اباي كۇنى سايلاۋالدى كۇن تارتىبىنە مادەني مۇرا مەن قوعامدىق بىرەگەيلىكتى قالىپتاستىراتىن قۇندىلىقتارعا قاتىستى جاڭا مازمۇن قوستى. سونىمەن قاتار پارتيالار تۇرعىندارمەن جانە كاسىپورىن ۇجىمدارىمەن كەزدەسىپ، ەكولوگيا، ءوندىرىستى دامىتۋ، ينفراقۇرىلىم، الەۋمەتتىك ماسەلەلەر مەن ەڭبەك جاعدايلارىن تالقىلادى.

«ادىلەت» پارتياسىنىڭ رەسپۋبليكالىق سايلاۋالدى شتابىنىڭ باسشىسى ايبەك دادەباي باستاعان توپ اباي وبلىسىنىڭ تۇرعىندارىمەن كەزدەستى. ساپار باعدارلاماسى سەمەيدەگى اباي قۇنانبايۇلىنىڭ ەسكەرتكىشىنە گۇل شوقتارىن قويۋدان باستالدى. تۇرعىندارمەن كەزدەسۋدە كانديداتتار تۇرعىن ءۇيدىڭ قولجەتىمدىلىگى، جەڭىلدەتىلگەن يپوتەكالىق نەسيە بەرۋدى دامىتۋ، مەديتسينالىق كومەكتىڭ ساپاسىن ارتتىرۋ، ازىق-تۇلىك يمپورتىنا تاۋەلدىلىكتى ازايتۋ، سونداي-اق قازاقستاندىقتاردى جاساندى ينتەللەكت تەحنولوگيالارىمەن جۇمىس ىستەۋگە دايىنداۋ ماسەلەلەرىن تالقىلادى. ءوز كەزەگىندە وبلىس تۇرعىندارى وڭىردەگى ەڭ وزەكتى ماسەلەلەردى، اتاپ ايتقاندا، جىلۋ جانە سۋ قۇبىرلارى جەلىلەرىنىڭ توزۋىن، سەمەي يادرولىق پوليگونىنداعى سىناقتاردان زارداپ شەككەن ازاماتتاردى الەۋمەتتىك قورعاۋ ماسەلەلەرىن، عىلىمدى دامىتۋ جانە ينفراقۇرىلىمدى جاڭعىرتۋ قاجەتتىگىن كوتەردى. كەزدەسۋ سوڭىندا پارتيانىڭ جاڭا مۇشەلەرىنە پارتيالىق بيلەتتەر تابىستالدى.

جالپىۇلتتىق سوتسيال-دەموكراتيالىق پارتيا استانادا «گەندەرلىك تەڭدىك – شىنايى دەموكراتيا» اتتى رەسپۋبليكالىق سايلاۋالدى فورۋمىن وتكىزدى. تالقىلاۋعا پارتيادان قۇرىلتاي دەپۋتاتتىعىنا كانديداتتار، گەندەرلىك ساياسات سالاسىنداعى ساراپشىلار، ۇەۇ وكىلدەرى جانە كوپبالالى انالار قاتىستى. پارتيا توراعاسى اسحات راحيمجانوۆ سايلاۋدا قولدانىلاتىن گەندەرلىك كۆوتا مەن ەرلەر مەن ايەلدەردىڭ ەڭبەكاقىسىنداعى ايىرماشىلىق تۋرالى ايتىپ، پارتيانىڭ تۇرمىستىق زورلىق-زومبىلىققا قارسى زاڭ جانە «PANA» پارتيالىق جوباسى بويىنشا جۇرگىزىپ جاتقان جۇمىسىنا توقتالدى.

«بايتاق» پارتياسى وسكەمەندە كانديدات الماز دجاكيشەۆتىڭ باستاماسىمەن سەنبىلىك وتكىزدى. قاتىسۋشىلار ەرتىس وزەنىنىڭ جاعالاۋى مەن كۋلەنوۆكا سۋ قورعاۋ ايماعىنان 140 قاپ قوقىس جينادى. الاكول مەملەكەتتىك تابيعي قورىعىندا تابيعاتتى قورعاۋ، بيوالۋانتۇرلىلىك جانە ەكولوگيالىق ءتۋريزمدى دامىتۋ ماسەلەلەرى بويىنشا دوڭگەلەك ۇستەل ءوتتى. اقتوبە وبلىسىندا كانديدات ايمان سەكسەنوۆا سارىجار اۋىلىنىڭ تۇرعىندارىمەن كەزدەستى. ال ماڭعىستاۋ وبلىسىندا پارتيا وكىلدەرى «قازاقستان تەمىر جولى» كاسىپورنىنىڭ قىزمەتكەرلەرىمەن كەزدەسىپ، ەڭبەك جاعدايى، ەڭبەكاقى جانە مەديتسينالىق قامتاماسىز ەتۋ ماسەلەلەرىن تالقىلادى.

قازاقستان حالىق پارتياسى بىرنەشە باعىت بويىنشا ءىس-شارالار وتكىزدى. كانديداتتار الىمبەك اعيباەۆ پەن ەۆگەني ميرونوۆ تەرەنكول اۋدانىنىڭ ورتالىق اۋداندىق اۋرۋحاناسىنىڭ ۇجىمىمەن كەزدەسىپ، مەديتسينا قىزمەتكەرلەرىنىڭ ەڭبەك جاعدايى مەن اۋىلدىق جەرلەردەگى مەديتسينالىق كومەكتىڭ قولجەتىمدىلىگىن تالقىلادى. ريددەردە پارتيا وكىلدەرى «فيرما ەتالون» جول-قۇرىلىس كاسىپورنىنىڭ ەڭبەك ۇجىمىمەن كەزدەستى. كۇننىڭ تاعى ءبىر ماڭىزدى وقيعاسى – پارتيانىڭ سايلاۋالدى باعدارلاماسىنداعى 19 مىندەتكە ارنالعان «حالىقتىق تراۆەرس» جوباسى اياسىندا قازاقستاندىق الپينيستەردىڭ ىلە الاتاۋىنداعى 19 شىڭعا كوتەرىلۋى بولدى.

«اۋىل» پارتياسى شىعىس قازاقستان وبلىسىنا جۇمىس ساپارىن ۇيىمداستىردى. وندا كاسىپورىن وكىلدەرىمەن، ەكولوگتارمەن، ۇەۇ جانە ەرەكشە قاجەتتىلىكتەرى بار بالالاردىڭ اتا-انالارىمەن كەزدەسۋلەر ءوتتى. ينفراقۇرىلىم، الەۋمەتتىك سالا، ەكولوگيالىق قاۋىپسىزدىك جانە اۋىل شارۋاشىلىعىن دامىتۋ ماسەلەلەرى تالقىلاندى. قۇرىلتاي دەپۋتاتتىعىنا كانديدات الماس مۇحامەتوۆ ازىق-تۇلىك قاۋىپسىزدىگىن قامتاماسىز ەتۋدەگى عىلىمي ورتانىڭ رولىنە ارنالعان دوڭگەلەك ۇستەلدە ءسوز سويلەدى.

«اق جول» باتىس جانە سولتۇستىك وڭىرلەردەگى سايلاۋالدى كەزدەسۋلەرىن جالعاستىردى. باتىس قازاقستان وبلىسىنىڭ قاراتوبە اۋدانىنان استاناعا ۆەلوسيپەدپەن كەلگەن مۇعالىم اسىلبەك ايبولاتوۆ اقتوبە، قوستاناي جانە اقمولا وبلىستارى ارقىلى ءجۇرىپ وتكەن. جول بويىندا ول ەلدى مەكەن تۇرعىندارىمەن كەزدەسىپ، ولاردىڭ ءوتىنىش-تىلەكتەرىن جيناپ، پارتيا باسشىلىعىنا تابىستادى. ساپار قورىتىندىسى بويىنشا اسىلبەك ايبولاتوۆ پارتيا قاتارىنا قابىلداندى. ماڭعىستاۋ وبلىسىندا بەينەۋ اۋداندىق ءماسليحاتىنىڭ دەپۋتاتى رايىمبەك تۇزەلوۆ باستاعان ۇگىت توبى سارعا اۋىلىنىڭ تۇرعىندارىمەن كەزدەستى.

«Respublica» پارتياسىنىڭ ايداربەك قوجانازاروۆ باستاعان رەسپۋبليكالىق ۇگىت توبى ماڭعىستاۋ وبلىسىنا باردى. اقتاۋدا كانديداتتار OPTIMUM جوبالاۋ ينستيتۋتىنا، «WEST HIM TECHNOLOGY» جشس وندىرىستىك تسەحىنا جانە ماڭعىستاۋ وڭىرلىك ەلەكتر جەلىلىك كومپانياسىنا بارىپ، بيزنەستى جانە وتاندىق ءوندىرىستى دامىتۋ ماسەلەلەرىن تالقىلادى. تالدىقورعاندا پارتيا شتابى «اجار» تىگىن فابريكاسىنىڭ قىزمەتكەرلەرىمەن جانە «الماتينسكيە كراسكي» جشس جۇمىسشىلارىمەن كەزدەستى. كەزدەسۋلەردە ەڭبەكاقى، ەڭبەك جاعدايى، يمپورتتىق شيكىزاتقا تاۋەلدىلىك جانە مەملەكەتتىك ساتىپ الۋلارعا قول جەتكىزۋ ماسەلەلەرى ءسوز بولدى.

Abai.kz