اقوردانىڭ قاتاڭ سەرپىنى

قازاقستاننىڭ كولىك-لوگيستيكا سالاسىندا ءىرى كادرلىق اۋىس-ءتۇيىس ورىن الدى. مەملەكەت باسشىسى قاسىم-جومارت توقاەۆتىڭ جارلىعىمەن نۇرلان ساۋرانباەۆ كولىك ءمينيسترى لاۋازىمىنان بوساتىلدى. ال بۇل جاۋاپتى قىزمەتكە پرەزيدەنت اكىمشىلىگى باسشىسىنىڭ بۇرىنعى ورىنباسارى اسەل جاناسوۆا پرەمەر-ءمينيستردىڭ ورىنباسارى – كولىك ءمينيسترى بولىپ تاعايىندالدى.

بۇل شۇعىل كادرلىق شەشىم ەلباسىنىڭ 28 قازانداعى جولداۋىندا كولىك سالاسىن جەردەن الىپ، جەرگەن سالعان قاتاڭ سىنعا العانىنان كەيىن تۋرا التى كۇن وتكەندە جۇزەگە اسىرىلدى.

وتستاۆكاعا تۇرتكى بولعان جولداۋداعى قاتاڭ سىن! 

جولدارداعى «فۋتبول» مەن جاۋاپكەرشىلىكتەن قاشۋ: جولداۋدا مەملەكەت باسشىسى اۆتوكولىك جولدارىنىڭ مۇشكىل كۇيىن جانە ورتالىق مينيسترلىك پەن جەرگىلىكتى اكىمدىكتەردىڭ جاۋاپكەرشىلىكتى ءبىر-بىرىنە ىسىرا سالۋىن قاتتى ايىپتادى. توقاەۆ شەنەۋنىكتەردىڭ «فۋتبولىنا» توقتاۋ قويىپ، كولىك مينيسترلىگىنە جەرگىلىكتى جولداردى قوسا العاندا، ەلدەگى بارلىق اۆتوجولداردىڭ جاۋاپكەرشىلىگىن ءوز موينىنا الۋدى تاپسىردى.

«بيتۋم مەن قيىرشىق تاس ساپاسىنا سىلتاۋ ايتۋ قابىلدانبايدى»، — دەپ كەسىپ ايتقان بولاتىن پرەزيدەنت.

شەكاراداعى كەپتەلىستەر مەن تۇرالاي توقتاعان ترانزيت: شەكارالىق وتكىزۋ پۋنكتتەرىن جاڭعىرتۋدىڭ سوزىلىپ كەتۋى دە پرەزيدەنتتىڭ نارازىلىعىن تۋدىردى. جۇك كولىكتەرىنىڭ شاقىرىمعا سوزىلعان كەزەگى ەلىمىزدىڭ ترانزيتتىك الەۋەتىن تولىق پايدالانۋعا كەدەرگى كەلتىرىپ وتىرعانىن ايتىپ، بارلىق پۋنكتتەردى 2027 جىلعا دەيىن اياقتاۋدى تالاپ ەتتى.

جۇك اۆياتسياسىنداعى قۇلدىراۋ: قازاقستاننىڭ ەۋروپا مەن ازيا اراسىنداعى اۋە دالىزدەرى مۇمكىندىكتەرىن پايدالانباي، مول كىرىستەن ايىرىلىپ جاتقانى دا اشىق ايتىلدى. ۇلكەن ءۇمىت ارتقان «Air Cargo» جەكە كومپانياسىنان دا ەشقانداي ناقتى ناتيجە بولماعانى سىنالدى.

جاڭا مينيستر كىم جانە وعان قانداي مىندەت جۇكتەلدى؟

39 جاستاعى اسەل جاناسوۆا — «بولاشاق» باعدارلاماسىمەن كەمبريدج ۋنيۆەرسيتەتىن («كومپيۋتەرلىك عىلىمدار» ماماندىعى) اياقتاعان جوعارى بىلىكتى باسشى.

• 2020–2022 جىلدارى ساۋدا جانە ينتەگراتسيا ۆيتسە-ءمينيسترى بولىپ جۇمىس ىستەدى.
• 2022–2025 جىلدارى «قازپوشتا» اق باسقاردى.
• بۇعان دەيىن ۇلتتىق بانكتە، «زەردە» حولدينگىندە، احقو-دا باسشىلىق قىزمەتتەر اتقارعان جانە پرەزيدەنت كەڭەسشىسى ءارى ءپا باسشىسىنىڭ ورىنباسارى بولدى.

قوس وكىلەتتىك جانە جۇيەلى رەفورما تالابى

نۇرلان ساۋرانباەۆ كولىك مينيسترلىگىن 2025 جىلدىڭ ماۋسىمىنان بەرى باسقارىپ كەلگەن ەدى (بۇعان دەيىن «قتج» اق-ىن باسقارعان). 2026 جىلدىڭ قىركۇيەگىندە ۇكىمەتتىڭ جاڭا قۇرامىندا قايتا تاعايىندالعان ول ارادا تۋرا ەكى اي وتكەندە قىزمەتىنەن كەتتى.

بۇل جولعى تاعايىنداۋدىڭ ەڭ باستى ەرەكشەلىگى — كولىك مينيسترىنە ۆيتسە-پرەمەر (پرەمەر-ءمينيستردىڭ ورىنباسارى) مارتەبەسىنىڭ بەرىلۋى. بۇل — اقوردانىڭ كولىك مينيسترلىگىنە تەك سالالىق ۆەدومستۆو رەتىندە ەمەس، وزگە دە مينيسترلىكتەر مەن اكىمدىكتەردى ۇيلەستىرە الاتىن جوعارى وكىلەتتىلىك بەرگەنىن بىلدىرەدى.

تەحنوكرات جانە تسيفرلاندىرۋ سالاسىنىڭ مامانى اسەل جاناسوۆانىڭ تاعايىندالۋى — جول قۇرىلىسىنداعى اشىقتىقتى قامتاماسىز ەتۋ، شەكارالىق بەكەتتەردى تسيفرلاندىرۋ جانە ترانزيتتىك حابتاردى رەفورمالاۋ بويىنشا اقوردانىڭ تۇبەگەيلى بەتبۇرىس جاساۋعا بەل بايلاعانىن ايعاقتايدى.

Abai.kz