استانادا «مەرەيلى وتباسى – 2026» ۇلتتىق بايقاۋىنىڭ جەڭىمپازدارىن ماراپاتتاۋ ءراسىمى ءوتتى. بايقاۋدا ەلىمىزدىڭ ءار وڭىرىنەن ادال ەڭبەگىمەن جانە ۇرپاق تاربيەسىندەگى ونەگەسىمەن كوپكە ۇلگى بولعان 20 وتباسى جەڭىمپاز اتاندى.

سالتاناتتى جيىننىڭ قۇرمەتتى قوناقتارى قاتارىندا قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى، قۇرىلتاي، قازاقستان حالىق كەڭەسى، انالار كەڭەسى مەن اكەلەر وداعىنىڭ وكىلدەرى جانە بەلگىلى قوعام قايراتكەرلەرى بولدى.

جەڭىمپازداردى قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ قۇتتىقتاپ، ءوز سوزىندە وتباسىنىڭ رۋحاني قۇندىلىقتاردى ساقتاۋداعى جانە ەل كەلەشەگىن قالىپتاستىرۋداعى ايرىقشا ورىن الاتىنىنا توقتالدى.

«مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ادامي الەۋەتتى ارتتىرۋدىڭ جانە وسكەلەڭ ۇرپاقتىڭ جان-جاقتى دامۋىنا جاعداي جاساۋدىڭ ماڭىزىن اتاپ ءوتتى. ادالدىق پەن مەيىرىم، ەڭبەككە قۇرمەت بالا بويىنا ەڭ اۋەلى وتباسىندا سىڭەدى. ۇلكەندەردىڭ كۇندەلىكتى ونەگەسىن كورىپ وسكەن ۇرپاق سول قاسيەتتەردى ومىرىنە سەرىك ەتەدى. ادىلەتتى قوعامنىڭ نەگىزى دە وسىنداي تاربيەدەن قالانادى.

بۇگىن ءبىز وسى قۇندىلىقتاردى ونەگەلى ومىرىمەن تانىتىپ جۇرگەن وتباسىلارعا قۇرمەت كورسەتىپ وتىرمىز. ءار شاڭىراقتىڭ ومىردەن تۇيگەن تاعىلىمى، بەرىك ۇستانعان ءداستۇرى مەن كوپكە ۇلگى بولار يگى ىستەرى بار. سىزدەردىڭ ەڭبەكتەرىڭىز بەن يگى ىستەرىڭىز ارقىلى جاس ۇرپاق وتباسىنىڭ قادىرىن، سىيلاستىقتىڭ ءمانىن، ەلگە قىزمەت ەتۋدىڭ ماڭىزىن تۇسىنەدى. سوندىقتان وسىنداي اۋلەتتەردىڭ ءومىر جولى كوپشىلىككە كەڭىنەن تانىستىرىلۋى ءتيىس»، – دەدى ارمان قىرىقباەۆ.

پرەزيدەنتتىڭ 2026 جىلعى 28 قازانداعى جولداۋىندا ادام كاپيتالىن دامىتۋعا جانە سانالى ۇرپاق تاربيەلەۋگە ايرىقشا كوڭىل ءبولىندى. مەملەكەت باسشىسى بالا تاربيەسى مەن ونىڭ ومىرلىك ۇستانىمىن قالىپتاستىرۋعا وتباسى، مەكتەپ، ۇستاز جانە وقۋشىنىڭ ءوزى بىردەي جاۋاپكەرشىلىكپەن قاراۋ كەرەكتىگىن ايتتى. وسى تۇرعىدان وتباسى ينستيتۋتىن نىعايتۋ، اتا-انانىڭ جاۋاپكەرشىلىگىن ارتتىرۋ جانە ۇرپاقتار ساباقتاستىعىن ساقتاۋ بۇكىل قوعام ءۇشىن ماڭىزدى.

«مەرەيلى وتباسى» بايقاۋى اتا ءداستۇردى ساقتاپ، ۇرپاققا ونەگەلى تاربيە بەرگەن وتباسىلاردى كوپشىلىككە ۇلگى ەتۋدى ماقسات ەتەدى. جەڭىمپازدار قاتارىندا كوپبالالى جانە بالا اسىراپ العان وتباسىلار، ەڭبەك پەن ونەر جولىن ۇرپاقتان ۇرپاققا جالعاعان اۋلەتتەر بار. قوعامدىق ومىرگە بەلسەنە ارالاسىپ، تۋعان ءوڭىرىنىڭ دامۋىنا ۇلەس قوسىپ جۇرگەن وتباسىلار دا ماراپاتتالدى.

جەڭىمپاز اتانعان 20 وتباسىنىڭ ارقايسىسىنا ەستەلىك مۇسىنشە مەن 2 ميلليون تەڭگەنىڭ سەرتيفيكاتى تابىستالدى.

«مەرەيلى وتباسى» ۇلتتىق بايقاۋى 2014 جىلدان بەرى وتكىزىلىپ كەلەدى. ۇلتتىق بايقاۋ ادامگەرشىلىك قۇندىلىقتاردى نىعايتۋعا، اتا-انانىڭ بالا تاربيەسىندەگى ءرولىن ايشىقتاۋعا، ونەگەلى وتباسىلاردىڭ تاجىريبەسىن دارىپتەۋگە جانە وتباسىنداعى داستۇرلەرگە قۇرمەتپەن قاراۋعا باعىتتالعان.

بايقاۋ باستالعالى وعان ەلىمىزدىڭ بارلىق وڭىرىنەن 20 مىڭنان استام وتباسى قاتىستى.

Abai.kz