قازاقستان ازيا دامۋ بانكىنەن (ادب) 3,4 ملرد قىتاي ءيۋانى كولەمىندە قارىز تارتپاق. قارجى ءمينيسترى ءمادي تاكيەۆ نە سەبەپتى قارىز الۋ ءۇشىن قىتاي ۆاليۋتاسى تاڭدالعانىن ءتۇسىندىردى.

قازاقستان مەن ازيا دامۋ بانكى اراسىنداعى قارىز تۋرالى كەلىسىمگە 11 قىركۇيەكتە قول قويىلعان. قۇجاتقا سايكەس، قارىز كولەمى – 3 ملرد 411 ملن 350 مىڭ يۋان.

قاراجات 15 جىل مەرزىمگە بەرىلەدى. ونىڭ ىشىندە ءۇش جىلدىق جەڭىلدىك كەزەڭى قاراستىرىلعان. بۇل ۋاقىتتا قازاقستان نەگىزگى قارىزدى قايتارماي، تەك پايىزىن تولەيدى. ال پايدالانىلماعان قارىز قاراجاتىن رەزەرۆتە ۇستاعانى ءۇشىن الىناتىن كوميسسيا مولشەرى 0,15%-دى قۇرايدى.

ءمادي تاكيەۆ قۇرىلتاي وتىرىسىندا قارىزعا الىنعان اقشا كولىك ينفراقۇرىلىمىن دامىتۋعا، سونداي-اق ونەركاسىپ پەن ءبىلىم سالاسىنا باعىتتالاتىنىن ايتتى. ازيا دامۋ بانكى قارىز قاراجاتىنىڭ قالاي جۇمسالاتىنىن قاداعالايدى جانە قاجەت بولعان جاعدايدا اۋديت جۇرگىزۋگە دە قۇقىلى.

كەلىسىمدى راتيفيكاتسيالاۋ تۋرالى زاڭ جوباسىن تالقىلاۋ كەزىندە دەپۋتات يۋري لي قارىز الۋ ءۇشىن نەلىكتەن قىتاي ءيۋانى تاڭدالعانىن سۇرادى. بۇعان دەيىن ازيا دامۋ بانكى قازاقستانعا جاپون يەناسىمەن قارىز بەرگەن ەدى.

ءمينيستردىڭ ايتۋىنشا، قارجى مينيسترلىگى الەمدىك قارجى نارىعىنداعى جاعدايدى باقىلاپ، قارىز تارتۋ شارتتارىن تالدايدى. ونىڭ سوزىنشە، قىتاي ءيۋانىنىڭ باعامى تۇراقتى:

— جاپون يەناسىمەن قارىز تارتقان كەزدە پايىزدىق مولشەرلەمەلەر باسقاشا بولدى. الايدا ەكىنشى جارتىجىلدىقتا جاپونيانىڭ ىشكى نارىعىنداعى جاعداي وزگەرىپ، مولشەرلەمەلەر ءسال كوتەرىلدى. سوندىقتان قازىر يۋانمەن قارىز تارتۋ ءتيىمدى باعىتتاردىڭ ءبىرى سانالادى. پايىزدىق مولشەرلەمەلەر تۇراقتى، ال باعام پاريتەتىمەن ەرەكشەلەنەدى، — دەدى ءمادي تاكيەۆ.

Abai.kz