ادام ءومىرى – تابيعاتتىڭ بىرەگەي سىيى ءارى الەمدەگى ەشبىر دۇنيەمەن ولشەنبەيتىن ەڭ جوعارى قۇندىلىق. بۇل مەملەكەتپەن دە، قوعاممەن دە، زاڭمەن دە، دىنمەن دە مويىندالعان شىندىق.

ارينە، بۇل بارشامىزعا ورتاق، تۇسىنىكتى وي. بىراق، كۇنى كەشە «حابار» ارناسى تۇسىرگەن «4739» دەرەكتى ءفيلمىن كورىپ وتىرىپ، وسى اقيقاتتىڭ قانشالىقتى تەرەڭ، قاشنالىقتى ماڭىزدى ەكەنىنە تاعى ءبىر رەت كوز جەتكىزگەندەيمىن.

ءسوز جوق، بۇل فيلم ءبىزدىڭ ادام ءومىرىن ساقتاۋداعى تەحنولوگيالىق مۇمكىندىكتەرگە عانا ەمەس، ەڭ الدىمەن ءار ادامعا ءتان ءۇمىت پەن ومىرگە قۇشتارلىق، جۇرەك جىلاتار وكىنىش پەن قۋانىش، رۋحاني كۇرەس سياقتى ۇلكەن سەزىمدەرگە كوزىمىزدى قايتا اشقانداي.

ءيا، وسى كۇنى ەلىمىزدە 4739 ادام ترانسپلانتاتسيا كەزەگىندە تۇر. بۇل دەگەنىڭىز 4739 ۇكىلى ءۇمىت، ەلجىرەگەن جۇرەك، جالتاقتاعان جانار. ولاردىڭ اراسىندا 125 بالا بار.

قازاقستاندا ترانسپلانتاتسيالاردىڭ شامامەن 90 پايىزى ءتىرى تۋىستىق دونورلاردىڭ قاتىسۋىمەن جاسالادى. ال قايتىس بولعاننان كەيىنگى دونورلىقتىڭ ۇلەسى 10 پايىزعا دا جەتپەيدى.

ارينە، دونور بولۋ نەمەسە بولماۋ – ءار ادامنىڭ جەكە تاڭداۋى. بۇل – وتە نازىك ءارى كۇردەلى ماسەلە. مۇنداي شەشىمگە ەشكىمدى ماجبۇرلەۋگە بولمايدى.

مەنىڭشە، بۇل تاقىرىپتا ەڭ ماڭىزدىسى – ەكى تاراپتىڭ دا جاعدايىن تۇسىنە ءبىلۋ. ءبىر جاعىندا – اعزا كۇتىپ، ومىردەن ءۇمىتىن ۇزبەي جۇرگەن ادامدار بولسا، ەكىنشى جاعىندا – ەڭ جاقىن ادامىنان ايىرىلىپ، ورنى تولماس قايعىنى باستان كەشىپ جاتقان وتباسى تۇر.

سوندىقتان وسى ەكى جاعدايدىڭ اراسىنداعى نازىك شەكارا ءاردايىم ساقتالۋى كەرەك. بۇل جەردە ەشقانداي قىسىم دا، ايىپتاۋ دا بولماۋى ءتيىس. تەك ءار ادامنىڭ تاڭداۋى مەن ءار وتباسىنىڭ شەشىمىنە دەگەن قۇرمەت بولۋى قاجەت.

ال ەندى مەنىڭ ءوز باسىما كەلسەم… كۇندەردىڭ كۇنىندە جاقىندارىمنىڭ الدىنا ءدال وسىنداي تاڭداۋ تۇرسا، وندا، ءسوز جوق، ومىرگە قايتا ورالعىسى كەلەتىن ادامدارعا كومەكتەسۋدىڭ ماڭىزىن تۇسىنگەنىن قالار ەدىم. مەن اعزالارىمدى دونورلىققا بەرۋگە كەلىسىم بەرەتىنىمدى جاۋاپكەرشىلىكپەن اتاپ وتكىم كەلەدى.

سەبەبى ءبىر ادامنىڭ شەشىمى باسقا ءبىر ادامعا ءومىر سۇرۋگە مۇمكىندىك بەرۋى مۇمكىن.

سوندىقتان ءبىز بۇل تاقىرىپتىقورقىنىشپەن ەمەس، تۇسىنىستىكپەن، جاۋاپكەرشىلىكپەن جانە ادام ومىرىنە دەگەن قۇرمەتپەن تالقىلاۋىمىز كەرەك دەپ ويلايمىن.

ويتكەنى ادام ومىرىنەن قىمبات ەشتەڭە جوق. ال ونى ساقتاپ قالۋعا باعىتتالعان ءاربىر ىزگى قادامنىڭ ماڭىزى زور.

ترانسپلانتاتسياعا مۇقتاج ءار ادامنىڭ ارتىندا ومىرگە دەگەن ۇلكەن ءۇمىت تۇر. سول ءۇمىتتى ۇزبەۋ – بارشامىزعا ورتاق ادامگەرشىلىك مىندەت دەپ ويلايمىن.

دەرەكتى ءفيلمدى 24 شىلدە كۇنى ساعات 19:30-دا 24KZ تەلەارناسىنان كورۋگە بولادى.

Abai.kz