بۇگىن قازاقستاندا العاش رەت قازاق تازىسى مەن توبەتى كۇنى اتالىپ ءوتىپ جاتىر. بۇل – جاي عانا اتاۋلى كۇن ەمەس، عاسىرلار بويى ۇلتپەن بىرگە جاساسقان ءتول مۇرامىزدى قايتا جاڭعىرتىپ، الەمگە تانىتۋدىڭ ماڭىزدى قادامى.

قازاق ءۇشىن تازى – اڭشىلىق قۇرالى عانا ەمەس. ول – جەتى قازىنانىڭ ءبىرى، كوشپەلى مادەنيەتتىڭ اجىراماس بولىگى. ال توبەت – قازاق دالاسىنىڭ تابيعي بولمىسىمەن بىتە قايناسقان تەكتى يت تۇقىمى. وسى ارقىلى اتا-بابامىزدىڭ تۇرمىسىن، دۇنيەتانىمىن جانە تابيعاتپەن ۇيلەسىمدى ءومىر ءسۇرۋ ءداستۇرىن تانۋعا بولادى.

سوڭعى جىلدارى قازاقى يت تۇقىمدارىن ساقتاۋعا مەملەكەتتىك دەڭگەيدە ءمان بەرىلىپ كەلەدى. قازاقى يت تۇقىمدارىن ساقتاۋ جانە ءوسىمىن مولايتۋ تۋرالى زاڭ كۇشىنە ەندى. قازاقستان حالىقارالىق كينولوگيا فەدەراتسياسىنىڭ مۇشەلىگىنە قابىلدانىپ، 2024 جىلى قازاق تازىسى حالىقارالىق دەڭگەيدە الدىن الا مويىندالدى. ونىڭ شىققان جەرى رەتىندە قازاقستان رەسمي تۇردە بەكىتىلدى.

بۇگىندە قازاق تازىلارى حالىقارالىق كورمەلەردە جۇلدە الىپ، ەلدىڭ اتىن الەمدىك كينولوگيا ارەناسىندا تانىتىپ ءجۇر. بۇل – ۇلتتىق مۇرانى ساقتاۋدىڭ عانا ەمەس، قازاقستاننىڭ مادەني ءيميدجىن قالىپتاستىرۋدىڭ دا ءبىر جولى.

ۇلتتىق قۇندىلىقتى ۇلىقتاۋ – وتكەنگە قاراپ قالۋ ەمەس. كەرىسىنشە، ونى زاماناۋي فورماتتا تانىتىپ، كەلەر ۇرپاققا جەتكىزۋ. ءوز مادەنيەتىن الەمگە كورسەتە العان ەلدىڭ عانا وزىندىك بولمىسى ايقىن كورىنەدى. سوندىقتان تازى مەن توبەتتى دارىپتەۋ – ءبىر كۇندىك ناۋقان ەمەس، ۇلتتىق مۇرانى ساقتاپ، ونى الەمگە تانىتاتىن ۇزاق مەرزىمدى جۇمىستىڭ ءبىر بولىگى بولۋى ءتيىس.

Abai.kz