پرەزيدەنت قاسىم-جومارت توقاەۆ «QazaqGaz» ۇك» اق باسقارما توراعاسى الىبەك جاماۋوۆتى قابىلدادى.

مەملەكەت باسشىسىنا ۇلتتىق كومپانيا قىزمەتىنىڭ 2026 جىلعى ناتيجەلەرى جانە الداعى جىلدارعا ارنالعان جوسپارى جونىندە ەسەپ بەرىلدى.

پرەزيدەنتكە تۇرعىنداردى جانە ەل ەكونوميكاسىن تابيعي گازبەن قامتاماسىز ەتۋ، سونداي-اق QazaqGaz ۇلتتىق كومپانياسىنىڭ 2026-2027 جىلدارداعى جىلىتۋ ماۋسىمىنا تولىق دايىندىعى تۋرالى مالىمەت ۇسىنىلدى.

الىبەك جاماۋوۆ مەملەكەت باسشىسىنىڭ گەولوگيالىق بارلاۋ جۇمىستارىن جانداندىرۋ جونىندەگى تاپسىرماسىنا سايكەس، شالقار، سارالجىن، مالدىباي، سولتۇستىك-2, سولتۇستىك-1 جانە اققۇدىق، پريدوروجنوە ۋچاسكەلەرىندە جۇمىس جۇرگىزىلىپ جاتقانىن جەتكىزدى.

قاسىم-جومارت توقاەۆقا كومپانيانىڭ ءىرى ينفراقۇرىلىمدىق جوبالارىن ىسكە اسىرۋ بارىسى باياندالدى.

قۋاتى جىلىنا 1 ميلليارد تەكشە مەتر كوگىلدىر وتىن وڭدەۋگە جەتەتىن قاشاعان گاز وڭدەۋ زاۋىتىنىڭ قۇرىلىسى جالعاسۋدا. ءوندىرىس نىسانىن پايدالانۋعا بەرۋ مەرزىمى 2027 جىلدىڭ ءىىى توقسانىنا جوسپارلانعان.

بەينەۋ – بوزوي – شىمكەنت ماگيسترالدىق گاز قۇبىرىنىڭ ەكىنشى جەلىسىن سالۋ جوباسى بويىنشا ينجەنەرلىك جوبالاۋ، جابدىقتار مەن ماتەريالداردى ساتىپ الۋ جۇمىستارى قولعا الىنىپ، قۇرىلىس-مونتاجداۋ كەزەڭى باستالدى.

جىلىنا 2,5 ميلليارد تەكشە مەتر گاز وڭدەۋگە قاۋقارلى قاشاعان گاز وڭدەۋ زاۋىتى جانە جىلىنا 5 ميلليارد تەكشە مەتر گاز وڭدەيتىن قاراشىعاناق گاز وڭدەۋ زاۋىتى جوبالارى بويىنشا ەرس-مەردىگەرلەر انىقتالدى.

سونداي-اق «QazaqGaz» ۇك» اق باسقارما توراعاسى سالاعا تسيفرلىق شەشىمدەر ەنگىزۋ جونىندە اقپارات بەردى.

Aqyl Energy باستاماسى اياسىندا جاساندى ينتەللەكت پەن دەرەكتەردى تالداۋ ەلەمەنتتەرىن قولدانا وتىرىپ، گازبەن جابدىقتاۋدى ەسەپكە الۋ جانە باسقارۋ ۇدەرىسىن تسيفرلاندىرۋ جۇزەگە اسىرىلىپ جاتىر.

گازدى ەسەپكە الۋعا ارنالعان 1,3 ميلليوننان استام اسپاپ ينتەللەكتۋالدى ەسەپتەگىشتەرگە كەزەڭ-كەزەڭىمەن اۋىستىرىلۋدا.

سونىمەن قاتار مەملەكەت باسشىسى ۇلتتىق كومپانيانىڭ جوسپارىمەن تانىستى.

سوعان سايكەس، سولتۇستىك وڭىرلەرگە – كوكشەتاۋ جانە پەتروپاۆل قالالارىنا كوگىلدىر وتىن جەتكىزۋ، گاز-موتورلى وتىن نارىعىن دامىتۋ، رۋدنىي قالاسىندا جىلىنا 50 مىڭ توننا سۇيىتىلعان تابيعي گاز وندىرەتىن از توننالى زاۋىت سالۋ، 4-ءشى جەراستى گاز قويماسىنىڭ قۇرىلىسىن جۇرگىزۋ جۇمىستارى باستالدى.

كەزدەسۋ سوڭىندا پرەزيدەنت جىلىتۋ كەزەڭىندە تۇرعىنداردى جانە ەكونوميكانى كوگىلدىر وتىنمەن تۇراقتى قامتاماسىز ەتۋ، تاۋارلى گاز قورىن كەڭەيتۋ باعىتىنداعى جۇمىستاردى جالعاستىرۋدى تاپسىردى.

Abai.kz