استانادا Astana Media Week 2026 مەرەيتويلىق مەديا اپتالىعى اياسىندا «تۇمار» جانە «ۇركەر» ۇلتتىق سىيلىقتارىنىڭ جەڭىمپازدارىن ماراپاتتاۋ ءراسىمى ءوتتى. بيىل قوس سىيلىق العاش رەت Qazaqstan Media Awards ورتاق اتاۋىمەن تابىستالدى.

سالتاناتتى ءىس-شاراعا ەلىمىزدىڭ تۇكپىر-تۇكپىرىنەن وتاندىق مەديا سالاسىنىڭ وكىلدەرى، جۋرناليستەر، رەداكتورلار، تەلەجۇرگىزۋشىلەر مەن شىعارماشىلىق ۇجىمدار قاتىستى.

ماراپاتتاۋ راسىمىندە قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ ءسوز سويلەدى. مينيستر جاڭا تەحنولوگيالار مەن جاساندى ينتەللەكت قانشالىقتى قارقىندى دامىسا دا، كاسىبي جۋرناليستيكا مەن ءوز ىسىنە ادال ماماندار قاشاندا سۇرانىسقا يە بولاتىنىن اتاپ ءوتتى.

«مەملەكەت باسشىسى جۋرناليستيكا سالاسىنا ءاردايىم ەرەكشە كوڭىل ءبولىپ، الەۋمەتتىك جانە مورالدىق تۇرعىدان ۇنەمى قولداۋ كورسەتىپ كەلەدى. بولاشاقتا دا مەملەكەتتىڭ مەديا سالاسىنا قاتىستى ساياساتى وزگەرمەيدى دەپ ويلايمىن»، – دەدى ارمان قىرىقباەۆ.

ءىس-شاراعا قازاقستان رەسپۋبليكاسى قۇرىلتايىنىڭ دەپۋتاتتارى سەرگەي پونومارەۆ، ءۇنزيلا شاپاق، جاناربەك ءاشىمجان، قازاقستان حالىق كەڭەسىنىڭ مۇشەسى نۇرتورە ءجۇسىپ، Q.AI باس ديرەكتورى دميتري مۋن، ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي، قازاقستان رەسپۋبليكاسىنىڭ پرەزيدەنتى جانىنداعى ورتالىق كوممۋنيكاتسيالار قىزمەتىنىڭ ديرەكتورى اسقار وماروۆ، سونداي-اق مەملەكەتتىك ورگاندار مەن مەديا سالاسىنىڭ وزگە دە وكىلدەرى قاتىستى.

بيىل بايقاۋدىڭ 12 نوميناتسياسى بويىنشا 600-دەن استام ءوتىنىم ءتۇستى. سىيلىققا تەلەۆيزيا، ءباسپاسوز، راديو جانە ينتەرنەت جۋرناليستيكاسى سالاسىنداعى جۇمىستار قابىلداندى.

وسى جىلى زاماناۋي مەدياتەحنولوگيالار مەن جۋرناليستيكانىڭ جاڭا فورماتتارىن دامىتۋعا ايرىقشا نازار اۋدارىلدى. العاش رەت «جۋرناليستيكانىڭ بولاشاعى: جاساندى ينتەللەكت سالاسىنداعى ۇزدىك جوبا» نوميناتسياسى ەنگىزىلدى.

جەڭىمپازداردى بەلگىلى جۋرناليستەر، مەديا سالاسىنىڭ وكىلدەرى مەن سالا ساراپشىلارىنان قۇرالعان تاۋەلسىز قازىلار القاسى انىقتادى.

«تۇمار» جانە «ۇركەر» ۇلتتىق سىيلىقتارى 2017 جىلى قازاقستان رەسپۋبليكاسى مادەنيەت جانە اقپارات مينيسترلىگىنىڭ باستاماسىمەن تاعايىندالعان. «تۇمار» سىيلىعى وتاندىق تەلەۆيزيانى قولداۋعا جانە دامىتۋعا باعىتتالسا، «ۇركەر» ءباسپاسوز، راديو جانە ينتەرنەت جۋرناليستيكاسىنداعى جەتىستىكتەر ءۇشىن بەرىلەدى.

2026 جىلعى «تۇمار» جانە «ۇركەر» ۇلتتىق سىيلىقتارىنىڭ جەڭىمپازدارى:

«تۇمار – 2026» ۇلتتىق تەلەۆيزيالىق سىيلىعى

ۇزدىك تەلەجۇرگىزۋشى – ۆەرونيكا ۆيشنەۆسكايا، «ەۋرازيا» ءبىرىنشى ارناسى;

ۇزدىك دەرەكتى جوبا – 24KZ, «4739»;

ۇزدىك تەلەۆيزيالىق ماتەريال – Qazaqstan, «قارقىندى قۇرىلىس»;

ۇزدىك الەۋمەتتىك جوبا – Jibek Joly, «پراۆدا ۆ دەتالياح»;

ۇزدىك تەلەحيكايا – استانا TV, «اۋىل باپكەرى»;

ۇزدىك اقپاراتتىق-تالدامالىق باعدارلاما – 7-ارنا، «نوۆوستي».

«ۇركەر – 2026» ۇلتتىق سىيلىعى

جىلدىڭ ۇزدىك ءجۋرناليسى – جانار سەردالينا;

ۇزدىك راديوجوبا – قازاق راديوسى، «ويتۇما» باعدارلاماسى;

جۋرناليستيكانىڭ بولاشاعى: جاساندى ينتەللەكت سالاسىنداعى ۇزدىك جوبا – Altainews Media Centre, «AI-جان»;

ۇزدىك مەدياجوبا – Tengrinews, Tengri TV;

جىلدىڭ ۇزدىك ماتەريالى – ميرامگۇل راحاتقىزى، «اقتوبە» گازەتى، «جاساندى ينتەللەكت: ادامزات جاڭا داۋىرگە اياق باستى»;

ۇزدىك تالدامالىق ماتەريال – لاۋرا تۋسۋپبەكوۆا، «كازاحستانسكايا پراۆدا» گازەتى، «مويا دنك – ناشە بوگاتستۆو».

Qazaqstan Media Awards – 2026 ارنايى جۇلدەلەرى

قازاقستان رەسپۋبليكاسى پرەزيدەنتىنىڭ تەلەراديوكەشەنى – 30 جىل;

ينفورمبيۋرو – 30 جىل.

Abai.kz