ءبىلىم كۇنىندە الماتى وبلىسىندا «كەلەشەك مەكتەپتەرى» ۇلتتىق جوباسى اياسىندا سالىنعان بەس جاڭا مەكتەپ ەسىگىن ايقارا اشتى. بۇل ءبىلىم وردالارىندا 4200 وقۋشى ءبىلىم الادى.

سونداي-اق توزىعى جەتكەن تاعى 10 ءبىلىم ورداسى كۇردەلى جوندەۋدەن ءوتىپ، بۇگىن پايدالانۋعا بەرىلدى. بيىل وڭىردە 36 مىڭعا جۋىق ءبۇلدىرشىن العاش رەت مەكتەپ تابالدىرىعىن اتتادى. وسىلايشا، جاڭا وقۋ جىلىندا وبلىستاعى 502 جالپى ءبىلىم بەرەتىن مەكتەپتە 384 مىڭنان استام وقۋشى تاربيەلەنەدى، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.

الماتى وبلىسىندا ءۇش اۋىسىمدى وقىتۋدى جويىپ، ساپالى ءبىلىم بەرۋ ماقساتىندا سوڭعى ءتورت جىلدا 75 جاڭا مەكتەپ اشىلىپ، 6 قوسىمشا جاپسارجاي سالىندى. ونىڭ 26-سى «كەلەشەك مەكتەپتەرى» ۇلتتىق جوباسى اياسىندا بوي كوتەردى. ناتيجەسىندە ءۇش اۋىسىمدى ءبىلىم بەرۋ ۇيىمدارىنىڭ سانى 52-دەن 23-كە ازايىپ، شالعاي ەلدى مەكەندەردەگى 6000-عا جۋىق وقۋشىنىڭ تاسىمال ماسەلەسى شەشىلدى. سونىمەن قاتار الداعى ۋاقىتتا EPC+F تەتىگى ارقىلى نەمەسە مەملەكەتتىك-جەكەمەنشىك سەرىكتەستىك اياسىندا 10 مەكتەپتىڭ قۇرىلىسى جوسپارلانىپ وتىر.

بۇگىن پايدالانۋعا بەرىلگەن مەكتەپتەر الاتاۋ قالاسى، ىلە، قاراساي جانە ەڭبەكشىقازاق اۋداندارىندا ورنالاسقان. مۇندا زاماناۋي ءپان كابينەتتەرى، فيزيكا، حيميا جانە بيولوگيا زەرتحانالارى، ينفورماتيكا، STEM جانە روبوتوتەحنيكا كابينەتتەرى، كىتاپحانا، وقۋ زالى، سپورت زال، اسحانا، مەديتسينالىق پۋنكت، ءماجىلىس زالى، شىعارماشىلىق جانە كوۆوركينگ ايماقتار قاراستىرىلعان. بۇعان قوسا، مەكتەپتەر تسيفرلىق وقىتۋ تەحنولوگيالارىمەن، جوعارى جىلدامدىقتى ينتەرنەتپەن، بەينەباقىلاۋ جانە قاۋىپسىزدىك جۇيەلەرىمەن جابدىقتالعان. ەرەكشە قاجەتتىلىگى بار بالالار ءۇشىن دە بارلىق قولايلى جاعداي جاسالعان. بۇل وقۋشىلاردىڭ تەرەڭ ءبىلىم الۋىنا، شىعارماشىلىق جانە زياتكەرلىك قابىلەتتەرىن دامىتۋىنا جول اشادى. وڭىردە ينفراقۇرىلىمدى جاڭارتۋ جۇمىسى مۇنىمەن شەكتەلمەيدى. كەشەندى جوسپارعا سايكەس، 2025-2027 جىلدار ارالىعىندا وبلىستاعى 91 مەكتەپكە كۇردەلى جوندەۋ جۇرگىزۋ كوزدەلگەن.

العاشقى قوڭىراۋ كۇمبىرى ىلە اۋدانى ن. تىلەنديەۆ اۋىلىنداعى سۋجاڭا «كەلەشەك مەكتەبىندە» دە ەستىلدى. جالپى اۋماعى 10 مىڭ شارشى مەتردەن اساتىن نىسان 900 ورىندى جانە عيماراتتا 44 سىنىپ بار. جوبانىڭ جالپى قۇنى – 7,5 ملرد تەڭگە. بۇگىن مۇندا 100-گە جۋىق وقۋشى مەكتەپ تابالدىرىعىن العاش رەت اتتاپ، بارلىعى 1 230 بالا قابىلداندى.

سالتاناتتى شاراعا الماتى وبلىسىنىڭ اكىمى مارات سۇلتانعازيەۆ قاتىسىپ، وقۋشىلار مەن ۇستازداردى، اتا-انالاردى ءبىلىم كۇنىمەن قۇتتىقتادى.

«مەملەكەت باسشىسى قاسىم-جومارت توقاەۆ ءوز سوزىندە «ءبىز قازاقستانداعى بارلىق بالالاردىڭ باقىتتى بولاشاعىن قامتاماسىز ەتۋىمىز كەرەك» دەپ اتاپ وتكەندەي، وسكەلەڭ ۇرپاققا ساپالى ءبىلىم بەرىپ، ولاردىڭ جان-جاقتى دامۋىنا جاعداي جاساۋ – مەملەكەتىمىزدىڭ ماڭىزدى مىندەتتەرىنىڭ ءبىرى»، – دەدى ايماق باسشىسى. سونىمەن قاتار ءبىلىم سالاسىن قولداۋ ماقساتىندا وڭىردە اتقارىلعان اۋقىمدى جۇمىستار مەن وقۋشىلاردىڭ جەتىستىكتەرىنە توقتالدى. ايتۋىنشا، وتكەن وقۋ جىلىندا وبلىس وقۋشىلارى جاراتىلىستانۋ-ماتەماتيكالىق باعىت بويىنشا رەسپۋبليكالىق وليمپيادادا ۇزدىك ۇشتىككە ەندى، اۋىل مەكتەپتەرى اراسىندا كوماندالىق ءى ورىندى جەڭىپ الىپ، چەمپيون اتاندى. قوس بىردەي جاس دارىن ۇلتتىق بىرىڭعاي تەستىلەۋدىڭ ەڭ جوعارى كورسەتكىشى – 140 بالدى جيناپ، رەكورد جاسادى. سونىمەن قاتار 1 831 مەكتەپ ءبىتىرۋشى «التىن بەلگىنى» ەنشىلەسە، 1 675 تۇلەك «ۇزدىك اتتەستات» الدى. 7 مىڭنان استام وقۋشى مەملەكەتتىك ءبىلىم بەرۋ گرانتىن يەلەندى.

جاڭا مەكتەپتىڭ اشىلۋ سالتاناتىندا ءوڭىر باسشىسى ۇزدىك ۇستازداردى مەملەكەتتىك ناگرادالارمەن، العىس حاتتارمەن ماراپاتتادى. سونىمەن قاتار ۇلكەن ءومىردىڭ بوساعاسىندا تۇرعان تۇلەكتەرمەن جۇزدەسىپ، ولاردىڭ سىنىپ ساعاتىنا قاتىستى. وقۋشىلارمەن اتا زاڭنىڭ قاسيەتى، «زاڭ مەن ءتارتىپ»، «تازا قازاقستان» تۇجىرىمدامالارىنىڭ ءمانى جايلى اشىق اڭگىمە ءوربىتتى.

اۋىل تۇرعىندارى دا جاڭا نىساننىڭ بوي كوتەرگەنىنە ءدان ريزا. سولاردىڭ ءبىرى – قورعاسبەك قوجاحمەتوللا.

«ن. تىلەنديەۆ اۋىلىندا جاڭا مەكتەپ اشىلعانىنا وتە قۋانىشتىمىز. سول ءۇشىن مەملەكەت باسشىسىنا، وبلىس اكىمدىگىنە العىس ايتامىن. بۇل ءبىلىم ورداسىنان ەل-جۇرتىنا قىزمەت ەتەتىن، وي-ءورىسى كەڭ ازاماتتار ءوسىپ شىعادى دەپ سەنەمىن. ەندى وسى مەكتەپتە مەنىڭ ءتورت نەمەرەم ءبىلىم الادى. مەكتەپ كوڭىلىمىزدەن شىقتى»، – دەدى تۇرعىن.

سۋ جاڭا نىسانعا اياق باسقان وقۋشىلاردىڭ دا قۋانىشىندا شەك جوق.

«ءوزىم بيولوگيا ءپانىن جاقسى كورەمىن ءارى بولاشاقتا دارىگەر بولعىم كەلەدى. بۇل ارمانىما وسى مەكتەپتە وقۋ ارقىلى ءبىر تابان جاقىندايمىن دەگەن ۇمىتتەمىن. سەبەبى مۇندا ارنايى سىنىپتاردا ءتۇرلى تاجىريبەلەر جاساپ، ءبىلىمىمدى جەتىلدىرە الامىن. جاڭا مەكتەپ بىزگە قاتتى ۇنادى»، – دەيدى 11-سىنىپ وقۋشىسى كاۋسار قۋانباي.

Abai.kz