مەملەكەت باسشىسى قاسىم-جومارت توقاەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىندا ايقىندالعان ەل دامۋىنىڭ باسىم باعىتتارى قازتۇتىنۋوداعى قاراعاندى ۋنيۆەرسيتەتىندە وتكەن كەزدەسۋدە تالقىلاندى.

ءىس-شاراعا قۇرىلتايدىڭ الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ، قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى باحتيار جازىقپاەۆ، قازاقستان حالىق كەڭەسىنىڭ مۇشەلەرى بەكزات التىنبەكوۆ پەن ايگەرىم يسبەكوۆا، قاراعاندى وبلىستىق ۇلتتىق سپورت تۇرلەرى قاۋىمداستىعىنىڭ توراعاسى نۇركەن قوبجانوۆ، مەملەكەت جانە قوعام قايراتكەرى قۇدايبەرگەن بەكسۇلتانوۆ قاتىستى. سونداي-اق كەزدەسۋگە ءوڭىردىڭ ءبىلىم بەرۋ سالاسىنىڭ وكىلدەرى مەن ستۋدەنتتەرى جينالدى.

سۋرەت: قۇرىلتايدىڭ ءباسپاسوز قىزمەتىنەن الىندى.

ءوز سوزىندە اسحات ايماعامبەتوۆ مەملەكەت باسشىسىنىڭ جولداۋى قازاقستان دامۋىنىڭ جاڭا كەزەڭىندەگى ستراتەگيالىق باسىمدىقتاردى ايقىندايتىنىن اتاپ ءوتتى. ونىڭ ايتۋىنشا، مەملەكەتتىك باسقارۋ جۇيەسىن جاڭعىرتۋ – الداعى كەزەڭدەگى ماڭىزدى ءارى كۇردەلى مىندەتتەردىڭ ءبىرى.

– سوڭعى جىلدارداعى اۋقىمدى ساياسي رەفورمالار، جاڭا كونستيتۋتسيانىڭ قابىلدانۋى جانە مەملەكەتتىك باسقارۋ جۇيەسىنىڭ جاڭعىرۋى ودان ءارى دامۋدىڭ بەرىك ينستيتۋتسيونالدىق نەگىزىن قالىپتاستىردى. ەندىگى باستى مىندەت – بۇل وزگەرىستەردى ءاربىر ازامات سەزىنە الاتىن ناقتى ناتيجەلەرمەن تولىقتىرۋ، – دەدى ول.

سۋرەت: قۇرىلتايدىڭ ءباسپاسوز قىزمەتىنەن الىندى.

ءوز كەزەگىندە قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى باحتيار جازىقپاەۆ «حالىقتىق تسيفرلىق ەكونوميكا» تۇجىرىمداماسىنىڭ ماڭىزدىلىعىنا توقتالدى. ونىڭ ايتۋىنشا، بۇل باستاما تسيفرلىق شەشىمدەر مەن جاساندى ينتەللەكتىنى كەڭىنەن ەنگىزۋگە، سونداي-اق جۇمىسپەن قامتۋ، كاسىپكەرلىك جانە قازاقستاندىقتاردىڭ تابىسىن ارتتىرۋ باعىتىندا جاڭا مۇمكىندىكتەر اشۋعا جول بەرەدى.

كەزدەسۋ بارىسىندا ينفراقۇرىلىمدى دامىتۋ ماسەلەلەرى دە كەڭىنەن تالقىلاندى. اتاپ ايتقاندا، جول سالۋ جانە جوندەۋ، ينجەنەرلىك جەلىلەردى، الەۋمەتتىك جانە وزگە دە نىسانداردى جاڭعىرتۋعا باعىتتالعان «حالىقتىق قۇرىلىس» باعدارلاماسىنىڭ ماڭىزدىلىعى اتاپ ءوتىلدى. سونىمەن قاتار جوبالاردى ساپالى ءارى ۋاقىتىلى جۇزەگە اسىرۋ، بيۋدجەت قاراجاتىنىڭ ءتيىمدى ءارى اشىق جۇمسالۋىن قامتاماسىز ەتۋ، قوعامدىق باقىلاۋ تەتىكتەرىن جەتىلدىرۋ ماسەلەلەرىنە نازار اۋدارىلدى.

سۋرەت: قۇرىلتايدىڭ ءباسپاسوز قىزمەتىنەن الىندى.

ءىس-شاراعا قاتىسۋشىلار جولداۋدا بەلگىلەنگەن باسىمدىقتاردى ءتيىمدى ىسكە اسىرۋ مەملەكەتتىك ورگانداردىڭ، ساراپشىلار قاۋىمداستىعىنىڭ جانە ازاماتتاردىڭ كۇش-جىگەرىن بىرىكتىرۋدى تالاپ ەتەتىنىن اتاپ ءوتتى. سونداي-اق اسحات ايماعامبەتوۆ جاستارمەن اشىق ديالوگ ورناتۋدىڭ ماڭىزدىلىعىنا توقتالىپ، ولاردىڭ ەل بولاشاعىنا قاتىستى كوزقاراستارى مەن ۇسىنىستارىن تىڭداۋعا دايىن ەكەنىن جەتكىزىپ، كەزدەسۋ سوڭىندا ستۋدەنتتەردىڭ سۇراقتارىنا جاۋاپ بەردى.

سۋرەت: قۇرىلتايدىڭ ءباسپاسوز قىزمەتىنەن الىندى.

سونىمەن قاتار ولار جۇمىس ساپارى اياسىندا «Maker» KLMZ جشس ۇجىمىمەن كەزدەستى.

Abai.kz