جەتىسۋ وبلىسىنىڭ ورتالىعى – تالدىقورعاندا قالانىڭ سىرتقى كەلبەتىن جانە كوشەلەردىڭ ەستەتيكالىق كورىنىسىن جاقسارتۋ باعىتىنداعى جوبالار جۇزەگە اسىرىلۋدا. اتاپ ايتقاندا، بيىل جانسۇگىروۆ كوشەسى بويىنداعى 24 كوپ قاباتتى تۇرعىن ءۇيدىڭ قاسبەتىن جانە 33 تۇرعىن ءۇيدىڭ شاتىرىن جوندەۋ جوسپارلانعان. اباتتاندىرۋ جۇمىستارىنىڭ بارىسىمەن جۇمىس ساپارى اياسىندا جەتىسۋ وبلىسىنىڭ اكىمى بەيبىت يساباەۆ تانىستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

سوڭعى جىلدارى ءوڭىر باسشىسىنىڭ تاپسىرماسىنا سايكەس تالدىقورعان قالاسىنداعى تۇرعىن ءۇي قورىنىڭ سىرتقى كەلبەتىن جاقسارتۋعا باعىتتالعان جۇيەلى جۇمىستار جۇرگىزىلۋدە. ەڭ الدىمەن بۇل قالانىڭ ەسكى شاعىن اۋداندارىن قامتىدى. اتاپ وتسەك، وبلىس قۇرىلعاننان بەرى 80 كوپ قاباتتى تۇرعىن ءۇيدىڭ شاتىرى جانە 30 تۇرعىن ءۇيدىڭ قاسبەتى جاڭارتىلدى. سونىمەن قاتار قالانىڭ ورتالىق كوشەلەرى، ونىڭ ىشىندە جانسۇگىروۆ كوشەسى دە قايتا جاڭعىرتۋدان ءوتتى.

جانسۇگىروۆ كوشەسىندەگى تۇرعىن ۇيلەردى ارالاۋ بارىسىندا بەيبىت يساباەۆ جۇرگىزىلىپ جاتقان جۇمىستاردىڭ ساپاسى مەن بەلگىلەنگەن مەرزىمدە اياقتالۋىنا ەرەكشە نازار اۋداردى. مەردىگەر ۇيىمنىڭ اتقارۋشى ديرەكتورى قايرات يمانعابىلوۆتىڭ ايتۋىنشا، كومپانيا التى كوپ قاباتتى تۇرعىن ءۇيدىڭ قاسبەتىن جوندەۋدى جۇزەگە اسىرۋدا. قازىرگى تاڭدا نىسانداردا جوسپارلانعان جۇمىستاردىڭ 40–60% ورىندالعان. ال تۇرعىن ۇيلەردىڭ شاتىرلارىن جاڭارتۋمەن اينالىسىپ جاتقان مەردىگەر ۇيىمنىڭ وكىلى ساقتاسىن نوكەربەكوۆ وسى كوشەدەگى ءتورت تۇرعىن ءۇيدىڭ شاتىرىن جوندەۋ جۇمىستارىنىڭ بارىسى تۋرالى باياندادى.

سونىمەن قاتار وبلىس اكىمى قايتا جاڭعىرتىلىپ جاتقان تۇرعىن ۇيلەردىڭ ءبىرىنشى قاباتىندا ورنالاسقان كاسىپكەرلىك نىساندارىنىڭ يەلەرى ءوز نىساندارىن بىرىڭعاي ديزاين-كود تالاپتارىنا سايكەس راسىمدەۋى قاجەت ەكەنىن اتاپ ءوتتى. وسىعان بايلانىستى تالدىقورعان قالاسى اكىمدىگى تاراپىنان كاسىپكەرلەر اراسىندا ءتيىستى ءتۇسىندىرۋ جۇمىستارى جۇرگىزىلۋدە.

نىسانداردى ارالاۋ بارىسىندا جانسۇگىروۆ كوشەسىندەگى №80/84 ءۇيدىڭ تۇرعىندارى وبلىس اكىمىنە جولىقتى.

- ۇيىمىزگە 55 جىل ىشىندە العاش رەت وسىنداي اۋقىمدى جوندەۋ جۇرگىزىلىپ جاتىر. بريگادا ءوز جۇمىسىن ساپالى اتقارىپ جاتقانىن كورىپ وتىرمىز،  قۇرىلىس ماتەريالدارى دا ۋاقىتىلى جەتكىزىلۋدە. ءبىزدىڭ ماسەلەمىزگە كوڭىل ءبولىپ، قولداۋ كورسەتكەندەرىڭىز ءۇشىن العىسىمىزدى بىلدىرەمىز، – دەدى وسى ءۇيدىڭ تۇرعىنى ۆلاديمير بوريسوۆ. اتاپ وتسەك، بۇل تۇرعىن ۇيگە جوندەۋ جۇرگىزۋ قجەتتىلىگى تۋرالى ماسەلە بۇعان دەيىن وبلىس اكىمىنىڭ حالىقپەن كەزدەسۋىندە كوتەرىلگەن بولاتىن.

سونداي-اق بەيبىت يساباەۆ جانسۇگىروۆ كوشەسىندەگى ماگيسترالدى جىلۋ جەلىلەرىن قايتا جاڭعىرتۋ جۇمىستارىنىڭ بارىسىن دا تەكسەردى. ءوڭىر باسشىسى قۇبىر تارتۋ جۇمىستارىنىڭ قارقىنىن باعالاپ، جول جابىندىسىن قالپىنا كەلتىرۋ مەرزىمىنە ەرەكشە نازار اۋداردى.

جوبا اياسىندا جالپى ۇزىندىعى 3,5 شاقىرىم بولاتىن ماگيسترالدى جىلۋ جەلىلەرىن اۋىستىرۋ كوزدەلگەن. قايتا جاڭعىرتۋ جۇمىستارى ەكى كەزەڭگە بولىنگەن. ءبىرىنشى كەزەڭدە گاگارين كوشەسىنەن شەۆچەنكو كوشەسىنە دەيىنگى ۋچاسكەدە قۇبىرلاردى توسەۋ جۇمىستارى تولىق اياقتالدى. ال ەكىنشى كەزەڭ شەۆچەنكو كوشەسىنەن №3 سورعى ستانتسياسىنا دەيىنگى ارالىقتى قامتيدى. قۇبىرلار توسەۋ جانە گيدراۆليكالىق سىناقتار اياقتالعاننان كەيىن جولدىڭ اسفالت جابىنى تولىق قالپىنا كەلتىرىلەدى. جىلىتۋ ماۋسىمى باستالعانعا دەيىن نىسان تولىق پايدالانۋعا بەرىلۋى ءتيىس.

وبلىس اكىمى قازىرگى تاڭدا قالادا جىلۋمەن جابدىقتاۋ جۇيەسىن كەزەڭ-كەزەڭىمەن تابيعي گازعا كوشىرۋ جۇمىستارى جۇرگىزىلىپ جاتقانىن اتاپ ءوتتى. وسى ماقساتتا بولاشاقتا نەگىزگى جۇكتەمەنى كوتەرەتىن گاز تۋربينالى ستانتسيا سالىنىپ جاتىر. سونىمەن قاتار «باسقۋات» كومىر قازاندىعى رەزەرۆتىك جىلۋ كوزى رەتىندە ساقتالادى. قابىلدانىپ جاتقان بۇل شارالار وڭىردەگى ەكولوگيالىق احۋالدى جاقسارتۋعا دا وڭ اسەرىن تيگىزەدى.

- بۇگىنگى كۇنى اتقارىلىپ جاتقان جۇمىستار اياقتالعاننان كەيىن جانسۇگىروۆ كوشەسى زامان تالابىنا ساي جاڭا كەلبەتكە يە بولادى. جىلۋ جەلىلەرىن جاڭعىرتۋمەن قاتار كوپ قاباتتى تۇرعىن ۇيلەردىڭ قاسبەتتەرى مەن شاتىرلارىن جوندەپ جاتىرمىز. ودان كەيىن جول جابىنى تولىق قالپىنا كەلتىرىلەدى. وسىلايشا، جۇيەلى قاراستىرۋدىڭ ارقاسىندا بيىل جانسۇگىروۆ كوشەسىنە قاتىستى بارلىق جۇمىستاردى اياقتايمىز. ال كەلەسى جىلى بۇل جۇمىستار قالانىڭ باسقا دا بولىكتەرىندە جالعاسادى، – دەدى بەيبىت يساباەۆ.

بۇل رەتتە جەتىسۋ وبلىسى «ەنەرگەتيكا جانە كوممۋنالدىق سەكتوردى جاڭعىرتۋ» ۇلتتىق جوباسىن ىسكە اسىرۋ، سونىڭ ىشىندە 2026–2027 جىلدارعا ارنالعان جوبالار پۋلىن قالىپتاستىرۋ بويىنشا كوشباسشى وڭىرلەردىڭ قاتارىندا ەكەنىن اتاپ وتۋگە بولادى. جالپى العاندا، الداعى ەكى جىلدا وڭىردە ۇلتتىق جوبانى جۇزەگە اسىرۋعا شامامەن 79 ملرد تەڭگە ينۆەستيتسيا تارتۋ جوسپارلانعان. وسى قاراجات ەسەبىنەن ەكى جىل ىشىندە 1 156,2 شاقىرىم ينجەنەرلىك جەلى جوندەلىپ، جاڭعىرتىلادى، سونداي-اق 83,6 مىڭ ەسەپكە الۋ قۇرالى ورناتىلادى. سونىڭ ناتيجەسىندە وڭىردەگى ينجەنەرلىك ينفراقۇرىلىمنىڭ ورتاشا توزۋ دەڭگەيى 19 % تومەندەيدى دەپ كۇتىلۋدە.

Abai.kz