قر ۇلتتىق كىتاپحانا عيماراتىندا 07 قىركۇيەكتە سىرشىل اقىن ومىرزاق قوجامۇراتوۆتىڭ  «دالاما سىر» اتتى كىتابىنىڭ تۇساۋكەسەرى ءوتتى.

ءو.قوجامۇراتوۆ - بايىرعى مەكەن تامدى ولكەسىنەن شىققان، نەبارى 47 جاسىندا 1983 جىلى ومىردەن وزعان قازاقتىڭ قارا ولەڭىنىڭ ناعىز ۇزدىكتەرىنىڭ ءبىرى.

ءوز زامانىندا مۇقاعاليدان باستاپ بارشا مىقتىلاردىڭ وڭ باعاسىن الىپ، سولاردىڭ مويىنداۋىن كورگەن، جازعاندارى سىرشىل، ولەڭ جولدارى سەزىمشىل قالام يەسى.

اقىننىڭ 90 جىلدىق مەرەيتويىنا ورايلاستىرىلعان شارا  دۇنيەجۇزى قازاقتارىنىڭ قاۋىمداستىعىنىڭ ۇيىتقى بولۋىمەن ۇيىمداستىرىلدى. كەشتىڭ نەگىزگى ماقساتى – ومىرزاق قوجامۇراتوۆتىڭ شىعارماشىلىق مۇراسىن دارىپتەپ، اقىننىڭ ادەبيەتتەگى وزىندىك قولتاڭباسىن كەيىنگى ۇرپاققا تانىستىرۋ، ونىڭ ءومىرى مەن ونەگەلى جولىن ناسيحاتتاۋ.

كىتاپتىڭ تۇساۋكەسەرىنە استانا قالاسى جازۋشىلار وداعىنىڭ باسشىسى باۋىرجان باباجانۇلى، ءبىر توپ اقىن-جازۋشىلار، قالامگەردىڭ تۋعان-تۋىستارى، تۋعان قارىنداسى كۇلاندا اپاي، سونداي-اق، جەرلەستەرى مەن ادەبيەت جاناشىرلارى قاتىستى.

جيىن بارىسىندا ءسوز العان قالامگەرلەر ومىرزاق قوجامۇراتوۆتىڭ شىعارماشىلىعىنا توقتالىپ، اقىننىڭ قازاق ادەبيەتىنە قوسقان ۇلەسى، ازاماتتىق بولمىسى مەن ادامدىق قاسيەتتەرى جايىندا جىلى ەستەلىكتەرىمەن ءبولىستى. اقىننىڭ ولەڭدەرى وقىلىپ، تامدىلىق ونەرپازدار اقىن سوزدەرىنە شىعارىلعان اندەردى ششىرقادى.

تۋعان قارىنداسى كۇلاندا اپاي اعاسى تۋرالى ەستەلىكتەرىمەن ءبولىسىپ، ونىڭ بالا كەزىنەن قالىپتاسقان اقىندىق بولمىسى، تۋعان جەرگە دەگەن سۇيىسپەنشىلىگى مەن ەلگە دەگەن ازاماتتىق ۇستانىمى جايىندا سىر شەرتتى.

«دالاما سىر» – اقىننىڭ تۋعان جەرگە، ەلگە، تابيعاتقا، ادامعا دەگەن جۇرەكجاردى سەزىمىن ارقاۋ ەتكەن شىعارمالارىن توعىستىرعان تاعىلىمدى جيناق. كىتاپتىڭ جارىق كورۋى – اقىن شىعارماشىلىعىن قايتا زەردەلەپ، ونىڭ ادەبي مۇراسىن وقىرمان قاۋىمعا كەڭىنەن تانىتۋ جولىنداعى ماڭىزدى قادام.

كەش سوڭىندا قاتىسۋشىلار اقىننىڭ ونەگەلى ءومىرى مەن شىعارماشىلىق مۇراسىن ۇلىقتاۋ – كەيىنگى بۋىننىڭ پارىزى ەكەنىن اتاپ ءوتىپ، قالامگەردىڭ ەسىمى مەن ەڭبەگى ەل جادىندا ماڭگى ساقتالاتىنىنا توقتالدى.

Abai.kz