قازاقستان ۇلتتىق بانكى بازالىق مولشەرلەمەنى 16,25%-عا دەيىن تومەندەتتى، دەپ حابارلايدى رەتتەۋشىنىڭ ءباسپاسوز قىزمەتى.

«قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى كوميتەتى بازالىق مولشەرلەمەنى +/- 1 پايىزدىق تارماق كوريدورىمەن جىلدىق 16,25% دەڭگەيىندە بەلگىلەۋ تۋرالى شەشىم قابىلدادى. شەشىم بولجامدى كەزەڭ ناتيجەلەرىنە، نەگىزگى ماكروەكونوميكالىق كورسەتكىشتەردىڭ جاڭارتىلعان باعالاۋلارىنا جانە ينفلياتسيا تاۋەكەلدەرىنىڭ تەڭگەرىمىنە سۇيەنەدى»، — دەلىنگەن جۇماداعى حابارلامادا.

تامىز ايىندا جىلدىق ينفلياتسيا قارقىنى 9,8%-عا دەيىن باياۋلاعانى اتاپ وتىلەدى.

«دەزينفلياتسيالىق ۇدەرىس قاتارىنان 11 اي بويى جالعاسىپ كەلەدى. ازىق-تۇلىك ينفلياتسياسى 9,5%-عا دەيىن تومەندەدى. نەگىزگى فاكتورلار — جەمىستەر مەن كوكونىستەردىڭ ايتارلىقتاي ارزانداۋى، سونداي-اق يمپورتتىق باعالاردىڭ تومەندەۋى. ازىق-تۇلىككە جاتپايتىن تاۋارلار ينفلياتسياسىنىڭ قارقىنى تەڭگە باعامىنىڭ نىعايۋى اياسىندا 11,4%-عا دەيىن باياۋلادى. سەرۆيستىك ينفلياتسيا رەتتەلمەيتىن قىزمەتتەر باعاسىنىڭ ءوسۋ قارقىنىنىڭ ءبىرشاما باياۋلاۋى ەسەبىنەن 8,9%-عا دەيىن تومەندەدى. ايلىق ينفلياتسيا تامىزدا 0,6%-دى (شىلدەدە 0,6%), ماۋسىمدىق فاكتورلاردان تازارتىلعاندا — 0,9%-دى (شىلدەدە 0,7%) قۇرادى. بازالىق ينفلياتسيا 0,7% دەڭگەيىندە ساقتالدى. حالىقتىڭ ءبىر جىل الداعى ينفلياتسيالىق كۇتۋلەرى شىلدەدە 13,4%-دان (ماۋسىمدا) 12,1%-عا دەيىن تومەندەدى. بۇل قوس (قوس) مولشەرلەمەسىنىڭ جوعارىلاۋى، تۇكش تاريفتەرى مەن ازىق-تۇلىك باعاسىنىڭ وسۋىنە قاتىستى الاڭداۋشىلىقتىڭ ازايۋىمەن بايلانىستى. سونىمەن قاتار كۇتۋلەردە ججم باعاسىنىڭ ءوسۋ فاكتورىنىڭ ىقپالى كۇشەيدى. نارىقتىڭ كاسىبي قاتىسۋشىلارىنىڭ 2026 جىلدىڭ سوڭىنا ارنالعان كۇتۋلەرى 10% دەڭگەيىندە ساقتالىپ وتىر»، — دەپ ناقتىلادى ۇلتتىق بانكتە.

رەتتەۋشىنىڭ مالىمەتىنشە، سىرتقى سەكتورداعى جاعداي تۋراقسىز كۇيدە قالىپ وتىر.

«تاياۋ شىعىستاعى جالعاسىپ جاتقان قاقتىعىس ەنەرگيا تاسىمالداۋشىلاردىڭ جوعارى باعاسىن ۇستاپ تۇر جانە سىرتقى ينفلياتسيالىق قىسىمدى كۇشەيتەدى. بۇل جاعدايدا جەتەكشى ورتالىق بانكتەردىڭ ريتوريكاسى كاتاڭ سيپاتىن ساقتايدى. الەمدىك ازىق-تۇلىك باعاسى ءداندى داقىلدار مەن وسىمدىك مايلارى ەسەبىنەن ءبىرشاما ءوستى، ال ەت باعاسى ۇزاق ۋاقىت ىشىندە العاش رەت تومەندەدى. رەسەيدە ينفلياتسيا ورنىقتى بولىپ قالۋدا. جانارماي نارىعىنداعى ىركىلىستەر اياسىندا پروينفلياتسيالىق تاۋەكەلدەر ساقتالۋدا. شىلدەدەگى نەگىزگى مولشەرلەمەنىڭ تومەندەۋىنە قاراماستان، رەسەي بانكىنىڭ ريتوريكاسى قاتاڭداي ءتۇستى. ەو-دا ينفلياتسيا نەگىزىنەن ەنەرگيا تاسىمالداۋشىلار باعاسىنىڭ ءوسۋى ەسەبىنەن ءبىرشاما جەدەلدەدى. ەوب سوڭعى وتىرىسىندا مولشەرلەمەلەردى وزگەرىسسىز قالدىردى. اقش-تا ينفلياتسيا باياۋلادى، بىراق ماقساتتى دەڭگەيدەن جوعارى بولىپ قالۋدا. وسىعان بايلانىستى فرس مولشەرلەمەنى وزگەرىسسىز ساقتايدى»، — دەلىنگەن حابارلامادا.

اقپاراتقا سايكەس، 2026 جىلعا ارنالعان ينفلياتسيا بويىنشا بولجام وزگەرىسسىز قالدى: ول 9-11% ارالىعىندا كۇتىلەدى.

«باعا ءوسىمىنىڭ باياۋلاۋىنا قالىپتى قاتاڭ اقشا-كرەديت شارتتارى مەن تەڭگەنىڭ نىعايعان باعامى ىقپال ەتەدى. قوسىمشا شەكتەۋشى اسەردى 2026 جىلعى قىركۇيەكتەگى ەڭ تومەنگى رەزەرۆتىك تالاپتاردى ارتتىرۋدىڭ سوڭعى كەزەڭى قامتاماسىز ەتەدى. 2027 جىلعا ارنالعان بولجام سىرتقى ينفلياتسيانىڭ وسۋىنە، رەتتەلەتىن باعالار العىشارتتارىنىڭ قايتا قارالۋىنا، سونداي-اق فيسكالدىق ءيمپۋلستىڭ ارتۋىنا بايلانىستى 6,5–8,5%-عا دەيىن (بۇعان دەيىن 5,5–7,5%) جوعارىلاتۋ جاعىنا قاراي قايتا قارالدى. بۇل رەتتە اقشا-كرەديت ساياساتىنىڭ جيناقتالعان قاتاڭدىعى ينفلياتسيالىق قىسىمدى شەكتەۋدى جانە باعا ءوسىمىنىڭ ودان ءارى باياۋلاۋىنا ىقپال ەتۋدى جالعاستىرادى. 2028 جىلى سىرتقى ينفلياتسيالىق فوننىڭ قالىپقا كەلۋى، فيسكالدىق كونسوليداتسيا، ىشكى سۇرانىستىڭ قالىپتاسۋى جانە قالىپتى قاتاڭ اقشا-كرەديت شارتتارى اياسىندا ينفلياتسيالىق كۇتۋلەردىڭ تومەندەۋى شاماسىنا قاراي ينفلياتسيا 5% ماقساتىنا جۋىق تۇراقتالادى»، — دەپ تولىقتىردى رەتتەۋشى.

ينفلياتسيا تاۋەكەلدەرىنىڭ تەڭگەرىمى پروينفلياتسيالىق جاققا قاراي اۋىتقىعان كۇيدە قالاتىنى حابارلانادى. نەگىزگى تاۋەكەلدەر فيسكالدىق ءيمپۋلستىڭ كۇشەيۋى اياسىندا ىشكى سۇرانىستىڭ كەڭەيۋىمەن، تۇراقسىز ينفلياتسيالىق كۇتۋلەرمەن، ججم باعاسى مەن تۇكش تاريفتەرىنىڭ ودان ءارى ديناميكاسىمەن بايلانىستى. سىرتقى تاۋەكەلدەر گەوساياسي شيەلەنىستىڭ ىقتيمال كۇشەيۋىنە بايلانىستى الەمدىك ازىق-تۇلىك جانە ەنەرگيا تاسىمالداۋشىلار باعاسىنىڭ وسۋىمەن تۇسىندىرىلەدى.

«بازالىق ستسەناريدە 2026 جىلعا ارنالعان ءجوو ء(جۇو) ءوسىمىنىڭ بولجامى وزگەرىسسىز قالدى جانە 4,5-5,5% دەڭگەيىندە باعالانادى. ەكونوميكالىق بەلسەندىلىكتى كۆازيفيسكالدىق ىنتالاندىرۋ باعدارلامالارىن ىسكە اسىرۋ جانە تۇراقتى تۇتىنۋشىلىق سۇرانىس اياسىندا جوعارى ينۆەستيتسيالىق بەلسەندىلىك قولداپ وتىرادى. ۇلتتىق بانكتىڭ وتكەن بولجامدى كەزەڭىنىڭ العىشارتتارىمەن جانە ۇكىمەتتىڭ الەۋمەتتىك-ەكونوميكالىق دامۋ بولجامىنىڭ الدىڭعى پارامەترلەرىمەن سالىستىرعاندا، 2027 جىلى فيسكالدىق ىنتالاندىرۋ كولەمىنىڭ ارتۋى كۇتىلۋدە، بۇل ينۆەستيتسيالىق جانە تۇتىنۋشىلىق بەلسەندىلىككە قولداۋ كورسەتەدى. بۇل رەتتە تشو-داعى جوندەۋ جۇمىستارىنىڭ 2026 جىلدان 2027 جىلعا اۋىستىرىلۋى ەسەبىنەن 2027 جىلعى مۇناي ءوندىرۋدىڭ ءالسىز بولجامدى ديناميكاسى ىشكى سۇرانىستىڭ كەڭەيۋىن ءىشىنارا تەڭەستىرەتىن بولادى. 2027 جىلى ءجوو ءوسىمى 4,5% شەگىندە قالىپتاسادى. 2028 جىلى سالالىق جانە جۇيەلىك رەفورمالاردى ىسكە اسىرۋ اسەرىنەن، جوسپارلانعان فيسكالدىق ىنتالاندىرۋدى كەڭەيتۋدەن، سونداي-اق مۇناي ءوندىرۋ مەن ەكسپورتتى قالپىنا كەلتىرۋدەن 2028 جىلى ءجوو ءوسىمىنىڭ 4-5%-عا دەيىن (بۇرىن 3,5-4,5%) جەدەلدەۋى كۇتىلۋدە»، — دەپ حابارلادى ۇلتتىق بانكتە.

اعىمداعى ينفلياتسيا مەن ينفلياتسيالىق كۇتۋلەردىڭ وڭ ديناميكاسى وسى شەشىم شەڭبەرىندە بازالىق مولشەرلەمەنى تومەندەتۋگە مۇمكىندىك بەرگەنى اتاپ وتىلەدى.

«بۇل رەتتە 2027 جىلعا ارنالعان بولجامدى باعالاۋلاردىڭ قايتا قارالۋىنا اسەر ەتكەن پروينفلياتسيالىق فاكتورلار مەن تاۋەكەلدەردىڭ كۇشەيۋى جاعدايىندا ودان ءارى تومەندەتۋ كەڭىستىگى شەكتەۋلى. كەيىنگى شەشىمدەر كەلىپ تۇسەتىن ينفلياتسيا دەرەكتەرىنە، ونىڭ بولجامدى تراەكتورياعا سايكەستىگىنە، ىشكى سۇرانىس ديناميكاسىنا، ينفلياتسيالىق كۇتۋلەرگە جانە رەتتەلەتىن باعالارعا، سونداي-اق فيسكالدىق جانە كۆازيفيسكالدىق ىنتالاندىرۋدىڭ اۋقىمى مەن اسەرىنە قاراي قابىلداناتىن بولادى. اقشا-كرەديت ساياساتى ينفلياتسيانى 2028 جىلى ورتا مەرزىمدى 5% ماقساتىنا دەيىن تومەندەتۋگە باعىتتالادى»، — دەلىنگەن حابارلامادا.

Abai.kz