پەداگوگتەردىڭ ءداستۇرلى تامىز كونفەرەنتسياسىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ۇستازداردى جاڭا وقۋ جىلىنىڭ باستالۋىمەن قۇتتىقتاپ، كۇندەلىكتى ەڭبەگى ءۇشىن العىس ءبىلدىردى. مەملەكەت باسشىسى ءبىلىمدى، جاۋاپتى ءارى ويلاي بىلەتىن ۇرپاقتى قالىپتاستىرۋدا پەداگوگتىڭ ايرىقشا ءرول اتقاراتىنىن اتاپ ءوتتى.

ءوز سوزىندە پرەزيدەنت ۇستاز مارتەبەسىن ارتتىرۋ، ءبىلىم ساپاسىن كوتەرۋ، بالالاردى تاربيەلەۋ، پەداگوگتەردىڭ قۇقىقتارىن قورعاۋ، سونداي-اق زاماناۋي تەحنولوگيالار مەن جاساندى ينتەللەكتىنى وقۋ پروتسەسىنە ەنگىزۋ ماسەلەلەرىنە ەرەكشە توقتالدى.

ماراپاتتالعان پەداگوگتەردىڭ قاتارىندا الماتى وبلىسىنىڭ وكىلدەرى دە بار. ەسىك قالاسىنداعى دارىندى بالالارعا ارنالعان ا. مالكەەۆ اتىنداعى «ءبىلىم-يننوۆاتسيا» مامانداندىرىلعان ليتسەي-ينتەرناتىنىڭ گەوگرافيا ءپانىنىڭ مۇعالىمى تامارا جەتكەربايقىزى ەششانوۆاعا «قازاقستاننىڭ ەڭبەك سىڭىرگەن ۇستازى» قۇرمەتتى اتاعى بەرىلدى. بيىل بۇل اتاق ەلىمىزدىڭ بەس پەداگوگىنە تابىستالدى. جوعارى مەملەكەتتىك ماراپاتتى تامارا ەششانوۆاعا مەملەكەت باسشىسى ءوز قولىمەن تابىستادى.

ءوڭىردىڭ تاعى ءبىر وكىلى – كەگەن اۋدانىنداعى «تاساشينسكايا ورتا مەكتەبى جانىنداعى مەكتەپ-ينتەرنات جانە مەكتەپكە دەيىنگى ءبىلىم بەرۋدىڭ شاعىن ورتالىعى» كمم-ءنىڭ پەداگوگى گاۋحار جەنىسقىزى اۋەزحانوۆا. كوپ جىلعى ادال ەڭبەگى مەن ءبىلىم بەرۋ سالاسىن دامىتۋعا قوسقان ۇلەسى ءۇشىن ول «ءبىلىم بەرۋ سالاسىنىڭ ۇزدىگى» توسبەلگىسىمەن ماراپاتتالدى.

مۇنداي ماراپاتتار – جەكەلەگەن ۇستازداردىڭ كاسىبي ەڭبەگىن مويىنداۋ عانا ەمەس. بۇل ءبىلىم بەرۋمەن قاتار، وسكەلەڭ ۇرپاقتى تاربيەلەۋ مىندەتىن ابىرويمەن اتقارىپ جۇرگەن بارشا پەداگوگتەر قاۋىمىنىڭ كۇندەلىكتى ەڭبەگىنە بەرىلگەن جوعارى باعا.

بۇگىندە ەلىمىزدىڭ ءبىلىم بەرۋ جۇيەسىندە مۇعالىم ماماندىعىنىڭ بەدەلىن ارتتىرۋعا ەرەكشە كوڭىل بولىنۋدە. پرەزيدەنت اتاپ وتكەندەي، پەداگوگ – جاي عانا ماماندىق ەمەس، بالالار مەن قوعام الدىنداعى ۇلكەن جاۋاپكەرشىلىك.

الماتى وبلىسى ءۇشىن تامارا ەششانوۆا مەن گاۋحار اۋەزحانوۆانىڭ بۇل ماراپاتى – وڭىردەگى ءبىلىم بەرۋ سالاسىنىڭ جوعارى كاسىبي دەڭگەيىن تاعى ءبىر مارتە دالەلدەدى.

Abai.kz