قازاقستاندا بەيبىت جينالىستار وتكىزۋ ءراسىمى جەڭىلدەتىلىپ، ساياسي پارتيالاردى تىركەۋگە قويىلاتىن تالاپتار تومەندەتىلدى. سونىمەن قاتار كاسىپوداقتاردىڭ قىزمەتىنە قاتىستى بىرقاتار تالاپتار قايتا قارالدى. بۇل تۋرالى ۆارشاۆادا ءوتىپ جاتقان ەقىۇ-نىڭ ادامي ولشەم جونىندەگى كونفەرەنتسياسىندا «ۇلتتىق وركەندەۋگە جاردەمدەسۋ قورى» قوعامدىق قورىنىڭ ساراپشىسى داۋلەت ساعاتبەك ايتتى.

ونىڭ سوزىنشە، اتالعان وزگەرىستەر ازاماتتاردىڭ ەلدىڭ قوعامدىق ومىرىنە ارالاسۋىنا جاڭا مۇمكىندىكتەر اشتى.

«قازاقستان ءۇشىن ماڭىزدى قادامداردىڭ ءبىرى – بەيبىت جينالىستار تۋرالى زاڭنامانى جاڭارتۋ جانە راسىمدەردى بارىنشا تۇسىنىكتى ءارى جەڭىلدەتىلگەن تارتىپكە كوشىرۋ بولدى»، – دەدى ساراپشى.

ساعاتبەك 2020 جىلدان باستاپ پيكەت، جينالىس جانە ميتينگ وتكىزۋ ءۇشىن حابارلاما ءتارتىبى ەنگىزىلگەنىن اتاپ ءوتتى. ۇيىمداستىرۋشىلار ءتيىستى حابارلامانى ءىس-شاراعا دەيىن بەس جۇمىس كۇنىنەن كەشىكتىرمەي بەرەدى. ونى جەرگىلىكتى اكىمدىك ءۇش جۇمىس كۇنى ىشىندە قارايدى. ەگەر وسى مەرزىمدە جاۋاپ بەرىلمەسە، ءىس-شارا حابارلامادا كورسەتىلگەن تارتىپپەن وتكىزىلۋى مۇمكىن.

ساراپشى كەلتىرگەن مالىمەتكە سايكەس، ەل بويىنشا بەيبىت جينالىستار وتكىزۋگە ارنالعان 907 ارنايى ورىن جانە شەرۋ مەن دەمونستراتسيالارعا ارنالعان 588 مارشرۋت بەلگىلەنگەن. ال ءىس-شارا وتكىزۋگە رۇقسات بەرىلمەس بۇرىن جەرگىلىكتى اكىمدىك ۇيىمداستىرۋشىعا ونىڭ وتەتىن ورنى نەمەسە ۋاقىتىن وزگەرتۋ مۇمكىندىگىن ۇسىنۋعا مىندەتتى.

سونداي-اق ساراپشى بىرلەسۋ ەركىندىگىنە قاتىستى وزگەرىستەرگە توقتالدى. 2022 جىلدان باستاپ ساياسي پارتيانى تىركەۋ ءۇشىن قاجەتتى مۇشەلەردىڭ ەڭ تومەنگى سانى 20 مىڭنان 5 مىڭعا دەيىن ازايتىلدى. ال وڭىرلىك بولىمشەلەر ءۇشىن بۇل كورسەتكىش 600-دەن 200 ادامعا، باستاماشىل توپ ءۇشىن 1 مىڭنان 700 ازاماتقا دەيىن تومەندەتىلدى.

كاسىپوداقتاردىڭ قىزمەتىنە قاتىستى دا وزگەرىستەر ەنگىزىلدى. 2020 جىلى كاسىپوداقتاردىڭ جوعارى تۇرعان بىرلەستىكتەرگە مىندەتتى تۇردە كىرۋ تالابى الىنىپ تاستالىپ، ولاردىڭ مارتەبەسىن راستاۋ ءتارتىبى جەڭىلدەتىلدى. بۇل راسىمنەن ءوتۋ مەرزىمى التى ايدان ون ەكى ايعا دەيىن ۇزارتىلدى.

ساعاتبەكتىڭ مالىمەتىنشە، قازاقستاندا 23 مىڭنان استام ءتۇرلى بىرلەستىك تىركەلگەن. ونىڭ ىشىندە 11 مىڭنان استام قوعامدىق بىرلەستىك جانە 520 كاسىپوداق بار. ولار قوعامدىق كەڭەستەردىڭ جۇمىسىنا، نورماتيۆتىك قۇقىقتىق اكتىلەر جوبالارىن جانە الەۋمەتتىك ماڭىزى بار باستامالاردى تالقىلاۋعا قاتىسادى.

سونىمەن قاتار زاڭ ولاردىڭ دەربەستىگىنە كەپىلدىك بەرىپ، قىزمەتىنە زاڭسىز ارالاسۋعا جول بەرمەيدى.

ساراپشىنىڭ باعالاۋىنشا، راسىمدەردى جەڭىلدەتۋ جانە ازاماتتاردىڭ قوعامدىق ومىرگە قاتىسۋ مۇمكىندىگىن كەڭەيتۋ ازاماتتىق قوعامدى دامىتۋعا ءارى مەملەكەت پەن قوعام اراسىنداعى ديالوگتى نىعايتۋعا جاعداي جاسايدى.

Abai.kz