19–20 قىركۇيەك كۇندەرى الماتىدا قالا كۇنىنە ارنالعان اۋقىمدى مەرەكەلىك ءىس-شارالار ءوتتى. باعدارلاماعا قالانىڭ باستى الاڭدارىندا، سونداي-اق بارلىق 8 اۋدان اۋماعىندا ۇيىمداستىرىلعان كونتسەرتتەر، فەستيۆالدەر، كورمەلەر، سپورتتىق جانە شىعارماشىلىق جوبالار ەندى. ەكى كۇن ىشىندە مەرەكەلىك شارالارعا 1 ميلليوننان استام قالا تۇرعىنى مەن قوناعى قاتىستى.لماتى قالاسى اكىمدىگىنەن الىندى.

وسى كۇندەرى اباي الاڭىندا الماتى قالاسىنىڭ اكىمى دارحان ساتىبالدىنىڭ قاتىسۋىمەن سالتاناتتى كونتسەرت ءوتىپ، «الماتى قالاسىنىڭ قۇرمەتتى ازاماتى» اتاعىن تابىستاۋ ءراسىمى ۇيىمداستىرىلدى. سونىمەن قاتار فولكلورلىق-ەتنوگرافيالىق «سازگەن سازى» ءانسامبلى، قازاق مەملەكەتتىك تسيركىنىڭ ارتىستەرى، ASU توبى جانە «الاتاۋ» ءداستۇرلى ونەر تەاترى ونەر كورسەتتى. كەش بارىسىندا پيانيست Ratovich پەن NE PROSTO ORCHESTRA كونتسەرتتىك باعدارلامالارىن ۇسىندى. مەرەكەنىڭ ەرەكشە وقيعالارىنىڭ ءبىرى تانىمال حالىقارالىق بالالارعا ارنالعان D Billions مۋزىكالىق شوۋىنىڭ ونەر كورسەتۋى بولدى. ونى مىڭداعان بالا اتا-انالارىمەن بىرگە تاماشالادى.

الاڭدا قالا تۇرعىندارى ءۇشىن تاقىرىپتىق جانە بالالارعا ارنالعان ايماقتار، AI & ROBOT ZONE, كرافت ويىندارى الاڭى جانە كاسىبي سۋرەتشىلەردىڭ «اجارلى الماتى» كورمەسى جۇمىس ىستەدى.

استانا الاڭىندا كۇندىزگى كونتسەرتتىك باعدارلامالار، «Almaty Vibes» مۋزىكالىق فەستيۆالى جانە «Almaty Zhuldyzy» كونتسەرتتىك باعدارلاماسى ءوتتى. ساحنادا ەلىمىزدىڭ تانىمال جۇلدىزدارى ونەر كورسەتتى. كەشتىڭ باستى وقيعاسى الماتى قالاسىنىڭ قالىپتاسۋ تاريحىنا ارنالعان، زاماناۋي ۆيزۋالدى تەحنولوگيالار مەن مۋزىكالىق سۇيەمەلدەۋدى ۇيلەستىرگەن اسەرلى 3D Mapping Show بولدى.

پانفيلوۆ جانە جىبەك جولى كوشەلەرىندە دە مەرەكەلىك شارالار ۇيىمداستىرىلدى. مۇندا تاقىرىپتىق ايماقتار جۇمىس ىستەپ، كونتسەرتتەر، شىعارماشىلىق باعدارلامالار مەن قۋىرشاق تەاترىنىڭ قويىلىمى ءوتتى. 60-تان استام باسپا ءۇيى مەن كىتاپ دۇكەنىن بىرىكتىرگەن Kitap Fest كىتاپ جارمەڭكەسىنە ەكى كۇن ىشىندە 50 مىڭنان استام ادام كەلدى.

مەرەكەلىك باعدارلامانىڭ ماڭىزدى وقيعالارىنىڭ ءبىرى ءداستۇرلى الما جارمەڭكەسى بولدى. ەكى كۇن ىشىندە جەرگىلىكتى وندىرۋشىلەر مەن شارۋا قوجالىقتارى ۇسىنعان المانىڭ 50-گە جۋىق ءتۇرى ساتىلىپ، جارمەڭكەدە 250 توننادان استام الما وتكىزىلدى.

«الاتاۋ» ءداستۇرلى ونەر تەاترىنىڭ الدىنداعى الاڭدا «ءان مەن كۇيدىڭ بەسىگى»، «Jana Lep» جانە «الماتىعا ماحابباتپەن» كونتسەرتتەرى ءوتتى. باعدارلاماعا بەلگىلى ونەرپازدار مەن شىعارماشىلىق ۇجىمدار قاتىستى.

مەرەكەنىڭ تاعى ءبىر ايتۋلى وقيعاسى – ماسانچي كوشەسىندە، ساتباەۆ داڭعىلىنان اباي داڭعىلىنا دەيىنگى ارالىقتا الماتىداعى العاشقى گاسترونوميالىق كوشەنىڭ اشىلۋى بولدى. جاڭا كەڭىستىك قوعامدىق تاماقتانۋ ورىندارىن، قالالىق ينفراقۇرىلىمدى جانە زاماناۋي قوعامدىق كەڭىستىكتى بىرىكتىرىپ، قالا تۇرعىندارى مەن قوناقتارى ءۇشىن جاڭا تارتىلىس نۇكتەسىنە اينالدى.

ماسانچي كوشەسىندەگى گاسترونوميالىق كوشەنىڭ اشىلۋى الماتىدا مامانداندىرىلعان گاسترونوميالىق كوشەلەر جەلىسىن قالىپتاستىرۋ جوباسىنىڭ ءبىر بولىگى بولىپ تابىلادى. جاڭا فورماتتاعى كەڭىستىك تۇرعىندار مەن تۋريستەرگە زاماناۋي قالالىق گاسترونوميانىڭ الۋان تۇرىمەن تانىسىپ، جايلى ورتادا ۋاقىت وتكىزۋگە جانە الماتىنىڭ ورتالىق كوشەلەرىنىڭ جاڭا قىرىن اشۋعا مۇمكىندىك بەرەدى.

سونىمەن قاتار مەرەكەلىك باعدارلاما الماتىنىڭ بارلىق 8 اۋدانىن قامتىدى. تۇرعىندار ءۇشىن كونتسەرتتەر، سپورتتىق جارىستار، كورمەلەر، شەبەرلىك ساباقتارى، وتباسىلىق جانە بالالارعا ارنالعان ءىس-شارالار، سونداي-اق ءتۇرلى قوعامدىق جانە مادەني جوبالار ۇيىمداستىرىلدى.

وسىلايشا، الماتىداعى قالا كۇنى ءتۇرلى جاستاعى تۇرعىندار مەن قالا قوناقتارىن بىرىكتىرگەن اۋقىمدى مەرەكەگە اينالدى. ەكى كۇن بويى قالانىڭ ءتۇرلى الاڭدارىندا مۋزىكا، ۇلتتىق مادەنيەت، زاماناۋي ونەر، ادەبيەت، سپورت جانە وتباسىلىق دەمالىس باعىتتارى قامتىلىپ، تۇرعىندار مەن قوناقتارعا مازمۇندى ءارى جارقىن مەرەكەلىك باعدارلاما ۇسىنىلدى.

Abai.kz