قاراعاندى وبلىسىندا مەملەكەت باسشىسىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن جۇزەگە اسىرۋعا باعىتتالعان ناقتى شارالار ايقىندالادى.

قۇجاتتىڭ نەگىزگى باسىمدىقتارىن ءتۇسىندىرىپ، ونى ىسكە اسىرۋ جولدارىن تالقىلاۋ ءۇشىن وڭىرگە قۇرىلتاي دەپۋتاتتارى اسحات ايماعامبەتوۆ، ۆاديم باسين، ءۇنزيلا شاپاق، الەكساندر دانيلوۆ جانە ايسۇلۋ سۇلەيمەنوۆا كەلدى. ولار وبلىس تۇرعىندارىمەن، سونىڭ ىشىندە ءوندىرىس جۇمىسشىلارىمەن جانە جاستارمەن كەزدەسىپ جاتىر.

دەپۋتاتتاردىڭ وڭىرگە جۇمىس ساپارى وبلىس اكتيۆىمەن كەزدەسۋدەن باستالدى. جيىنعا قازاقستان حالىق كەڭەسىنىڭ مۇشەلەرى مەن ورتالىق مەملەكەتتىك ورگانداردىڭ وكىلدەرى دە قاتىستى. كەزدەسۋدە مەملەكەت باسشىسىنىڭ تاپسىرمالارىن ورىنداۋ ماسەلەلەرى تالقىلانىپ، قاراعاندى يندۋستريالىق ءوڭىرىنىڭ دامۋىنا تىكەلەي قاتىستى باسىم باعىتتارعا ايرىقشا نازار اۋدارىلدى. اتاپ ايتقاندا، ونەركاسىپتى جاڭعىرتۋ، ەنەرگەتيكا مەن ينفراقۇرىلىمدى دامىتۋ، ينۆەستيتسيا تارتۋ، تسيفرلىق تەحنولوگيالاردى ەنگىزۋ جانە تۇرعىنداردىڭ ءومىر ءسۇرۋ ساپاسىن جاقسارتۋ ماسەلەلەرى قارالدى.

قۇرىلتايدىڭ الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ الەۋمەتتىك ساياساتتى جاڭارتۋ جانە كومەككە مۇقتاج ازاماتتاردى اتاۋلى قولداۋ ماسەلەلەرىنە توقتالدى.

– بۇل – جاڭا كونستيتۋتسيا قابىلدانعاننان كەيىنگى مەملەكەت باسشىسىنىڭ العاشقى جولداۋى. قۇجاتتىڭ باستى ەرەكشەلىگى – ءار ادام وزىنە تىكەلەي قاتىستى ماڭىزدى ماسەلەلەردىڭ جاۋابىن تابا الادى. ماسەلەن، مۇعالىم ءۇشىن ءوز قۇقىعىنىڭ قورعالۋى، پەداگوگتەرگە تۇسەتىن ارتىق جۇكتەمەنىڭ ازايتىلۋى ماڭىزدى بولسا، دارىگەرلەر ەڭبەكاقىنىڭ ءوسۋى مەن مەديتسينا سالاسىنىڭ دامۋىنا نازار اۋدارادى. ال كاسىپكەرلەر ءۇشىن جاڭا مۇمكىندىكتەر، مەملەكەتتىك باسقارۋ مەن سالىق جۇيەسىندەگى وزگەرىستەر ماڭىزدى. قۇرىلتاي پرەزيدەنت جولداۋىن جۇزەگە اسىرۋعا باعىتتالعان بىرنەشە زاڭ جوباسىن ازىرلەپ قويدى، – دەدى دەپۋتات.

جيىندا «حالىقتىق قۇرىلىس» باستاماسى دا جەكە تالقىلاندى. ونى جۇزەگە اسىرۋ ءۇشىن 2029 جىلدىڭ سوڭىنا دەيىن شامامەن 6,5 ترلن تەڭگە باعىتتاۋ جوسپارلانىپ وتىر. بۇل جەرگىلىكتى كاسىپورىنداردىڭ الەۋەتىن ارتتىرىپ، وڭىردە جاڭا جۇمىس ورىندارىن اشۋعا مۇمكىندىك بەرەدى.

ايسۇلۋ سۇلەيمەنوۆانىڭ ايتۋىنشا، دەپۋتاتتار تۇرعىندارمەن كەزدەسۋدە جاستارعا دا ەرەكشە نازار اۋدارماق. ولارعا بەلسەندىلىك تانىتىپ، الدىنا ناقتى ماقسات قويا ءبىلۋ، ساپالى ءبىلىم الۋ قاجەتتىگىن جەتكىزۋدى كوزدەيدى. ويتكەنى ەلدىڭ وركەندەۋىنە ءار ازاماتتىڭ قوسقان ۇلەسى ماڭىزدى.

كەزدەسۋدە ايتىلعان ۇسىنىستار جولداۋدى جۇزەگە اسىرۋ جونىندەگى وبلىستىق بىرىڭعاي جوسپارعا ەنگىزىلەدى. وبلىس اكىمى ەرماعانبەت بولەكپاەۆ ءار مىندەتتىڭ ورىندالۋ مەرزىمى مەن ناتيجەسىنە جاۋاپتى تۇلعالار ناقتى كورسەتىلگەن جوسپار ازىرلەۋدى تاپسىردى.

باسىم مىندەتتەردىڭ قاتارىندا جاڭا ءوندىرىس ورىندارىن ىسكە قوسۋ، ينۆەستيتسيا تارتۋ، ەكونوميكا مەن اۋىل شارۋاشىلىعىن تسيفرلاندىرۋ، جاساندى ينتەللەكت تەحنولوگيالارىن ەنگىزۋ جانە ەلدى مەكەندەردى اباتتاندىرۋ بار. سونىمەن قاتار قاراعاندى، تەمىرتاۋ جانە بالقاش قالالارىنىڭ تسيفرلىق ەگىزدەرىن جاساپ، ارقايسىسىن دامىتۋدىڭ ناقتى جوسپارلارىن ازىرلەۋ مىندەتى قويىلدى.

– جۇمىسىمىزدىڭ باستى ولشەمى وتكىزىلگەن جيىندار مەن ازىرلەنگەن قۇجاتتاردىڭ سانى ەمەس، ەل ومىرىندەگى ناقتى وزگەرىستەر بولۋى كەرەك. بۇل – تۇراقتى جۇمىس ىستەيتىن كاسىپورىندار، سەنىمدى ينفراقۇرىلىم، ساپالى جۇمىس ورىندارى جانە حالىققا قولجەتىمدى قىزمەتتەر، – دەپ اتاپ ءوتتى ءوڭىر باسشىسى.

بۇگىن قۇرىلتاي دەپۋتاتتارى قاراعاندىداعى كاسىپورىندار مەن جوعارى وقۋ ورىندارىن ارالاپ، تەمىرتاۋ جانە ساران قالالارىنا دا بارادى.

Abai.kz