قازاقستاندا العاشقى رەسپۋبليكالىق «كىتاپ وقيتىن ۇلت» كىتاپ وقۋ مارافونىنا تىركەلۋ باستالدى. جوبا ەلىمىزدىڭ بارلىق وڭىرىنەن قاتىسۋشىلاردى بىرىكتىرىپ، كىتاپ وقۋدى ناسيحاتتاۋ مەن وقۋ مادەنيەتىن دامىتۋعا باعىتتالعان ەڭ اۋقىمدى ۇلتتىق باستامالاردىڭ بىرىنە اينالماق.

مارافون 2026 جىلعى قىركۇيەك ايىنان 2027 جىلعى ساۋىرگە دەيىن قازاق جانە ورىس تىلدەرىندەگى ەكى ليگادا وتەدى. جوبا 7 باعىتتى قامتيدى:

- «كىتاپ وقيتىن مەكتەپ» — 6–10 سىنىپ وقۋشىلارى;

- «كىتاپ وقيتىن كوللەدج» — كوللەدج ستۋدەنتتەرى;

- «كىتاپ وقيتىن ۋنيۆەرسيتەت» — جوعارى وقۋ ورىندارىنىڭ ستۋدەنتتەرى;

- «كىتاپ وقيتىن پەداگوگ» — مەكتەپ مۇعالىمدەرى مەن كوللەدج وقىتۋشىلارى;

- «كىتاپ وقيتىن اۋلەت» — وتباسىلىق كوماندالار;

- «كىتاپ وقيتىن مەملەكەتتىك قىزمەتشى» — مەملەكەتتىك قىزمەتشىلەر;

- «كىتاپ وقيتىن زياتكەر» — جاسىنا جانە قىزمەت سالاسىنا شەكتەۋ قويىلمايتىن بارلىق ازاماتتار.

ءار قاتىسۋشى ءوز باعىتى بويىنشا ارنايى ىرىكتەلگەن 330 كىتاپتان تۇراتىن قوردان 15 كىتاپ وقۋى قاجەت. ونىڭ 165-ءى قازاق تىلىندە، 165-ءى ورىس تىلىندە ۇسىنىلعان. كىتاپتار تىزىمىنە وتاندىق اۆتورلاردىڭ شىعارمالارى، الەم كلاسسيكاسى جانە زاماناۋي تۋىندىلار ەندى. ءتىزىمدى جاساقتاۋ كەزىندە جالپىۇلتتىق داۋىس بەرۋ قورىتىندىسى بويىنشا «100 كىتاپ» تىزىمىنە ەنگەن شىعارمالار، سونداي-اق ادەبيەت سالاسىنداعى نوبەل سىيلىعىنىڭ لاۋرەاتتارى جازعان تۋىندىلاردى قوسا العاندا، الەمدىك بەستسەللەرلەر دە ەسكەرىلدى.

نەگىزگى وقۋ كەزەڭى بيىل قىركۇيەك ايىندا باستالىپ، 2027 جىلعى ناۋرىزعا دەيىن جالعاسادى. وسى ۋاقىتتا قاتىسۋشىلار كىتاپتاردى وقىپ، جەكە كابينەتىندە قىسقاشا پىكىرلەرىن جاريالاپ وتىرادى. ال 2027 جىلعى ءناۋرىز–ساۋىر ايلارىندا قورىتىندى تەستىلەۋ مەن زياتكەرلىك كۆيزدەر وتكىزىلەدى.

وڭىرلىك كەزەڭدەردىڭ جەڭىمپازدارى مەن جۇلدەگەرلەرىنە اقشالاي سىيلىقتار تابىستالادى: 1-ورىن — 600 000 تەڭگە; 2-ورىن — 450 000 تەڭگە; 3-ورىن — 300 000 تەڭگە.

بارلىق فيناليست ديپلومدارمەن جانە ەلەكتروندى سەرتيفيكاتتارمەن ماراپاتتالادى.

«كىتاپ وقيتىن ۇلت – چيتايۋششايا ناتسيا» قوعامدىق قورىنىڭ توراعاسى باقىتجان تۇرلىبەكوۆتىڭ ايتۋىنشا، جوبانىڭ نەگىزگى ماقساتى بايقاۋدىڭ وزىمەن عانا شەكتەلمەيدى.

«بۇگىن ءبىز «كىتاپ وقيتىن ۇلت» العاشقى رەسپۋبليكالىق مارافونىنا تىركەلۋدى اشىپ، وسىلايشا جاسى، ماماندىعى مەن قىزىعۋشىلىعى ءارتۇرلى ادامداردى كىتاپ توڭىرەگىنە بىرىكتىرەتىن ۇلكەن جالپىۇلتتىق قوزعالىسقا جول اشىپ وتىرمىز.

بارشاڭىزدى مارافونعا قاتىسۋعا شاقىرامىن. بىرلەسە وتىرىپ، كىتاپ وقۋدى قازاقستانداعى زاماناۋي ءومىردىڭ ماڭىزدى قۇرامداس بولىگىنە اينالدىرا الامىز دەپ سەنەمىن. سونداي-اق زەردەلى ۇلتتىڭ — قۋاتتى، ءبىلىمدى ءارى ويلايتىن ۇلت ەكەنىن كورسەتە الامىز»، — دەدى باقىتجان تۇرلىبەكوۆ.

قاتىسۋ ەرەجەلەرى، باعىتتار بويىنشا رەگلامەنتتەر جانە كىتاپتار ءتىزىمى جوبانىڭ رەسمي سايتىندا جاريالانعان: www.reading-nation.kz

رەسپۋبليكالىق «كىتاپ وقيتىن ۇلت» مارافونىن جۇزەگە اسىرۋعا جوبانىڭ بىرقاتار ماڭىزدى سەرىكتەستەرى دە اتسالىسۋدا. قازاقستان جازۋشىلار وداعى، كرەاتيۆتى يندۋستريالاردى دامىتۋ قورى، KITAP جانە «ياندەكس كىتاپتار» تسيفرلىق پلاتفورمالارى وقۋ مادەنيەتىن دامىتۋعا، زاماناۋي ادەبي باستامالاردى قولداۋعا جانە وقىرمانداردىڭ كىتاپپەن ءوزارا بايلانىسۋىنا جاڭا مۇمكىندىكتەر جاساۋعا ىقپال ەتپەك.

جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلۋدا.

Abai.kz