قارتتار كۇنىنە وراي «ادىلەت» پارتياسى جەتىسۋ وبلىستىق فيليالىنىڭ ۇيىمداستىرۋىمەن «ءۇش ۇرپاق – ورتاق مۇرات» فەستيۆالى باستالدى.

فەستيۆالگە جەتىسۋ وبلىسىنىڭ اۋدان-قالالارىنان كەلگەن اعا بۋىن وكىلدەرى قاتىستى. ولاردىڭ قاتارىندا وبلىسقا تانىمال زيالى قاۋىم وكىلدەرى، ءتۇرلى سالانىڭ ارداگەرلەرى مەن بەلسەندى ازاماتتار بولدى.

شاراعا تەكەلى قالاسىنداعى «شاپاعات» قارتتار ءۇيىنىڭ تۇرعىندارى دا قاتىستى. دەمەۋشىلەردىڭ قولداۋىمەن قارتتار ۇيىنە دىبىستىق اپپاراتۋرا تابىستالدى.

فەستيۆال اياسىندا بيكەن ريموۆا اتىنداعى تالدىقورعان دراما تەاترىندا «تۋعان كۇنىڭىزبەن، اناشىم!» اتتى پرەمەرا قويىلىپ، كورەرمەن نازارىنا ۇسىنىلدى.

قويىلىمدى اۋدان-قالالاردان كەلگەن 300-گە جۋىق قاريا جانە 200 جاس تاماشالادى.

- ءبىزدىڭ باستى ماقساتىمىز – اعا بۋىن وكىلدەرىنىڭ ساپالى ءارى بەلسەندى ءومىر سۇرۋىنە جاعداي جاساۋ. قاريالاردىڭ قاجەتتى مەديتسينالىق كومەكتى ۋاقىتىلى الىپ، دەنساۋلىعىن تۇراقتى باقىلاۋدا ۇستاۋى – ماڭىزدى مىندەتتەردىڭ ءبىرى. وسى باعىتتاعى جۇيەلى جۇمىستار ارقىلى ازاماتتاردىڭ ءومىر ءسۇرۋ ساپاسىن ارتتىرىپ، ەلىمىزدەگى ورتاشا ءومىر ءسۇرۋ ۇزاقتىعىن 77 جاسقا دەيىن جەتكىزۋگە ءوز ۇلەسىمىزدى قوسۋدى كوزدەيمىز، – دەدى «ادىلەت» پارتياسى جەتىسۋ وبلىستىق فيليالىنىڭ توراعاسى امانگەلدى عابدىلكارىمۇلى ەسباي.

ال پارتيا ارداگەرى ەرعازى قوشانبەكۇلى فەستيۆالدىڭ اعا بۋىن ءۇشىن ماڭىزىن اتاپ ءوتتى.

- ءبىز ءۇشىن مۇنداي كەزدەسۋلەردىڭ ورنى بولەك. جاستاردىڭ اراسىندا وتىرىپ، ولاردىڭ ونەرىن كورىپ، اڭگىمەلەسۋدىڭ ءوزى ۇلكەن قۋانىش. ءبىزدىڭ بۋىننىڭ كورگەنى مەن تۇيگەنى كوپ. سول تاجىريبەنى كەيىنگى ۇرپاققا جەتكىزۋ – ءبىزدىڭ مىندەتىمىز. بۇگىنگى قويىلىم دا اتا-اناعا دەگەن قۇرمەتتى، وتباسىنىڭ قادىرىن جاقسى كورسەتتى، – دەدى ەرعازى قوشانبەكۇلى.

اناعا دەگەن قۇرمەت، وتباسى قۇندىلىعى، اتا-اناعا دەگەن جاۋاپكەرشىلىك پەن ۇرپاقتار اراسىنداعى بايلانىس كورىنىس تاپقان قويىلىم كورەرمەنگە وي سالدى.

«ءۇش ۇرپاق – ورتاق مۇرات» فەستيۆالى اياسىنداعى بۇل شارا اعا بۋىن مەن جاستاردى ءبىر ورتاعا جيناپ، ۇرپاقتار اراسىنداعى بايلانىستى نىعايتۋعا باعىتتالدى.

Abai.kz