2026 جىلعى 12 تامىزداعى جاعداي بويىنشا، ەسەپتى اپتادا قازاقستاندا الەۋمەتتىك ماڭىزى بار ازىق-تۇلىك تاۋارلارىنىڭ بىرقاتارىنىڭ باعاسى تومەندەدى.

اپتا ىشىندە كارتوپتىڭ باعاسى (-4,2%), اق قاۋداندى قىرىققابات (-1,2%), الما (-1,1%), پياز بەن ءسابىز (-1%) ارزاندادى. سونداي-اق قاتتى جانە جارتىلاي قاتتى ىرىمشىكتىڭ باعاسى (-0,3%), مايلىلىعى 5-9% سۇزبە جانە تۇز (-0,2%), ءبىرىنشى سۇرىپتى بيداي ۇنى مەن قايماق (-0,1%) تومەندەدى.

ءبىرىنشى سۇرىپتى ۇننان پىسىرىلگەن بيداي نانى، روجكي، سۇيەكتى سيىر ەتى، سۇيەكسىز سيىر ەتى، جىلقى ەتى، مايلىلىعى 2,2%-دان 6%-عا دەيىنگى پاستەرلەنگەن، ۋلتراپاستەرلەنگەن جانە ستەريلدەنگەن ءسۇت، جۇمىرتقا جانە سارى مايدىڭ باعاسى ەسەپتى اپتادا وزگەرىسسىز قالدى.

وڭىرلىك بولىنىستە ەلىمىزدىڭ بىرقاتار قالاسىندا دەفلياتسيالىق ديناميكا بايقالدى. الەۋمەتتىك ماڭىزى بار ازىق-تۇلىك تاۋارلارىنىڭ جالپى باعاسى ءبىر اپتا ىشىندە تالدىقورعاندا (-0,7%), اقتاۋ مەن جەزقازعاندا (ارقايسىسى -0,4%), پەتروپاۆلدا (-0,3%), استانادا (-0,2%), قاراعاندى، قوستاناي، ورال، وسكەمەن جانە پاۆلودار قالالارىندا (-0,1%) تومەندەدى. الماتى، تۇركىستان، اقتوبە، سەمەي جانە تاراز قالالارىندا باعا الدىڭعى اپتا دەڭگەيىندە ساقتالدى.

رەسپۋبليكا بويىنشا كارتوپتىڭ ورتاشا باعاسى كيلوگرامىنا 259 تەڭگەنى قۇرادى، ال ەڭ تومەن باعا پاۆلوداردا تىركەلدى – كيلوگرامىنا 191 تەڭگە.

اق قاۋداندى قىرىققاباتتىڭ رەسپۋبليكا بويىنشا ورتاشا باعاسى كيلوگرامىنا 189 تەڭگە بولدى. ەڭ تومەن باعالار تۇركىستاندا – 142 تەڭگە، تارازدا – 152 تەڭگە دەڭگەيىندە تىركەلدى.

المانىڭ ورتاشا باعاسى كيلوگرامىنا 797 تەڭگەنى قۇرادى. ەڭ تومەن باعا شىمكەنتتە تىركەلدى – 639 تەڭگە.

ەت ونىمدەرىنىڭ ىشىندە رەسپۋبليكا بويىنشا سۇيەكتى سيىر ەتىنىڭ ورتاشا باعاسى كيلوگرامىنا 3 779 تەڭگەنى، تاۋىق ەتىنىڭ باعاسى 1 736 تەڭگەنى قۇرادى.

الەۋمەتتىك ماڭىزى بار ازىق-تۇلىك تاۋارلارى باعالارى يندەكسىنىڭ كورسەتكىشى اپتا سايىن ەسەپتەلەدى. باعالاردى باقىلاۋ بارلىق وبلىس ورتالىقتارىندا، رەسپۋبليكالىق ماڭىزى بار قالالاردا جانە استانادا جۇرگىزىلەدى. الەۋمەتتىك ماڭىزى بار ازىق-تۇلىك تاۋارلارى باعاسىنىڭ ديناميكاداعى وزگەرىستەرىن قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ سايتىنان جانە «تالداۋ» اقپاراتتىق-تالداۋ جۇيەسىنەن كورۋگە بولادى.

الەۋمەتتىك ماڭىزى بار ازىق-تۇلىك تاۋارلارىنىڭ تىزبەسى قازاقستان رەسپۋبليكاسى ساۋدا جانە ينتەگراتسيا ءمينيسترىنىڭ 2025 جىلعى 23 جەلتوقسانداعى №362-نق بۇيرىعىمەن بەكىتىلگەن جانە 31 اتاۋداعى ازىق-تۇلىك ونىمدەرىن قامتيدى.

Abai.kz