مەدەۋ اۋدانىندا حاكىمنىڭ رۋحاني مۇراسىن ۇلىقتاۋعا ارنالعان «ابايعا تاعزىم» اتتى ءىس-شارا ءوتتى. اباي ەسكەرتكىشى جانىندا ۇيىمداستىرىلعان ءىس-شارا اقىننىڭ باي شىعارماشىلىق مۇراسىن دارىپتەپ، وسكەلەڭ ۇرپاقتىڭ ۇلتتىق قۇندىلىقتارعا دەگەن قۇرمەتىن ارتتىرۋ، سونداي-اق جاستاردى بىلىمگە، ادامگەرشىلىككە جانە وتانسۇيگىشتىككە باۋلۋدى ماقسات ەتەكەن.

جيىن بارىسىندا اباي ەسكەرتكىشىنە گۇل شوقتارى قويىلىپ، ۇلى اقىن رۋحىنا ءبىر مينۋت ۇنسىزدىكپەن تاعزىم ەتىلدى. گۇل قويۋ راسىمىنە مەدەۋ اۋدانى اكىمىنىڭ ورىنباسارى ايدوس نۇرلىباەۆ، اۋداندىق ارداگەرلەر كەڭەسىنىڭ توراعاسى الماس تىلەۋباەۆ، مەدەۋ اۋداندىق ءبىلىم ءبولىمىنىڭ باسشىسى اقنۇر نۇراليەۆا جانە اۋدان مەكتەپتەرىنىڭ وكىلدەرى قاتىستى.

مەرەكەلىك باعدارلامادا اباي شىعارمالارى كەڭىنەن ناسيحاتتالدى. وپەرا انشىلەرى «جەلسىز تۇندە جارىق اي» ءانىن شىرقاسا، جاس دارىندار اقىننىڭ بەينەسىن بايىپتار، تابيعاتى تانىتار ونەر ورنەگى – تەاترلاندىرىلعان كورىنىس ۇسىندى. مەدەۋ اۋدانىنداعى مەكتەپتەردە ءبىلىم الىپ جاتقان 8–9-سىنىپ وقۋشىلارى ابايدىڭ ولەڭدەرى مەن قارا سوزدەرىن مانەرلەپ وقىدى. جيىنعا جينالعان كوپشىلىك اراسىنان اباي مۇراسىنا ىقىلاستى وقىرماندارمەن قاتار، شەتەلدىك تۋريستەر دە تابىلدى. ولار اباي ونەگەسى جايلى سۇراق سۇراپ، شىعارماشىلىعىنا قىزىعۋشىلىق تانىتىپ جاتتى.

ابايدىڭ «كوزىمنىڭ قاراسى» ءانىن 250 وقۋشىنىڭ بىرگە شىرقاۋى ءىس-شارانىڭ ەڭ اسەرلى ءساتى بولدى. №5 وقۋشىلار ءۇيىنىڭ ديرەكتورى سايراگۇل شاعاتاەۆا مۇنداي ءىس-شارالاردىڭ ماڭىزى ايرىقشا ەكەنىن ايتتى:

–  ەڭ ماڭىزدىسى – بالالاردىڭ ابايدى تەك اقىن رەتىندە تانىپ قانا قويماي، ونىڭ «تالاپ، ەڭبەك، تەرەڭ وي، قاناعات، راقىم» سەكىلدى قۇندىلىقتارىن بويىنا ءسىڭىرۋى. تەحنولوگيا مەن ءبىلىم وتە جىلدام دامىپ جاتقان كەزدە، ابايدىڭ بىلىمگە ۇمتىلۋ، ەڭبەك ەتۋ، ادام بولىپ قالىپتاسۋ تۋرالى ويلارىنىڭ ماڭىزى ءتىپتى ارتا تۇسۋدە، – دەدى سايراگۇل سادىققىزى.

№172 مەكتەپتىڭ مۇعالىمى ءبىرجان قايراتۇلى اباي شىعارمالارىنداعى ادام ءومىرى مەن بولمىسىنا قاتىستى تەرەڭ ويلارعا توقتالىپ، اقىننىڭ ءسوزدى ورنىمەن قولدانىپ، ويىن شەشەن ءارى ناقتى جەتكىزە بىلگەنىن اتاپ ءوتتى. ونىڭ ايتۋىنشا، قازىرگى وقۋشىلاردىڭ اباي شىعارماشىلىعىنا قىزىعۋشىلىعى جوعارى، سوندىقتان بالالارعا الدىمەن تۇسىنىكتى تۋىندىلارىن ۇسىنىپ، جاسىنا قاراي كۇردەلى شىعارمالارىنا باعىتتاۋ – اقىن مۇراسىن تەرەڭ مەڭگەرتۋدىڭ ءتيىمدى جولى.

اباي كۇنىنە ورايلاستىرىلعان، مەرەكەلىك ءىس-شارالاردىڭ ءمان-ماڭىزى تەرەڭ. مەكتەپ ديرەكتورلارى، ۇستازدار، وقۋشىلار مەن قوعام بەلسەندىلەرى اباي اياسىندا ءبىر ارناعا توعىسىپ، رۋحاني قۇندىلىقتار قىرقاسىندا قاۋىشتى. مۇنداي ءىس-شاراعا الماتى قالاسىنداعى مەدەۋ اۋدانىنىڭ ءبىلىم ءبولىمى مەن №5 وقۋشىلار ءۇيى مۇرىندىق بولدى.

Abai.kz