الماتى قالاسىنىڭ المالى اۋداندىق سوتىندا سانجار بوقاەۆ، ونىڭ جيەنى ماديار قالمەنوۆ جانە جەكە موبيلوگرافى ۇلان نۇسىپقوجاعا قاتىستى قىلمىستىق ءىس بويىنشا كەزەكتى سوت وتىرىسى باستالدى.

سوتتالۋشىلارعا الاياقتىق جاساۋ، قىلمىستىق جولمەن الىنعان كىرىستەردى زاڭداستىرۋ، ۇرلىق، اعاشتاردى زاڭسىز كەسۋ جانە كورىنەۋ جالعان اقپارات تاراتۋ بويىنشا ايىپتار تاعىلعان.

سوتتا كۋاگەرلەردەن جاۋاپ الۋ جالعاسىپ جاتىر. اتاپ ايتقاندا، «قازترانسگاز» كاسىپوداعىنىڭ 42 ميلليون تەڭگەدەن استام قاراجاتىن جىمقىرۋعا قاتىستى قارجىلىق ەپيزودتار قارالۋدا.

بۇعان دەيىنگى سوت وتىرىستارىندا بوقاەۆتىڭ اۆتوكەرۋەن ۇيىمداستىرۋداعى، مەردىگەرلەردى تاڭداۋداعى جانە بولىنگەن قارجىنى باسقارۋداعى ونىڭ رولىنە قاتىستى بىرقاتار دەرەك ايتىلدى.

«قازترانسگاز» اق-نىڭ بۇرىنعى باس ديرەكتورى رۋستام سۇلەيمانوۆتىڭ ايتۋىنشا، بوقاەۆ كومپانيادا ءوز بەتىنشە ارەكەت ەتكەن. ول باسشىلىقپەن كەلىسپەستەن ءوز بەتىنشە شەشىم قابىلداپ، اۆتوكەرۋەندى ۇيىمداستىرۋ جۇمىستارىنا جەكە ءوزى جەتەكشىلىك ەتكەن. ال بوقاەۆتى باس ديرەكتوردىڭ كەڭەسشىسى قىزمەتىنە قايرات شارىپباەۆتىڭ ءوزى تاعايىنداعان. سۇلەيمانوۆتىڭ سوتتا بەرگەن جاۋابىنا قاراعاندا، كومپانيا باسشىلىعى اۋىسقاننان كەيىن دە بوقاەۆ بۇرىنعى ارتىقشىلىقتارىن ساقتاپ قالعان. ول ءىس جۇزىندە قالىپتاسقان قىزمەتتىك باعىنىستىلىق تارتىبىنەن تىس ارەكەت ەتىپ، اتقارىپ جۇرگەن جۇمىسىنىڭ ەگجەي-تەگجەيىن جاڭا باسشىلىققا بايانداۋدى قاجەت دەپ ساناماعان كورىنەدى.

كومپانيانىڭ ءباسپاسوز قىزمەتىنىڭ بۇرىنعى باسشىسى بەكسۇلتان قۇرمانقۇلدىڭ ايتۋىنشا، بوقاەۆ مەردىگەرلەردى ءوزى الىپ كەلىپ، الدىن الا دايىندالعان شىعىن سمەتالارىن ۇسىنعان. ال كاسىپوداق كوميتەتى وتىرىسىنىڭ حاتتاماسىنا ماسەلەلەر ءىس جۇزىندە تالقىلانباستان، تەك فورمالدى تۇردە قول قويىلعان.

تاعى ءبىر كۋاگەر، «MLS-Group» جشس-ءنىڭ بۇرىنعى ديرەكتورى جارمۇحامەد سۇلتانوۆ تۇسىرىلمەگەن دەرەكتى فيلم ءۇشىن بوقاەۆقا 12,3 ميلليون تەڭگەنى قولما-قول بەرگەنىن مالىمدەدى. ونىڭ سوزىنشە، جارنامالىق قىزمەتتەر ءۇشىن تۇسكەن قاراجاتتىڭ ءبىر بولىگى بوقاەۆتىڭ جيھاز كاسىبىن دامىتۋعا جۇمسالعان.

بۇعان دەيىن كاسىپوداقتىڭ بۇرىنعى ءتورايىمى زاۋرەش ماحانوۆا دا مەردىگەر كومپانيالاردى بوقاەۆتىڭ ءوزى ۇسىنعانىن ايتقان بولاتىن. ونىڭ مالىمدەۋىنشە، بوقاەۆتىڭ جيەنى كەلىسىمشارتتاردى الدىن الا ازىرلەپ، ءتيىستى سومالارىن كورسەتىپ، قول قويۋعا دايىن كۇيىندە اكەلىپ وتىرعان.

Abai.kz