قازاقستاننىڭ سىرتقى ىستەر مينيسترلىگى شەتەلدىكتەر ءۇشىن ەلگە كىرۋدىڭ جاڭارتىلعان تالاپتارى مەن QazETA جۇيەسىنە بايلانىستى رەسەيلىك تاراپتىڭ وتىنىشىنە رەسمي تۇسىنىكتەمە بەردى. ۆەدومستۆو وكىلى جاڭا ءتارتىپ تۋرالى بارلىق اقپارات سەرىكتەس مەملەكەتتەرگە ديپلوماتيالىق ارنالار ارقىلى تولىق جەتكىزىلگەنىن مالىمدەدى.

سىرتقى ىستەر مينيسترلىگىنىڭ رەسمي وكىلى جانبولات ۇسەنوۆ مالىمدەگەندەي، ەلىمىزگە ۆيزاسىز كەلۋ قۇقىعى بار 85 مەملەكەتتىڭ، سونىڭ ىشىندە رەسەيدىڭ دە ازاماتتارى ءۇشىن QazETA ەلەكتروندىق رۇقسات بەرۋ جۇيەسى قولدانىلادى. اتالعان تەتىك بويىنشا ءتۇسىندىرۋ ماتەريالدارى ءتيىستى ەلدەردىڭ ەلشىلىكتەرىنە الدىن الا جىبەرىلگەن.

«قازىرگى ۋاقىتتا QazETA جۇيەسى بويىنشا تولىق اقپارات اتالعان بارلىق مەملەكەتكە ديپلوماتيالىق ارنالار ارقىلى بەرىلدى»، – دەپ مالىمدەدى جانبولات ۇسەنوۆ.

رەسمي وكىلدىڭ ايتۋىنشا، ەلەكتروندىق رۇقساتتى رەسىمدەۋ ءتارتىبى قازاقستاننىڭ شەتەلدەگى مەكەمەلەرىنىڭ رەسمي سايتتارى مەن اقپاراتتىق رەسۋرستارىندا قوسىمشا جاريالانادى. بۇل شەتەلدىكتەرگە وزگەرىستەرمەن ەرتەرەك تانىسۋعا مۇمكىندىك بەرەدى.

سونىمەن قاتار ەلىمىزدىڭ قۇزىرەتتى ورگاندارى جاقىن كۇندەرى استانادا تىركەلگەن ديپلوماتيالىق ميسسيالار ءۇشىن QazETA جۇيەسىنىڭ جۇمىس ەرەكشەلىكتەرىن تۇسىندىرەتىن ارنايى بريفينگ وتكىزۋدى جوسپارلاپ وتىر.

ماسكەۋ قانداي ساۋال جولدادى؟

بۇعان دەيىن رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا بريفينگ بارىسىندا جاڭا ەرەجەلەرگە قاتىستى قازاقستاننان قوسىمشا تۇسىنىكتەمە كۇتەتىندەرىن بىلدىرگەن بولاتىن. ونىڭ سوزىنشە، جاڭا نورمالار ەۋرازيالىق ەكونوميكالىق وداق (ەاەو) ازاماتتارىنا دا ورتاق بولعاندىقتان، شەكارالىق ءتارتىپتىڭ حالىقارالىق كەلىسىمدەرمەن قالاي ۇيلەسەتىنىن ناقتىلاۋ ماڭىزدى.

«ءبىز مەملەكەتتىڭ ۇلتتىق كوشى-قون زاڭناماسىن جەتىلدىرۋگە دەگەن ەگەمەن قۇقىعىنا قۇرمەتپەن قارايمىز. جاڭا تالاپتار ەۋرازيالىق ەكونوميكالىق وداققا مۇشە ەلدەردىڭ ازاماتتارىنا دا قاتىستى بولعاندىقتان، قولدانىستاعى حالىقارالىق كەلىسىمدەردى ەسكەرە وتىرىپ، قازاقستاندىق تاراپتان قوسىمشا تۇسىندىرمە كۇتەمىز»، – دەدى ماريا زاحاروۆا.

QazETA قالاي جانە قاي مەرزىمدە ەنگىزىلەدى؟

قازاقستان ۇكىمەتى شەتەلدىكتەردىڭ ەلگە كەلۋى، ۋاقىتشا بولۋى جانە كەرى شىعۋى ەرەجەلەرىنە وزگەرىستەر ەنگىزگەن ەدى. قۇجاتقا ساي، شەكارادان ۆيزاسىز وتەتىن شەتەلدىكتەرگە تسيفرلىق كىرۋ رۇقساتىن الۋ تالابى قويىلادى. رۇقسات ونلاين تۇردە تەگىن بەرىلەدى، وعان ساپارعا دەيىن كەمىندە 72 ساعات بۇرىن ءوتىنىم تاپسىرۋ قاجەت. الىنعان قۇجات 180 كۇن بويى جارامدى سانالادى.

جۇيە بىرنەشە كەزەڭ بويىنشا ىسكە قوسىلادى:

2026 جىلعى 1 قاراشادان باستاپ — اقتاۋ اۋەجايىندا جانە ءتورت اۆتوكولىك وتكىزۋ پۋنكتىندە («ۇرلىتوبە»، «اۋقاتتى»، «اتامەكەن»، «نۇرلى جول») سىناق رەجيمى جۇرەدى;

2027 جىلعى 1 قاڭتاردان باستاپ — استانا مەن الماتى اۋەجايلارىندا تەكسەرۋ باستالادى;

2027 جىلعى 1 ناۋرىزدان باستاپ — بارلىق وتكىزۋ بەكەتتەرىنە تاراتىلادى.

سىناق كەزەڭىندە ەلەكتروندى رۇقساتى بولماعان شەتەلدىكتەرگە ەلگە كىرۋدەن باس تارتىلمايدى، شەكاراشىلار تەك اقپاراتتىق ەسكەرتۋ جاسايدى. ال 2027 جىلدىڭ 1 شىلدەسىنەن باستاپ QazETA شەكارادان ءوتۋ ءۇشىن مىندەتتى تالاپقا اينالماق.

Abai.kz