قازاقستاندا ماشينا جاساۋ سالاسىنىڭ ءوندىرىس كولەمى 2026 جىلدىڭ قاڭتار-تامىز ايلارىندا وتكەن جىلدىڭ سايكەس كەزەڭىمەن سالىستىرعاندا 21,2%-عا ارتتى. سالادا 68 مىڭنان استام ادام ەڭبەك ەتەدى.

اۆتوموبيل، تەمىرجول جانە اۋىل شارۋاشىلىعى تەحنيكاسى وندىرىسىندە جاڭا كاسىپورىندار ىسكە قوسىلىپ، وتاندىق ءونىمنىڭ ۇلەسىن ارتتىرۋعا باسىمدىق بەرىلىپ وتىر. بۇل تۋرالى ماشينا جاساۋشىلار كۇنىنە ارنالعان شولۋ ماتەريالىندا ايتىلدى.

قازاقستاندا ماشينا جاساۋشىلار كۇنى قىركۇيەكتىڭ سوڭعى جەكسەنبىسىندە اتاپ وتىلەدى. بيىل كاسىبي مەرەكە 27 قىركۇيەككە سايكەس كەلەدى. ماشينا جاساۋ ەلدىڭ وڭدەۋ ونەركاسىبىندەگى نەگىزگى باعىتتاردىڭ بىرىنە اينالىپ، اۆتوموبيل جانە تەمىرجول تەحنيكاسىنان باستاپ اۋىل شارۋاشىلىعى ماشينالارى، ەلەكتر جابدىقتارى، تۇرمىستىق تەحنيكا مەن ونەركاسىپتىك قۇرال-جابدىقتارعا دەيىنگى وندىرىستەردى قامتيدى.

ءوندىرىس قارقىنى ارتتى

ونەركاسىپ جانە قۇرىلىس مينيسترلىگىنىڭ دەرەكتەرىنە سايكەس، 2026 جىلعى 1 ناۋرىزداعى جاعداي بويىنشا قازاقستاندا ماشينا جاساۋ سالاسىندا 4 مىڭنان استام كاسىپورىن جۇمىس ىستەگەن

2026 جىلدىڭ العاشقى سەگىز ايىندا سالاداعى ءوندىرىس كولەمى ءبىر جىل بۇرىنعى كورسەتكىشتەن 21,2%-عا جوعارى بولدى. وسى كەزەڭدە وڭدەۋ ونەركاسىبىنىڭ جالپى ءوسىمى 8,4%-دى قۇراعان.

اۆتوموبيل جاساۋ وندىرىسىندەگى ءوسىم 27,7%-عا جەتتى. بۇل جەڭىل اۆتوموبيلدەر، اۆتوبۋستار، جۇك جانە ارنايى تەحنيكالار ءوندىرىسىنىڭ ارتۋىمەن بايلانىستى.

وتكەن جىلدىڭ قورىتىندىسى بويىنشا ماشينا جاساۋ سالاسىنداعى ءوندىرىس كولەمى 5,7 ترلن تەڭگەگە جەتىپ، ناقتى ءوسىم 12,9% بولدى. سالاعا سالىنعان نەگىزگى كاپيتال ينۆەستيتسياسى شامامەن 30%-عا ءوسىپ، 376,6 ملرد تەڭگەنى قۇرادى.

قازاقستاندا جاڭا اۆتوموبيل زاۋىتتارى اشىلدى

سوڭعى جىلدارى قازاقستاندا ماشينا جاساۋ ءوندىرىسى قاراپايىم قۇراستىرۋدان تولىققاندى وندىرىستىك تسيكلگە قاراي بەت الىپ كەلەدى. كاسىپورىنداردا دانەكەرلەۋ، بوياۋ، مەحانيكالىق وڭدەۋ جانە اۆتوكومپونەنتتەر شىعارۋ سياقتى وپەراتسيالار يگەرىلۋدە.

2025 جىلى قوستاناي وبلىسىندا Kia Qazaqstan زاۋىتى ىسكە قوسىلدى. جوباعا 131,5 ملرد تەڭگە ينۆەستيتسيا سالىنىپ، جىلىنا 70 مىڭ اۆتوموبيل وندىرۋگە مۇمكىندىك بەرەتىن قۋات قۇرىلدى. كاسىپورىندا شامامەن 1,5 مىڭ جۇمىس ورنى اشىلدى.

الماتىدا Astana Motors Manufacturing Kazakhstan كوپبرەندتى زاۋىتى پايدالانۋعا بەرىلدى. كاسىپورىن Chery, GWM جانە Changan اۆتوموبيلدەرىن وندىرەدى. جوباعا 182 ملرد تەڭگە ينۆەستيتسيا تارتىلىپ، وندىرىستىك قۋاتى جىلىنا 120 مىڭ اۆتوموبيلگە دەيىن جەتەدى. مۇندا شامامەن 3,6 مىڭ جۇمىس ورنى قۇرىلعان.

اۆتوكومپونەنتتەر ءوندىرىسىن دامىتۋعا دا نازار اۋدارىلۋدا. قازاقستاندا مۋلتيمەديالىق جۇيەلەر، كليماتتىق مودۋلدەر، ەدەن جابىندارى مەن اۆتوموبيل ورىندىقتارىن شىعاراتىن كاسىپورىندار جۇمىس ىستەيدى.

تەمىرجول جانە اۋىل شارۋاشىلىعى تەحنيكاسى ءوندىرىسى

تەمىرجول ماشينا جاساۋ سالاسىندا Wabtec, Alstom جانە Stadler سياقتى حالىقارالىق كومپانيالاردىڭ قاتىسۋىمەن وندىرىستىك بازا قالىپتاسقان.

2025 جىلدىڭ قورىتىندىسى بويىنشا تەمىرجول ماشينا جاساۋ ونىمدەرىنىڭ كولەمى 734 ملرد تەڭگەگە جەتىپ، ءبىر جىلدا 22,5%-عا وسكەن. وسى كەزەڭدە 114 لوكوموتيۆ جانە ءارتۇرلى تيپتەگى 3 068 ۆاگون ءوندىرىلدى.

استانادا Stadler Kazakhstan زاۋىتى جىلىنا 100 جولاۋشىلار ۆاگونىنا دەيىن شىعارا الادى. 2030 جىلعا دەيىن «قازاقستان تەمىر جولى» ءۇشىن 557 ۆاگون جەتكىزۋ جوسپارلانعان.

اۋىل شارۋاشىلىعى ماشينا جاساۋ سالاسىندا دا جاڭا وندىرىستەر ىسكە قوسىلۋدا. «اگروماشحولدينگKZ» بازاسىندا John Deere تەحنيكاسىن شىعارۋ باستالىپ، Valley جاڭبىرلاتقىش ماشينالارىن ءوندىرۋ بويىنشا وقشاۋلاۋ جۇمىستارى جۇرگىزىلۋدە.

سالادا 68 مىڭنان استام ادام جۇمىس ىستەيدى

قازاقستان ماشينا جاساۋشىلار وداعىنىڭ ۇلتتىق ستاتيستيكا بيۋروسىنا سىلتەمە جاساپ كەلتىرگەن مالىمەتىنە سايكەس، 2026 جىلدىڭ ءبىرىنشى توقسانىندا سالادا 68,3 مىڭ ادام ەڭبەك ەتكەن.

ولاردىڭ ەڭ كوپ بولىگى ماشينالار مەن جابدىقتاردى جوندەۋ جانە ورناتۋ سالاسىنا – 30,4 مىڭ ادام، ماشينالار مەن جابدىقتار وندىرۋگە – 14,2 مىڭ، اۆتوموبيلدەر، تىركەمەلەر مەن جارتىلاي تىركەمەلەر وندىرۋگە – 10,5 مىڭ ادام تيەسىلى.

ءوندىرىستىڭ كەڭەيۋىنە بايلانىستى جاڭا ماماندارعا سۇرانىس تا ارتىپ وتىر. 2025 جىلى ماشينا جاساۋ سالاسىندا كەمىندە 40 جاڭا ءوندىرىس ىسكە قوسىلىپ، شامامەن 10 مىڭ جۇمىس ورنى قۇرىلعان. 2026 جىلدىڭ سوڭىنا دەيىن تاعى 25 ينۆەستيتسيالىق جوبانى جۇزەگە اسىرۋ جوسپارلانىپ وتىر. بۇل جوبالار 3,5 مىڭنان استام جۇمىس ورنىن اشۋعا مۇمكىندىك بەرەدى.

كادر دايارلاۋعا باسىمدىق بەرىلۋدە

ماشينا جاساۋ سالاسىنىڭ دامۋى بىلىكتى جۇمىسشىلار مەن ينجەنەرلىك-تەحنيكالىق ماماندارعا دەگەن سۇرانىستى كۇشەيتتى.

2026 جىلى تەحنيكالىق جانە كاسىپتىك ءبىلىم بەرۋ جۇيەسىندەگى مەملەكەتتىك تاپسىرىستىڭ 70%-ى تەحنيكالىق ماماندىقتارعا باعىتتالعان. ماشينا جاساۋ بەيىنىندەگى ماماندار ەلىمىزدىڭ 305 كوللەدجىندە دايارلانادى.

سۇرانىسقا يە ماماندىقتاردىڭ قاتارىندا ستانوكشى، باعدارلامالىق باسقارىلاتىن ستانوك وپەراتورى، تەحنيك-مەحانيك، ەلەكترگازبەن دانەكەرلەۋشى، سلەسار-جوندەۋشى، ەلەكترسلەسار جانە تەحنيك-ەلەكترومەحانيك بار.

دۋالدى وقىتۋعا دا ەرەكشە كوڭىل بولىنۋدە. ماسەلەن، Saran Machinery قاراعاندى وبلىسىنداعى ون كوللەدجبەن مەموراندۋم جاساپ، ستۋدەنتتەردى وندىرىستىك پراكتيكا، تاعىلىمداما جانە دۋالدى وقىتۋ ارقىلى دايارلاۋدى ۇيىمداستىرعان.

جاڭا تەحنولوگيالاردىڭ ەنگىزىلۋىنە بايلانىستى ماماندارعا قويىلاتىن تالاپ تا وزگەرىپ كەلەدى. ماشينا جاساۋ سالاسىنىڭ جاڭا كاسىپتەر اتلاعىنا 11 جاڭا كاسىپ ەنگىزىلگەن. ولاردىڭ باسىم بولىگى اۆتوماتتاندىرىلعان جانە تسيفرلىق وندىرىستىك جۇيەلەرمەن جۇمىس ىستەي الاتىن كادرلارعا باعىتتالعان.

مەملەكەتتىك قولداۋ كۇشەيتىلۋدە

ماشينا جاساۋ كاسىپورىندارىنا ينۆەستيتسيا، ەكسپورتتى ىنتالاندىرۋ، جەڭىلدەتىلگەن قارجىلاندىرۋ جانە ليزينگ سياقتى مەملەكەتتىك قولداۋ تەتىكتەرى ۇسىنىلادى.

2026 جىلدان باستاپ قازاقستان تاۋار وندىرۋشىلەرىنىڭ ءتىزىلىمى ەنگىزىلدى. ول وتاندىق ءوندىرۋشى مارتەبەسىن راستاۋعا جانە ءتيىستى قولداۋ شارالارى مەن رەتتەلەتىن ساتىپ الۋلارعا قاتىسۋعا مۇمكىندىك بەرەدى.

سونىمەن قاتار ۇزاق مەرزىمدى جانە وففتەيك-كەلىسىمشارتتار تەتىگى دامىپ كەلەدى. 2026 جىلدىڭ ءبىرىنشى جارتىسىندا «سامۇرىق-قازىنا» توبى وتاندىق وندىرۋشىلەرمەن جالپى سوماسى 594 ملرد تەڭگەنى قۇرايتىن 3,8 مىڭنان استام شارت جاساسقان.

كاسىپورىنداردىڭ تەحنولوگيالىق جاڭعىرتۋىنا دا قارجى باعىتتالۋدا. 2026 جىلدىڭ سەگىز ايىندا جاڭعىرتۋ جانە ەڭبەك ونىمدىلىگىن ارتتىرۋعا جۇمسالعان شىعىنداردىڭ ءبىر بولىگى رەتىندە كاسىپورىندارعا 418,7 ملن تەڭگە وتەلگەن.

تسيفرلاندىرۋ جاڭا مامانداردى قاجەت ەتەدى

قازىرگى ماشينا جاساۋ اۆتوماتتاندىرۋ، روبوتتاندىرۋ، تسيفرلىق باسقارۋ جانە جوعارى دالدىكتەگى تەحنولوگيالارمەن تىعىز بايلانىستى.

جاڭا وندىرىستەردە بۇعان دەيىن شەتەلدە ورىندالعان بىرقاتار تەحنولوگيالىق وپەراتسيالار قازاقستاندا يگەرىلە باستادى. بۇل ءوز كەزەگىندە تسيفرلىق باعدارلامامەن باسقارىلاتىن ستانوك وپەراتورلارى، ەلەكترومەحانيكتەر، ينجەنەر-تەحنولوگتار، دانەكەرلەۋشىلەر جانە اۆتوماتتاندىرۋ مەن ساپانى باقىلاۋ ماماندارىنا سۇرانىستى ارتتىرىپ وتىر.

وسىلايشا، قازاقستانداعى ماشينا جاساۋ سالاسىنىڭ دامۋى تەك ءوندىرىس كولەمىنىڭ وسۋىمەن شەكتەلمەيدى. جاڭا كاسىپورىنداردىڭ اشىلۋى، ءوندىرىستى وقشاۋلاۋ، تسيفرلاندىرۋ جانە كادر دايارلاۋ باعىتتارىنىڭ قاتار دامۋى سالانىڭ تەحنولوگيالىق دەڭگەيىن ارتتىرۋعا باعىتتالعان.

ايتا كەتەيىك، بۇعان دەيىن استانانىڭ شەتىندە 8-گە جۋىق كولىك اۋىستىرۋ تورابى سالىناتىنىن حابارلاعان ەدىك.

Abai.kz