتسەدۋراسىن قولدانۋدان باس تارتتى.

باي ما، كەدەي مە؟

بۇعان دەيىن نازارباەۆتىڭ ءوزىنىڭ اۋىر قارجىلىق جاعدايىن سوت ارقىلى دالەلدەۋگە بىرنەشە رەت تىرىسقانى، بىراق ءار كەز باس تارتۋ العانى حابارلانعان ەدى. ەندى بۇل ۇستانىمدى اپەللياتسيالىق ينستانتسيا سوتى دا راستادى.

فورمالدى تۇردە نۇربول نازارباەۆ ءوزىن بانكروت دەپ تانۋدى ەمەس، تولەم قابىلەتتىلىگىن قالپىنا كەلتىرۋ پروتسەدۋراسىن قولدانۋدى سۇراعان. بۇل مەحانيزم قارىزداردى بەس جىلعا دەيىنگى مەرزىمگە ءبولىپ تولەۋگە جانە رەسمي بانكروتتىقتىڭ سالدارىنان — نەسيە الۋعا قويىلاتىن شەكتەۋلەردەن، قارجىلىق مونيتورينگتەن جانە زاڭدا قاراستىرىلعان باسقا دا شارالاردان جالتارۋعا مۇمكىندىك بەرەدى.

ورتادا — شامامەن 58 ملرد تەڭگە. ونىڭ ىشىندە:

• 55,9 ملرد تەڭگە — اكتيۆتەردى قايتارۋ كوميتەتى الدىنداعى بورىش;

• شامامەن 352 ملن تەڭگە — ءوسىمپۇل (نەۋستويكا);

• 1,69 ملرد تەڭگە — مەملەكەتتىك باج;

• 19,4 ملن تەڭگە — بانكروتتىق الدىندا تۇرعان «اقتوبە» وندىرىستىك كومپانياسى» جشس الدىنداعى بەرەشەك.

سوت: كەدەيلىگى تۋرالى مالىمەت جوق

تولەمگە قابىلەتسىزدىگى تۋرالى وتىنىشكە قاراماستان، سوت جەڭىلدەتىلگەن پروتسەدۋرانى قولدانۋعا جەتكىلىكتى نەگىز تاپپادى. قاۋلىدا نازارباەۆتىڭ ءوزىنىڭ قارجىلىق احۋالى تۋرالى تولىق مالىمەت ۇسىنباعانى ايتىلعان: كوممەرتسيالىق جىلجىمايتىن مۇلىكتى جالعا بەرۋدەن تۇسەتىن تابىستار، بانكتىك سالىمدار، ديۆيدەندتەر تۋرالى، سونداي-اق شىعىستار تۋرالى دەرەكتەر بولماعان.

القا مۇنداي اقپاراتسىز ونىڭ شىنايى قارجىلىق جاعدايىن وبەكتيۆتى باعالاۋ جانە ونىڭ ءوز مىندەتتەمەلەرىن ورىنداۋعا شىنىمەن قاۋقارسىز ەكەنىن ءتۇسىنۋ مۇمكىن ەمەس ەكەنىن كورسەتتى.

بۇدان بولەك، سوت ءوتىنىش بەرۋشىنى تولەمگە قابىلەتسىز دەپ تانىعان قارجىلىق باسقارۋشىنىڭ قورىتىندىسىنا دا سىن كوزبەن قارادى. القانىڭ پىكىرىنشە، قۇجات بورىشكەردىڭ مۇلىكتىك جانە وتباسىلىق جاعدايىنا جان-جاقتى تالداۋ جاسالماي قۇراستىرىلعان.

«بۇل — شەشىمنىڭ ورىندالۋىن سوزبالاڭعا سالۋ ارەكەتى»

باس پروكۋراتۋرانىڭ اكتيۆتەردى قايتارۋ جونىندەگى قىزمەتى بۇدان دا قاتاڭ ۇستانىم ءبىلدىردى. ۆەدومستۆو وكىلدەرى نازارباەۆتىڭ سوتقا ۇقساس تالاپپەن قايتا جۇگىنۋىن جاعدايدى رەتتەۋدىڭ جاڭا ارەكەتى رەتىندە باعالاۋعا بولمايتىنىن مالىمدەدى. پروكۋراتۋرانىڭ پىكىرىنشە، بورىشكەر زاڭدا قاراستىرىلعان مەحانيزمدەردى اكتيۆتەردى مەملەكەت كىرىسىنە ءوندىرىپ الۋ تۋرالى زاڭدى كۇشىنە ەنگەن سوت شەشىمىنىڭ ورىندالۋىن شەگەرە تۇرۋ ءۇشىن عانا پايدالانىپ وتىر. سوت ءدال وسى ءۋاجدى دە ەسكەردى.

كەدەيلىگىن دالەلدەۋگە تىرىسقان باي ادام

بۇل وقيعا نۇربول نازارباەۆتىڭ بيزنەس-قۇرىلىمدارىمەن بۇعان دەيىن بايلانىستى بولعان اكتيۆتەر فونىندا وتە كونتراستتى كورىنەدى. بۇرىن ول Forbes Kazakhstan نۇسقاسى بويىنشا قازاقستاننىڭ ەڭ داۋلەتتى بيزنەسمەندەرىنىڭ قاتارىنا كىرگەن، ال سوت تالقىلاۋىنىڭ ماتەريالدارىندا وعان نەمەسە ونىمەن بايلانىستى كومپانيالارعا تيەسىلى كوممەرتسيالىق جىلجىمايتىن مۇلىكتەر، جەر تەلىمدەرى، وندىرىستىك كاسىپورىندار جانە باسقا دا اكتيۆتەر اتالادى.

بۇگىنگى تاڭدا نازارباەۆتىڭ شوتتارى بۇعاتتالعان، مۇلكىنە اۋىرتپالىق سالىنعان، ال وزىنە قازاقستاننان تىس جەرلەرگە شىعۋعا تىيىم سالىنعان.

اپەللياتسيالىق القا ءبىرىنشى ينستانتسيا سوتىنىڭ شەشىمىن وزگەرىسسىز قالدىردى. قاۋلى زاڭدى كۇشىنە ەندى جانە ودان ءارى كاسساتسيالىق تارتىپپەن شاعىمدانۋعا جاتپايدى.

Abai.kz