ازيا ويىندارىندا سپورتتىق جۇرىستەن توپ جارىپ، قۇراما قورجىنىنا توعىزىنشى التىن جۇلدەنى سالعان قازاقستاندىق جەڭىل اتلەت ياسمينا توقسانباەۆانىڭ جاعدايعا قاتىستى تۇپكىلىكتى شەشىم شىقتى. التىن قىز ياسمينانىڭ التىنى جويىلدى...

مارە سىزىعىن ءبىرىنشى بولىپ قيعان وتانداسىمىزدىڭ قۋانىشى ۋاقىتشا بولىپ شىقتى. جارىس اياقتالعان سوڭ، قارسىلاس تاراپتىڭ تۇسىرگەن شاعىمىنا بايلانىستى ۇيىمداستىرۋ كوميتەتى قازاقستاندىق سپورتشىنىڭ اياق كيىمىن ارنايى تەكسەرىستەن وتكىزگەن. ناتيجەسىندە، جاپونيادا ءوتىپ جاتقان ازيا ويىندارىنىڭ رەسمي سايتىندا ياسمينا توقسانباەۆانىڭ كورسەتكىشى جويىلىپ (ديسكۆاليفيكاتسيا), التىن جۇلدەسىنەن ايىرىلدى.

مەدالدار قايتا ءبولىنىپ، جەڭىمپاز مارتەبەسى مارەگە ەكىنشى بولىپ جەتكەن قىتايلىق سپورتشى دانزەنگۋتسزۋنگە بەرىلدى. كۇمىس جۇلدە ونىڭ وتانداسى ما ليگە بۇيىرسا، قولا مەدالدى جاپوندىق اتلەت يۋكيكو ۋمەنە ەنشىلەدى.

قازىرگى ۋاقىتتا ازيا ويىندارىنىڭ ۇيىمداستىرۋ كوميتەتى، ازيا وليمپيادالىق كەڭەسى جانە قازاقستان جەڭىل اتلەتيكا فەدەراتسياسى وسى وقيعاعا قاتىستى رەسمي تۇردە تۇسىنىكتەمە بەرە قويعان جوق.

ورىن العان جاعدايعا بايلانىستى ياسمينا توقسانباەۆا الەۋمەتتىك جەلىدەگى پاراقشاسىندا پىكىر ءبىلدىرىپ، وزىنە قولداۋ بىلدىرگەن بارشا وتانداستارىنا العىس ايتتى:

«ماعان قولداۋ كورسەتىپ، جانىمنان تابىلا بىلگەن جانداردىڭ بارلىعىنا، سونداي-اق قولداۋ بىلدىرگەن ءاربىر جانعا شەكسىز العىسىمدى ايتامىن. راقمەت ساعان، قازاقستان! بۇگىن ءبىز ازيانىڭ جاڭا رەكوردىن ورناتتىق، بۇگىن ءبىز تاريح جازدىق! ءتىپتى بۇل جەڭىستى مەنەن تارتىپ السا دا، مەن قايتا ورالىپ، مۇنى تاعى دا دالەلدەيمىن!» – دەدى سپورتشى.

ەسكە سالا كەتەيىك، ياسمينا توقسانباەۆا ايەلدەر اراسىنداعى سپورتتىق جۇرىستەن مارافوندىق قاشىقتىقتى 3 ساعات 22 مينۋت 20 سەكۋندتا باعىندىرىپ، ازيا رەكوردىن جاڭارتقان بولاتىن. مارەگە ءبىرىنشى كەلگەنىنە قاراماستان، وكىنىشكە قاراي، تەحنيكالىق ەرەجەلەرگە بايلانىستى قازاقستان قۇراماسى بۇل التىن مەدالدان ايىرىلدى.

قازىر الەۋمەتتىك جەلى قولدانۋشىلارى بۇعان قاتىستى وزدەرىنىڭ وتكىر پىكىرلەرىن ورتاعا سالۋدا...

سۋرەت: الەۋمەتتىك جەلى سكرينى.

اسلان قاجەنوۆ، سپورت ءجۋرناليسى:

– ياسمينا توقسانباەۆا التىنىنان ايىرىلدى. بولمايتىن قاتەلىكتەن. جارىس الاڭىنا كيەتىن اياق كيىمدى دۇرىس تاڭداماپتى. نەگىزى بۇل سپورتتا تىيىم سالىنعان پرەپارات قولدانىپ، دوپينگكە ىلىكسە نەمەسە سپورتتىق ءجۇرۋ ەرەجەسىن بۇزىپ، جۇگىرىپ كەتسە ديسكۆال بەرىلەتىن. و، باستا وسىدان قورىققانمىن. جوق. مۇندا باسقا سىيمايتىن ولقىلىق. كىشكەنتاي بالانىڭ قاتەلىگى.

بىرىنشىدەن، جەڭىل اتلەتيكا فەدەراتسياسى نەگە وسىنى ەسكەرمەگەن جانە نەگە ءتيىستى اياق كيىممەن قامتىماعان؟

ەكىنشىدەن، جاۋاپتى ماماندار پروبلەما تۋىنداعاندا جەدەل ارالاسىپ، نەگە ءتيىستى دەڭگەيدە شەشىپ تاستامادى؟ حالىقارالىق قاتىناستار قايدا؟ قولداۋ قايدا؟ قورعاۋ قايدا؟

نەگىزى قازاق قىزى تازا جۇگىرىپ ءوتتى. ايقىن باسىمدىقپەن جەڭدى. بىراق، قولدا بار التىننان ايىرىلىپ وتىر. قىسقاسى، جاۋاپ بەرىڭدەر! وسىندايدا قىرىلماساڭ، وسىندايدا قوشتاماساڭدار، وسىندايدا بىرىكپەسەڭ، مىڭ قىرىق ءبىر بولىپ جۇرگەنىڭنەن نە قايىر؟!

سۋرەت: الەۋمەتتىك جەلى سكرينى.

ەلجاس ءابدىلدا:

– جەڭىل اتلەت ياسمينا توقسانباەۆا ازيا ويىندارىندا ولجالاعان ادال التىنىنان ايىرىلىپتى. سەبەبىن ەستىسەڭ، سەبەپسىز كۇلەسىڭ. سپورتتىق ءجۇرىس ەرەجەسىن تۇگەل ساقتاعان. مارافون بويى جۇگىرىپ كەتپەي، ءجۇرىپ ءوتتى. دوپينگ داۋىنان دا ادا. تەك اياق كيىمى تالاپقا ساي ەمەس ەكەن...

كەشە 42 شىقىرىمدى - 3 ساعات، 22 مينۋت، 20 سەكۋندتا ءجۇرىپ ءوتىپ، قوس قىتايلىق سپورتشىنى 4 مينۋتتاي ارتتا قالدىرعانىنا قاتتى قۋانىپ ەدىك. ءوزى دە ەڭبەگىنىڭ اقتالعانىنا سەنەر-سەنبەسىن بىلمەي، كوز جاسىنا ەرىك بەردى. ەندى سونىڭ ءبارى سۋ سەپكەندەي باسىلماق...

ارماندايسىڭ. شۇمەكتەپ تەر توگەسىڭ. وسى جولدا قاتارلاستارىڭنان قالىپ، كوپ قىزىقتى قۇربان ەتەسىڭ. ەندى مىنە سونىڭ اششى تەرمەن، ءتاتتى جەمىسىن كوردىم-اۋ، دەگەنىڭدە جۇيەدەگى جۇيەسىزدىك جەڭىسىڭدى قۇربان ەتەدى. وتە وكىنىشتى...

نەگىزى بۇل اۋدان ارالىق جارىس ەمەس ەدى. ەل اتى سىنعا تۇسەتىن قۇرلىقتىق دودا. سپورتشىلار نەلىكتەن تالاپقا ساي كيىم-كەشەكپەن قامتىلمايدى؟! فۋتبولشىلاردىڭ اۋىستىرار جەيدەسى بولماي، جىرتىق فۋتبولكامەن ويىن وتكىزگەنىن تالاي كوردىك. بىراق ول ەلىمىزدە عوي، قول سىنسا جەڭ ىشىندە، دەپ اسا ابىگەرلەنبەگەنبىز. ەندى مىناۋ ۇيات! اۋزىڭدا تۇرعان نەسىبەنى، اۋىزدىعىڭنان تارتىپ الىپ قويۋ دەگەن...

وسىنىڭ ءبارى «گوس زاكۋپ» دەگەن جۇيەنىڭ كەسىرى ەمەس پە؟ كىم ارزان باعا ۇسىنادى، سونىڭ ساپاسىز تاۋارىن العاننان باسقا امال جوق. بارلىق سالادا سول. ساپا ەمەس، باعا تومەن بولسا بولدى. نەگىزى بۇل جەمقورلىقتى جويۋ ءۇشىن جاسالعان جۇيە، دەسكەن. ال شىن مانىندە شالاعايلىق پەن جەمقورلىقتىڭ كوكەسى وسى تەتىكتە ەمەس پە؟ ىندەتىپ زەرتتەسە، كەشەگى ماڭعىستاۋداعى قايعىلى جاعدايدىڭ دا ءبىر ۇشى وسىعان تيەدى. اسكەريلەر قىمبات قۇتقارۋ جەيدەسىمەن قامتىلۋى كەرەك بولعان. بىراق ءىس جۇزىندە سولاي بولدى ما...؟!

Abai.kz