الماتى قالاسىنىڭ المالى اۋداندىق سوتىندا سانجار بوقاەۆقا، ونىڭ جيەنى ماديار قالمەنوۆكە جانە جەكە موبيلوگرافى ۇلان نۇسىپقوجاعا قاتىستى قىلمىستىق ءىس بويىنشا كەزەكتى سوت وتىرىسى باستالدى.

سوتتالۋشىلارعا الاياقتىق، قىلمىستىق جولمەن الىنعان كىرىستەردى زاڭداستىرۋ، ۇرلىق، اعاشتاردى زاڭسىز كەسۋ جانە كورىنەۋ جالعان اقپارات تاراتۋ ايىپتارى تاعىلىپ وتىر.

سانجار بوقاەۆقا اتالعان بەس باپتىڭ بارلىعى بويىنشا ايىپ تاعىلسا، ماديار قالمەنوۆ الاياقتىق جانە قىلمىستىق جولمەن الىنعان اقشانى زاڭداستىرۋ ەپيزودتارى بويىنشا، ال ۇلان نۇسىپقوجا ۇرلىق، اعاشتاردى زاڭسىز كەسۋ جانە كورىنەۋ جالعان اقپارات تاراتۋ فاكتىلەرى بويىنشا ايىپتالۋدا.

بۇعان دەيىن، 27 قازاندا وتكەن سوت وتىرىسىندا كۋاگەرلەردەن جاۋاپ الىنعان بولاتىن. ولاردىڭ ايعاقتارى مەملەكەتتىك ايىپتاۋ تاراپىنىڭ نۇسقاسىن، ياعني «قازترانسگاز» كاسىپوداعىنىڭ قاراجاتى ەسەبىنەن اۆتوشەرۋ ۇيىمداستىرۋعا ارنالعان شارتتاردىڭ جالعان سيپاتىن تولىق راستادى.

اتاپ ايتقاندا، كاسىپوداقتىڭ بۇرىنعى ءتورايىمى زاۋرەش ماحانوۆا جوباعا «BM Trust» جانە «We Can» كومپانيالارىن تارتۋ باستاماسىن سانجار بوقاەۆ كوتەرگەنىن مالىمدەدى. ونىڭ ايتۋىنشا، ماديار قالمەنوۆ الدىن الا ازىرلەنگەن، سومالارى كورسەتىلگەن شارتتاردى اكەلىپ وتىرعان، ال ورىندالعان جۇمىستاردىڭ اكتىلەرىن ول جەكە بوقاەۆتىڭ كابينەتىنەن ءوزى الىپ كەتىپ جۇرگەن.

سونداي-اق، 2018 جىلى «قازترانسگاز ونىمدەرى» جشس-ءنىڭ كورپوراتيۆتىك دامۋ جانە اكتيۆتەردى باسقارۋ دەپارتامەنتىنىڭ ديرەكتورى قىزمەتىن اتقارعان تالعات ارىستانباەۆ سوتتا كۋالىك ەتتى. ول اۆتوشەرۋدىڭ ۇيىمداستىرۋ جۇمىستارىمەن ءىس جۇزىندە تەك «We Can» كومپانياسى اينالىسقانىن راستادى.

ەسكە سالا كەتەيىك، بۇعان دەيىن ۇلان نۇسىپقوجانىڭ ادۆوكاتى ءوز قورعاۋىنداعى ازاماتتىڭ تاعىلعان ايىپتاردى مويىنداۋعا جانە بولعان وقيعانىڭ ءمان-جايلارى، سونىڭ ىشىندە سانجار بوقاەۆقا قاتىستى جايتتار تۋرالى ايعاق بەرۋگە دايىن ەكەنىن مالىمدەگەن بولاتىن.

Abai.kz