ەرتىس-بايان ءوڭىرىنىڭ ءدامى: پاۆلودارلىق جارمەڭكە ەلوردالىق ساتىپ الۋشىلاردى تاعى دا ءتانتى ەتتى. 

615 تونناعا جۋىق ءونىم، 80-نەن استام ءوندىرۋشى جانە ورتاشا نارىقتىق باعادان 10-15%-عا تومەن باعا. پاۆلودار وبلىسى ەلوردا تۇرعىندارىنا ساپالى ازىق-تۇلىكتىڭ مول تاڭداۋىن جانە جەرگىلىكتى وندىرۋشىلەردىڭ ۇزدىك ونىمدەرىن ۇسىندى.

17-18 قازان كۇندەرى استانا قالاسىنداعى «قازانات» يپپودرومىنىڭ اۋماعىندا پاۆلودار وبلىسىنىڭ اۋىل شارۋاشىلىعى جارمەڭكەسى وتۋدە.

جارمەڭكەدە 10 اۋداننىڭ، سونداي-اق پاۆلودار، اقسۋ جانە ەكىباستۇز قالالارىنىڭ 80-نەن استام اۋىل شارۋاشىلىعى تاۋارىن وندىرۋشىلەر مەن وڭدەۋشى كاسىپورىندارى ءوز ونىمدەرىن ۇسىنۋدا. ساۋدا سورەلەرىندە ەت، كوكونىس، كارتوپ، بال، ءسۇت جانە بالىق ونىمدەرى، شۇجىق ونىمدەرى، ۇن، ماكارون جانە باسقا دا تاۋارلار بار.

ءونىمنىڭ باسىم بولىگىن كارتوپ، كوكونىستەر مەن باقشا داقىلدارى قۇرادى - 440 توننا. سونىمەن قاتار ساتىپ الۋشىلارعا 102 توننا ەت جانە جەرگىلىكتى جەردە وندىرىلگەن ونىمدەردىڭ مول ءتۇرى ۇسىنىلدى.

ەلوردا تۇرعىندارى قولجەتىمدى باعاعا، ونىمدەردىڭ ساپاسىنا جانە تاۋارلاردى وندىرۋشىلەردىڭ وزىنەن تىكەلەي ساتىپ الۋ مۇمكىندىگىنە جوعارى باعا بەردى.

- كارتوپ الۋعا كەلىپ، ەت پەن بال دا ساتىپ الدىق. ونىمدەر وتە ساپالى، تاڭداۋ مول، باعاسى قولجەتىمدى. مۇنداي جارمەڭكەلەر وتە قاجەت، - دەدى ەلوردا تۇرعىندارىنىڭ ءبىرى.

- پاۆلودار جارمەڭكەسىن ءاردايىم اسىعا كۇتەمىز. اسىرەسە ەت ۇنايدى، ال بۇگىن كوكونىستەر دە الدىق. ونىمدەردى تىكەلەي وندىرۋشىلەردەن ساتىپ الۋعا مۇمكىندىك بولعانى جاقسى، - دەپ اتاپ ءوتتى جارمەڭكەگە كەلۋشىلەر.

ءوڭىر مادەني باعدارلاماسىن دا ۇسىندى. گ. ن. پوتانين اتىنداعى مۋزەي ەكسپوناتتارىنىڭ كورمەسى ۇيىمداستىرىلىپ، «شاڭىراق» مادەني-ساۋىق ورتالىعىنىڭ ونەرپازدارى مەن وبلىس اۋداندارىنىڭ شىعارماشىلىق ۇجىمدارى كونتسەرتتىك باعدارلاما كورسەتتى.

جارمەڭكە جەرگىلىكتى وندىرۋشىلەردىڭ ونىمدەرىن كەڭىنەن تانىستىرۋعا، وڭىرلىك برەندتەردى ناسيحاتتاۋعا جانە ەلوردا تۇرعىندارىن ەرتىس-بايان ءوڭىرىنىڭ مادەنيەتى مەن شىعارماشىلىق الەۋەتىمەن تانىستىرۋعا مۇمكىندىك بەردى.

Abai.kz