ەلىمىزدە ءوتىپ جاتقان قۇرىلتاي سايلاۋىن حالىقارالىق بايقاۋشىلار دا باقىلاپ ءجۇر. البانيا ورتالىق سايلاۋ كوميسسياسىنىڭ وكىلى ەۋگەن دۋشاللاري استاناداعى بىرنەشە سايلاۋ ۋچاسكەسىن ارالاپ، داۋىس بەرۋدىڭ ۇيىمداستىرىلۋىنا وڭ باعا بەردى. ول سايلاۋشىلار ءۇشىن قاجەتتى جاعداي جاسالىپ، ۇدەرىس ءوز رەتىمەن ءجۇرىپ جاتقانىن جەتكىزدى.

ارناۋلى دەلەگاتسيا استاناداعى №128 سايلاۋ ۋچاسكەسىنە بارىپ كوردى. بىرنەشە ۋچاسكەدەگى جاعدايدى سالىستىرا ساراپتاعان حالىقارالىق وكىل داۋىس بەرۋ ءراسىمىنىڭ جيناقى ءارى جۇيەلى ۇيىمداستىرىلعانىن تىلگە تيەك ەتتى.

«كوزىمىزگە وتتاي باسىلعانى – مۇندا ءاربىر داۋىس بەرۋشىگە جاعىمدى ءارى جايلى جاعداي جاسالعاندىعى. ۇيىمداستىرۋشىلار جىلى قاباقپەن قارسى الىپ، باعىت-باعدار كورسەتىپ جاتىر. كەلۋشىلەر قاراسى مول. ازىرگە زاڭعا قيعاش جايتتاردى بايقاعان جوقپىز. ءبارى ءوز رەتىمەن ءوتىپ جاتىر»، – دەدى ەۋگەن دۋشاللاري.

البانيالىق باقىلاۋشى ەلىمىزدەگى ساياسي وزگەرىستەرگە دە توقتالدى. «قازاقستان قوس پالاتالى پارلامەنتتەن ءبىر پالاتالى قۇرىلتايعا كوشكەلى جاتىر. راسىندا، بۇل الەمدىك تاجىريبەدە بار جانە ناتيجەلى ءۇردىس»، – دەدى ارناۋلى وكىل.

بۇدان بولەك البانيالىق مەيمان استانا قالاسى تۋرالى اسەرىن دە جاسىرمادى. ەلوردانىڭ ەڭسەلى عيماراتتارى مەن كەڭ كوشەلەرى جانعا جايلىلىق سىيلايتىنىن اتاپ ءوتتى. سايلاۋ كۇنى جاڭبىرلى بولعانىمەن، ادامداردىڭ مەرەكەلىك كوڭىل كۇيدە جۇرگەنىن جىلى جىميىپ جەتكىزدى.

Abai.kz