«جىر – جولبارىس» مۋزىكالىق سپەكتاكلى ساحنالاندى
«الاتاۋ» ءداستۇرلى ونەر تەاترىندا ۇلى جىرشى جامبىل جاباەۆتىڭ 180 جىلدىق مەرەيتويىنا وراي «جىر – جولبارىس» اتتى مۋزىكالىق سپەكتاكل ساحنالاندى.
قازاق حالقىنىڭ عاسىرلار بويى قالىپتاسقان رۋحاني مۇراسى مەن جىراۋلىق ونەرىن ۇلىقتاعان قويىلىمدا جامبىل جاباەۆتىڭ ءومىر جولى، اقىندىق بولمىسىنىڭ قالىپتاسۋى جانە ازاماتتىق تۇلعاسىنىڭ كەمەلدەنۋ كەزەڭدەرى كورەرمەن نازارىنا ۇسىنىلدى.
سپەكتاكلدىڭ نەگىزگى ارقاۋىنا ءحىح عاسىردىڭ سوڭعى شيرەگىندەگى جامبىل ءومىرى الىنعان. قويىلىمدا بولاشاق ۇلى جىرشىنىڭ ەل ىشىندەگى ورنىنىڭ ايقىندالۋى، اقىندىق ونەرگە كەلۋى، قوعامداعى الەۋمەتتىك ماسەلەلەرگە ءۇن قوسۋى جانە ءوز ءداۋىرىنىڭ شىندىعىن باتىل جىرلاعان ازاماتتىق كەلبەتى كوركەم بەينەلەنەدى. ءجۇز جاساعان ەپيك جىرشىنىڭ تاعدىرى ارقىلى تۇتاس ءبىر ءداۋىردىڭ تىنىسى مەن حالىقتىڭ ارمان-مۇراتى ساحنا تىلىمەن ورنەكتەلگەن.
«جىر – جولبارىس» سپەكتاكلىنىڭ باستى ەرەكشەلىگى – ءداستۇرلى قازاق ونەرىن زاماناۋي ساحنالىق شەشىمدەرمەن ساباقتاستىرۋىندا. قويىلىم بارىسىندا ۇلتتىق بي ناقىشتارى زاماناۋي ساحنالىق شەشىمدەرمەن ۇيلەسىم تاۋىپ، حورەوگرافيالىق كورىنىستەرگە ەرەكشە سەرپىن بەرگەن. ال ديناميكالىق ستسەنوگرافيا وقيعا جەلىسىنىڭ كوركەمدىك قۋاتىن ارتتىرىپ، درامالىق ساحنالار، ءداستۇرلى مۋزىكا مەن بي ونەرىنىڭ ءبىرتۇتاس ۇيلەسىمىن قالىپتاستىرعان.
پەسا ماتىندەرى دە قويىلىمنىڭ ساحنالىق تابيعاتىنا ساي ىقشام ءارى استارلى جازىلعان. بەينەلى تەڭەۋلەر مەن كوركەم ءسوز ورنەكتەرى ارقىلى جامبىلدىڭ ىشكى الەمى، مىنەزى مەن دۇنيەتانىمى اشىلادى. بۇل – كورەرمەنگە اقىننىڭ ءومىربايانىن بايانداپ قانا قويماي، ونىڭ رۋحاني الەمىنە بويلاۋعا مۇمكىندىك بەرەتىن كوركەمدىك ءتاسىل.
قويىلىمنىڭ شىعارماشىلىق قۇرامىندا ۇلتتىق ونەر مەن تەاتر سالاسىنىڭ بىرقاتار وكىلدەرى ەڭبەك ەتتى. سپەكتاكلدىڭ كەڭەسشىسى – جامبىلدىڭ كوزىن كورگەن شاشتاي اقساقالدىڭ ۇلى جۇماباي شاشتايۇلى. پەسا اۆتورى – ءانناس باعدات، قويۋشى رەجيسسەرى – ەسلام نۇرتازين، كومپوزيتورى ءارى مۋزىكالىق ارلەۋشىسى – بولاتبەك نۇرقاسىموۆ، رەجيسسەر-حورەوگرافى – اسەل اباقاەۆا.
جامبىل جاباەۆ – قازاقتىڭ جىرشىلىق ءداستۇرىن بيىك دەڭگەيگە كوتەرىپ، حالىقتىڭ مۇڭ-مۇقتاجىن، ەلدىڭ ءۇنى مەن زاماننىڭ شىندىعىن جىرىنا ارقاۋ ەتكەن ءبىرتۋار تۇلعا. ونىڭ شىعارماشىلىعى – ۇلت رۋحانياتىنىڭ اسىل قازىناسى، ال ءومىر جولى – كەيىنگى ۇرپاققا ونەگە.
«جىر – جولبارىس» مۋزىكالىق سپەكتاكلى – ۇلى اقىننىڭ مەرەيتويىنا ارنالعان مادەني شارا عانا ەمەس، ۇلتتىق ونەردىڭ ساباقتاستىعىن دارىپتەيتىن ماڭىزدى ساحنالىق تۋىندى. قويىلىم جامبىل بەينەسى ارقىلى جىردىڭ قۇدىرەتىن، ءسوز ونەرىنىڭ قۋاتىن جانە حالىق رۋحىنىڭ ماڭگىلىگىن تاعى ءبىر مارتە ايشىقتادى.
Abai.kz
