مەملەكەت باسشىسى قاسىم-جومارت توقاەۆ بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ جونىندە كەڭەس وتكىزبەك. پرەزيدەنتتىڭ ايتۋىنشا، ءتيىستى شەشىمنەن كەيىن ورتالىق سايلاۋ كوميسسياسى جاڭا ءماسليحاتتار سايلاۋىنىڭ كۇنىن جاريالاۋى كەرەك. بۇل قادام جەرگىلىكتى وكىلدى ورگانداردىڭ بىلىكتى ءارى كاسىبي قۇرامىن قالىپتاستىرۋعا مۇمكىندىك بەرەدى.

پرەزيدەنت ءسوز باسىندا ەلىمىزدىڭ مەملەكەتتىك باسقارۋ جۇيەسى زامان تالابىنا ساي جاڭعىرتىلىپ جاتقانىن ايتقان ەدى. ەندى وسى جۇمىستى توقتاتپاي، تەك العا قاراي ءجۇرۋ كەرەك.

— قازىرگى كەزەڭدە ءبىز جەرگىلىكتى وكىلدى ورگانداردىڭ، ياعني ءماسليحاتتاردىڭ سايلاۋىن وتكىزۋىمىز قاجەت. ءماسليحات دەپۋتاتتارىنىڭ وكىلەتتىگى كونستيتۋتسيادا جانە ءتيىستى زاڭداردا ايقىندالعان مەرزىمگە دەيىن ساقتالادى. دەگەنمەن ولاردىڭ كوپشىلىگى «Amanat» پارتياسىنىڭ اتىنان سايلاندى. بۇگىندە بۇل ساياسي ۇيىم «ادىلەت» پارتياسىنا قوسىلىپ، ءوز قىزمەتىن توقتاتتى. جاقىندا ءتيىستى زاڭنامالىق راسىمدەر اياقتالادى. سول كەزدە ءماسليحات دەپۋتاتتارىنىڭ باسىم بولىگىنىڭ قىزمەتىنىڭ زاڭدىلىعىنا قاتىستى ماسەلە تۋىندايدى، — دەدى مەملەكەت باسشىسى.

جالپى، جەرگىلىكتى دەپۋتاتتار ايماقتاعى جۇرتشىلىقتىڭ مۇددەسىن قورعايدى، بيۋدجەتتى بەكىتەدى جانە باسقا دا مىندەتتەردى ورىندايدى.

ءبىر سوزبەن ايتقاندا، ەلدى-مەكەندەردى وركەندەتۋ ىسىنە بەلسەنە اتسالىسادى. دەمەك، وكىلدى ورگاندار قىزمەتىنىڭ زاڭعا سايكەس بولۋى ايرىقشا ماڭىزدى.

— سوندىقتان مەن جاقىن ارادا پرەمەر-مينيسترمەن جانە قۇرىلتاي توراعاسىمەن بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ جونىندە كەڭەسەمىن. سودان سوڭ ءتيىستى جارلىققا قول قويامىن. كوپ ۇزاماي ورتالىق سايلاۋ كوميسسياسى سايلاۋ وتەتىن كۇندى جاريالاۋى كەرەك، — دەپ تاپسىرما بەردى پرەزيدەنت.

بۇل قادام ءماسليحاتتاردىڭ بىلىكتى ءارى كاسىبي كورپۋسىن قالىپتاستىرۋعا جول اشىپ، ونىڭ جۇمىسىنا تىڭ سەرپىن بەرەدى.

— وسى سايلاۋدىڭ جوعارى دەڭگەيدە جانە ساپالى وتۋىنە سىزدەر دە مول ۇلەس قوساسىزدار دەپ سەنەمىن، — دەدى ق. توقاەۆ حالىق كەڭەسىنىڭ مۇشەلەرىنە.

Abai.kz