جاسوسپىرىمدەرىمىزدىڭ دزيۋدودان الەم چەمپيوناتىنداعى ناتيجەسى - شىن مانىندە تاريحي جەتىستىك. 18 جاسقا دەيىنگى سپورتشىلارىمىز 10 مەدال جەڭىپ الدى: 3 التىن، 3 كۇمىس جانە 4 قولا. قازاقستان بۇعان دەيىن مۇنداي ناتيجەگە قول جەتكىزگەن ەمەس. سونىمەن قاتار، ۇلدار قۇراماسى جالپى كوماندالىق ەسەپتە ءبىرىنشى ورىنعا، قىزدار قۇراماسى ەكىنشى ورىنعا يە بولدى. فاتيما سۋپىعاليەۆا جاسوسپىرىمدەر اراسىندا الەم چەمپيونى اتانعان تۇڭعىش قازاقستاندىق دزيۋدوشى قىز بولدى.

الايدا ءبىز ءۇشىن بۇدان دا ماڭىزدىسى - بۇل ناتيجە ۇلتتىق قۇرامالاردى دايارلاۋعا ەنگىزىلىپ جاتقان جاڭا ءتاسىلدىڭ تيىمدىلىگىن كورسەتەدى.

پاريج وليمپياداسىنان كەيىن ءبىز سپورتشىلاردى دايارلاۋ جۇيەسىنىڭ ءوزىن قايتا قاراۋعا كىرىستىك. فەدەراتسيالارمەن بىرلەسىپ، جاسوسپىرىمدەر، جاستار جانە ەرەسەكتەر اراسىنداعى ۇلتتىق قۇراما بىرىڭعاي ادىستەمە اياسىندا جۇمىس ىستەيتىن مودەلدى ەنگىزىپ جاتىرمىز. ياعني سپورتشى ءبىر جاس ساناتىنان ەكىنشىسىنە وتكەن كەزدە، دايىندىقتى مۇلدە باسقا جۇيە بويىنشا قايتا باستامايدى. مۇندا ساباقتاستىق، بىرىڭعاي تالاپتار، تالداۋ جانە سپورتشىنىڭ دامۋىنىڭ ناقتى تراەكتورياسى قالىپتاسقان.

دزيۋدودا بۇل جۇمىس قازاقستان دزيۋدو فەدەراتسياسىمەن جانە «جەڭىس» كلۋبىمەن بىرلەسىپ جۇرگىزىلىپ جاتىر. وتاندىق جاتتىقتىرۋشىلار شەتەلدىك وزىق ماماندارمەن، ونىڭ ىشىندە ەتسيو گامبا كومانداسىمەن بىرلەسىپ جۇمىس ىستەيدى. بۇل جەردە اڭگىمە تەك تانىمال شەتەلدىك جاتتىقتىرۋشىنى شاقىرۋ تۋرالى ەمەس. ونىڭ نەگىزىندە ناقتى ادىستەمە جاتىر: جاتتىعۋ پروتسەسىن عىلىمي تالداۋ، فۋنكتسيونالدىق دياگنوستيكا، جۇكتەمەنى جەكەلەي بەيىمدەۋ، قالپىنا كەلتىرۋ، سپورتتىق مەديتسينا جانە ءار سپورتشىنىڭ دامۋ ديناميكاسىن تۇراقتى باقىلاۋ.

قازىرگى كەزدە ءبىز بۇل جۇمىستىڭ ناقتى KPI كورسەتكىشىن كورىپ وتىرمىز - جاسوسپىرىمدەرىمىزدىڭ الەم چەمپيوناتىنداعى تاريحي ناتيجەسى وسىنىڭ ايقىن دالەلى.

ءدال وسىنداي مودەلدى بۇگىندە مينيسترلىك باسقا فەدەراتسيالارعا دا جۇيەلى تۇردە ەنگىزۋدى ۇسىنىپ وتىر. سونىڭ ءبىرى - سەمسەرلەسۋ، بوكس جانە كۇرەس. بۇل سپورت تۇرلەرىندە دە ۇزدىك شەتەلدىك مامانداردى تارتا وتىرىپ، زاماناۋي دايىندىق ادىستەمەلەرىن قولدانۋعا نەگىزدەلگەن جۇيەلى جۇمىس جولعا قويىلىپ جاتىر.

تاعى ءبىر ماڭىزدى باعىت - سپورت عىلىمىن كۇشەيتۋ. بۇل رەتتە ۇلتتىق سپورت ۋنيۆەرسيتەتى ماڭىزدى ءرول اتقارۋى ءتيىس. ءبىزدىڭ مىندەتىمىز - سپورت عىلىمىنىڭ جوعارى جەتىستىكتەر سپورتىنا قاتىسى جوق جەكە باعىت بولىپ قالماۋىن، كەرىسىنشە ۇلتتىق قۇرامالار ءۇشىن تىكەلەي جۇمىس ىستەۋىن قامتاماسىز ەتۋ. اتاپ ايتقاندا، بۇل – تەستىلەۋ، تالداۋ، مەديتسينا، قالپىنا كەلتىرۋ، تاماقتانۋ، بيومەحانيكا جانە سپورتشىلاردى دايارلاۋدىڭ جەكە باعدارلامالارى.

اۋقىمدى جۇمىستى ءبىز ۇلتتىق فەدەراتسيالارمەن جانە حالىقارالىق سپورت ۇيىمدارىمەن بىرلەسىپ جۇرگىزىپ جاتىرمىز. مەملەكەت باسشىسى سپورتتى دامىتۋعا جانە زاماناۋي دايىندىق جۇيەسىن قالىپتاستىرۋعا ۇلكەن كوڭىل ءبولىپ كەلەدى. قازاقستان حالىقارالىق دزيۋدو فەدەراتسياسىمەن دە ىنتىماقتاستىعىن نىعايتىپ وتىر. وسى باعىتتا فەدەراتسيا پرەزيدەنتى ماريۋس ۆيزەر ەلىمىزگە ارنايى كەلگەن بولاتىن.

بۇگىنگى نەگىزگى ۇستانىمىمىز قاراپايىم: زاماناۋي سپورتتاعى ناتيجە تەك جەكەلەگەن سپورتشىنىڭ نەمەسە جاتتىقتىرۋشىنىڭ تالانتىنا عانا تاۋەلدى بولماۋى كەرەك. ناتيجەنىڭ ارتىندا جۇيە تۇرۋى قاجەت.

بۇگىندە دزيۋدو وسى مودەلدىڭ جۇمىس ىستەيتىنىن كورسەتىپ وتىر. ەندىگى مىندەتىمىز - تابىستى تاجىريبەنى سپورتتىڭ باسقا تۇرلەرىنە دە ەنگىزۋ جانە وسىلايشا سپورت رەزەرۆى مەن ۇلتتىق قۇرامالاردى دايارلاۋدىڭ بۇكىل جۇيەسىن كەزەڭ-كەزەڭىمەن جەتىلدىرۋ.

ءبىز ءبىرتۇتاس ۆەرتيكالدى جۇيەنى قالىپتاستىرعىمىز كەلەدى: جاسوسپىرىمدەر - جاستار - ۇلتتىق قۇراما - وليمپيادا. ءار كەزەڭدە بىرىڭعاي ادىستەمە، وزىق حالىقارالىق تاجىريبەمەن ۇشتاسقان مىقتى وتاندىق جاتتىقتىرۋشىلار مەكتەبى جانە عىلىمي سۇيەمەلدەۋ بولۋى كەرەك. جاسوسپىرىمدەرىمىزدىڭ 10 مەدالى - بۇل تەك تاريحي ناتيجە ەمەس.

ءبىز ءۇشىن بۇل جاڭا تاسىلدەردىڭ ناقتى ناتيجە بەرە باستاعانىنىڭ دالەلى. ءدال وسى باعىتتا ءبىز قازاقستان سپورتىن قايتا قۇرىپ جاتىرمىز.

ەربول مىرزابوسىنوۆ، تۋريزم جانە سپورت ءمينيسترى 

Abai.kz