مەملەكەتتىلىكتىڭ قالىپتاسۋ تاريحىندا ايرىقشا ورنى بار رەسپۋبليكا كۇنى بيىل دا الماتى وبلىسىندا ەرەكشە سالتاناتپەن اتاپ ءوتتى. ءوڭىردىڭ بارلىق اۋدان-قالاسىندا مەملەكەتتىك تۋ كوتەرۋ راسىمدەرى ۇيىمداستىرىلىپ، مەرەكەلىك كونتسەرتتەر مەن ءتۇرلى پاتريوتتىق ءىس-شارالار ۇيىمداستىرىلدى.

ۇلتتىق مەرەكەگە ارنالعان نەگىزگى سالتاناتتى شارالاردىڭ ءبىرى وبلىس ورتالىعى قوناەۆ قالاسىندا وتكىزىلدى. وعان الماتى وبلىسىنىڭ اكىمى شىڭعىس ءارىنوۆ باستاعان ءوڭىر اكتيۆى، وبلىستىق باسقارمالاردىڭ باسشىلارى، زيالى قاۋىم وكىلدەرى، قۇقىق قورعاۋ ورگاندارىنىڭ قىزمەتكەرلەرى، قوعامدىق ۇيىم مۇشەلەرى، جاستار جانە قالا تۇرعىندارى قاتىستى.

سالتاناتتى جيىن مەملەكەتتىك تۋدى كوتەرۋ راسىمىمەن باستالدى. كوك بايراق كوككە كوتەرىلگەن ساتتە جينالعان كوپشىلىك قازاقستان رەسپۋبليكاسىنىڭ مەملەكەتتىك گيمنىن بىرگە شىرقادى. ەل تاۋەلسىزدىگى مەن تۇتاستىعىن دارىپتەگەن بۇل ءراسىم مەرەكەنىڭ ماڭىزىن ايشىقتاي ءتۇستى.

وبلىس ورتالىعىنداعى سالتاناتتى شاراعا 2 مىڭنان استام ادام جينالدى. قولدارىنا كوك بايراق ۇستاعان تۇرعىندار ەلدىك پەن بىرلىكتىڭ، بەيبىتشىلىك پەن تۇراقتىلىقتىڭ ماڭىزىن پاش ەتتى. ءتۇرلى ەتنوس وكىلدەرى مەن جاستاردىڭ مەرەكەگە بەلسەندى قاتىسۋى قوعامداعى تاتۋلىق پەن ءوزارا قۇرمەتتىڭ كورىنىسىنە اينالدى.

بيىلعى مەرەكە الماتى وبلىسىندا تەك سالتاناتتى جيىندارمەن عانا شەكتەلگەن جوق. ءوڭىردىڭ الەۋمەتتىك-ەكونوميكالىق دامۋىنا سەرپىن بەرەتىن بىرقاتار ماڭىزدى نىسان پايدالانۋعا بەرىلدى.

وبلىس بويىنشا رەسپۋبليكا كۇنىنە وراي 250-گە جۋىق ءىس-شارا وتكىزىلىپ، 28 جاڭا نىساننىڭ اشىلۋى تۇرعىندار ءۇشىن مەرەكەلىك تارتۋعا اينالدى.

مەرەكەلىك باعدارلامالار وبلىستىڭ بارلىق اۋدان-قالاسىن قامتىدى. مادەنيەت مەكەمەلەرىندە كونتسەرتتەر، پاتريوتتىق كەزدەسۋلەر مەن تانىمدىق شارالار ۇيىمداستىرىلىپ، تۇرعىندارعا مەرەكەلىك كوڭىل كۇي سىيلادى.

قوناەۆ قالاسىنداعى سالتاناتتى جيىن وبلىس ونەرپازدارىنىڭ كونتسەرتتىك باعدارلاماسىمەن جالعاستى. كوپشىلىك ونەرپازدارعا قوسىلىپ، پاتريوتتىق شىعارمالاردى بىرگە ورىندادى.

الماتى وبلىسىندا ۇيىمداستىرىلعان مەرەكەلىك ءىس-شارالار دا وسى قۇندىلىقتاردى ناسيحاتتاۋعا باعىتتالدى. اسىرەسە، جاستاردىڭ بەلسەندى قاتىسۋى وسكەلەڭ ۇرپاقتىڭ بويىندا وتانسۇيگىشتىك سەزىمدى قالىپتاستىرۋدىڭ ماڭىزىن كورسەتتى.

وڭىردە كەڭ كولەمدە اتاپ وتىلگەن رەسپۋبليكا كۇنى ەل تاريحىنا قۇرمەت كورسەتىپ، تاۋەلسىزدىكتىڭ قادىرىن ۇعىندىراتىن، قوعامدى ورتاق ماقساتقا جۇمىلدىراتىن ماڭىزدى مەرەكەلىك وقيعاعا اينالدى.

Abai.kz