يراننىڭ ءۇش ازاماتى قازاقستان شەكاراسىن زاڭسىز كەسىپ وتكەنى ءۇشىن سوتتالدى...

يراننىڭ ءۇش ازاماتى كاسپي تەڭىزى ارقىلى مەملەكەتتىك شەكارانى زاڭسىز كەسىپ وتكەنى ءۇشىن ەلدەن شىعارىپ جىبەرۋ جازاسىمەن بىرگە ءبىر جىلعا باس بوستاندىعىنان ايىرىلدى، دەپ حابارلايدى باس پروكۋراتۋرانىڭ ءباسپاسوز قىزمەتى.

«اعىمداعى جىلدىڭ 24 شىلدەسىندە يسلام رەسپۋبليكاسىنىڭ ءۇش ازاماتى بالىق اۋلاۋ كەزىندە كاسپي تەڭىزى ارقىلى قازاقستان رەسپۋبليكاسىنىڭ مەملەكەتتىك شەكاراسىن زاڭسىز كەسىپ وتكەن. اتالعان ازاماتتاردى قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ اسكەري قىزمەتشىلەرى ۇستادى.

وسى فاكت بويىنشا قازاقستان رەسپۋبليكاسى قىلمىستىق كودەكسىنىڭ 392-بابىنىڭ 1-1-بولىگى، ياعني مەملەكەتتىك شەكارا ارقىلى وتكىزۋ پۋنكتتەرىنەن تىس جەردە ادامدار توبىنىڭ الدىن الا ءسوز بايلاسۋىمەن مەملەكەتتىك شەكارانى قاساقانا زاڭسىز كەسىپ ءوتۋى بويىنشا قىلمىستىق ءىس قوزعالدى.

قاراقيا اۋداندىق سوتىنىڭ ۇكىمىمەن يران يسلام رەسپۋبليكاسىنىڭ ءۇش ازاماتى كىنالى دەپ تانىلدى. ولارعا قازاقستان رەسپۋبليكاسىنىڭ شەگىنەن تىسقارى جەرگە شىعارىپ جىبەرە وتىرىپ، 1 جىل مەرزىمگە باس بوستاندىعىنان ايىرۋ جازاسى تاعايىندالدى»، — دەلىنگەن حابارلامادا.

Abai.kz