الماتى قالاسىنىڭ المالى اۋداندىق سوتىندا سانجار بوقاەۆقا قاتىستى قىلمىستىق ءىس بويىنشا سوت وتىرىسى جالعاسىپ جاتىر.

بۇگىن سوتتا «قازترانسگاز» اق 2015-2020 جىلدار ارالىعىندا باسقارعان رۋستام سۇلەيمانوۆ جاۋاپ بەردى. كومپانيانىڭ بۇرىنعى باسشىسى ءوز جاۋابىندا باس ديرەكتور كەڭەسشىسى قىزمەتىن اتقارعان بوقاەۆتىڭ ءوز بەتىنشە ارەكەت ەتكەنىن جانە بارلىق شەشىمدى ءوزى قابىلداعانىن مالىمدەدى.

سۇلەيمانوۆتىڭ تۇسىندىرۋىنشە، ول بوقاەۆتى بۇل قىزمەتكە ءوزى تاعايىنداماعان جانە ونىڭ جۇمىسقا قابىلدانۋ ءمان-جايلارىن ەسىنە تۇسىرە المادى. بوقاەۆ ءىس جۇزىندە كومپانيا باسشىسىنىڭ كەڭەسشىسى رەتىندە جۇمىسقا 2015 جىلعى 30 قازان كۇنى كىرىسكەن. ول كەزدە «قازترانسگاز» اق قايرات شارىپباەۆ باسقارعانى بەلگىلى. كەيىن بوقاەۆ قوعاممەن بايلانىس دەپارتامەنتىنىڭ جۇمىسىن ۇيلەستىرىپ، دەربەس ارەكەت ەتكەن ءارى جاڭا باسشىلىقتى ءوز جۇمىسىنىڭ جاي-جاپسارى تۋرالى حاباردار ەتپەگەن.

سۇلەيمانوۆتىڭ ايتۋىنشا، اۆتوشەرۋ وتكىزۋ تۋرالى تاپسىرما «جوعارىدان» – باس كومپانيادان تۇسكەن. كورپوراتيۆتىك بيۋدجەت بولماعاندىقتان، ءىس-شارانى قارجىلاندىرۋ كاسىپوداققا جۇكتەلگەن. ال بارلىق جۇمىستى تولىعىمەن بوقاەۆ ۇيلەستىرگەن.

رۋستام سۇلەيمانوۆ سوتقا اۆتوشەرۋدىڭ قارجىلىق جانە ۇيىمداستىرۋ جۇمىستارىنان حابارسىز بولعانىن ايتتى. ول كەلىسىمشارتتاردى كورمەگەن، شىعىندار سمەتاسىن تەكسەرمەگەن جانە كاسىپوداق كوميتەتى وتىرىستارىنىڭ حاتتامالارىن الماعان. باسشىلىق جۇمىستىڭ ناتيجەسىن تەك ۇسىنىلعان سۋرەتتەر مەن بەينەماتەريالدار ارقىلى باعالاعان. سونىمەن قاتار بۇرىنعى باس ديرەكتور «WeCan» جشس ديرەكتورى جۇلدىز ارتىقباەۆانى دا، «BM Trust» جشس ديرەكتورى ماديار قالمەنوۆتى دە تانىمايتىنىن راستادى.

بوقاەۆتىڭ ءوز بەتىنشە ارەكەت ەتكەنى تۋرالى جايتتار بۇعان دەيىن كاسىپوداقتىڭ بۇرىنعى ءتورايىمى زاۋرەش ماحانوۆانىڭ سوتتا بەرگەن جاۋابىمەن دە راستالعان بولاتىن. وتكەن وتىرىستا ول جوباعا «BM Trust» جانە «WeCan» كومپانيالارىن تارتۋدى سانجار بوقاەۆتىڭ ءوزى ۇسىنعانىن مالىمدەگەن. بۇل رەتتە باس فيگۋرانتتىڭ جيەنى ماديار قالمەنوۆ قول قويۋعا سومالارى الدىن الا تولتىرىلعان دايىن كەلىسىمشارتتاردى اكەلىپ وتىرعانى ايتىلدى. ال ورىندالعان جۇمىستاردى راستايتىن قۇجاتتاردى ماحانوۆا تىكەلەي بوقاەۆتىڭ كابينەتىنەن الىپ كەتىپ جۇرگەن.

قىلمىستىق ءىس ماتەريالدارىنا سايكەس، وسى سحەما ارقىلى ىسكە قاتىسى بار تۇلعالار كاسىپوداق قاراجاتىنان 42 ميلليون تەڭگەنى كەدەرگىسىز شىعارىپ العان.

Abai.kz