قۇرىلتاي دەپۋتاتتارى جارقىنبەك امانتاي مەن يليا تەرەنچەنكو، قازاقستان حالىق كەڭەسىنىڭ مۇشەسى ۆەرا كيم، ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەلدار كۇزەنباەۆ، ەنەرگەتيكا ۆيتسە-ءمينيسترى باقىتجان ءىلياس پرەزيدەنتتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىنداعى باسىمدىقتارىن تالقىلاۋ ءۇشىن پاۆلودار ءوڭىرىنىڭ تۇرعىندارىمەن كەزدەستى.

تورايعىروۆ ۋنيۆەرسيتەتىنىڭ ستۋدەنتتەرى جانە وقىتۋشىلارىمەن، سونداي-اق «قازاقستان ءاليۋمينيى» اق-نىڭ ەڭبەك ۇجىمىمەن مازمۇندى اڭگىمە ءوربىدى.

قاتىسۋشىلار ادامي كاپيتالدى دامىتۋ، ءبىلىم بەرۋ، بىلىكتى كادرلار دايارلاۋ، ەڭبەك ونىمدىلىگىن ارتتىرۋ، ونەركاسىپتى جاڭعىرتۋ، ەنەرگەتيكا سالاسىن دامىتۋ، حالىقتى الەۋمەتتىك قورعاۋ جانە زاماناۋي تەحنولوگيالاردى ەنگىزۋ ماسەلەلەرىنە ەرەكشە نازار اۋداردى.

– ءاربىر ازاماتتىڭ پرەزيدەنت جولداۋىن ىسكە اسىرۋدا ءوزى ءۇشىن تۋىنداعان مۇمكىندىكتەردى كورە ءبىلۋى ماڭىزدى. قۇرىلىس سالاسىن دامىتۋ جاڭا نىساندار سالۋدى عانا ەمەس، سونىمەن قاتار كاسىپورىنداردىڭ، جۇمىس ورىندارىنىڭ، بيزنەس ءۇشىن مۇمكىندىكتەردىڭ پايدا بولۋىن بىلدىرەدى. تەحنيكالىق ءبىلىم الاتىن جاستاردىڭ الدىندا ەرەكشە پەرسپەكتيۆالار اشىلادى، – دەدى يليا تەرەنچەنكو.

ستۋدەنتتەرگە الداعى جىلدارى بىلىكتى ماماندارعا دەگەن سۇرانىس  ارتا تۇسەتىنى، ال كاسىبي داعدىلار مەن قۇزىرەتتەر تابىستى جۇمىسقا ورنالاسۋدىڭ ماڭىزدى شارتى بولاتىنىن ايتىلدى. كەزدەسۋلەردە ەلىمىزدىڭ تۇراقتى دامۋىن قامتاماسىز ەتۋدەگى جوعارى وقۋ ورىندارىنىڭ ءرولى اتاپ ءوتىلدى.

مەملەكەت باسشىسىنىڭ العا قويعان مىندەتتەرىن جۇزەگە اسىرۋ مەملەكەتتىك ورگانداردىڭ، ءبىلىم بەرۋ مەكەمەلەرىنىڭ، بيزنەس پەن ازاماتتىق قوعامنىڭ بىرلەسىپ جۇمىس اتقارۋىن تالاپ ەتەتىنى ءسوز بولدى.

ۋنيۆەرسيتەت ستۋدەنتتەرى مەن وقىتۋشىلارى قوناقتارعا وزەكتى سۇراقتار قويۋعا مۇمكىندىك الدى. جاس مامانداردى جۇمىسقا ورنالاستىرۋ پەرسپەكتيۆالارى، تەحنيكالىق ماماندىقتارعا سۇرانىس، قۇرىلىس پەن ەنەرگەتيكا سالالارىن دامىتۋ، سونداي-اق ەلىمىزدىڭ الەۋمەتتىك ساياساتىنداعى الدا بولاتىن وزگەرىستەر جايىندا اڭگىمە ءوربىدى.

تورايعىروۆ ۋنيۆەرسيتەتىنىڭ ءتورتىنشى كۋرس ستۋدەنتى سايات ەرگەشباەۆ جولداۋدا جاستار ءۇشىن باستى ماسەلەلەر، سونىڭ ىشىندە ءبىلىم بەرۋ ساپاسىن، كاسىبي دامۋدى جانە ءوزىن-ءوزى جۇزەگە اسىرۋ مۇمكىندىكتەرىن كەڭەيتۋ قامتىلعانىن اتاپ ءوتتى.

«قازاقستان ءاليۋمينيى» اق ەڭبەك ۇجىمىنىڭ وكىلى، الەۋمەتتىك ماسەلەلەر جونىندەگى مەنەدجەر نۇرسۇلتان ەسەمباەۆ تا ءوز پىكىرىن ورتاعا سالدى. ول ونەركاسىپتى دامىتۋ، ءوندىرىستى جاڭعىرتۋ جانە حالىقتىڭ ءال-اۋقاتىن ارتتىرۋ ماسەلەلەرىنىڭ ماڭىزدىلىعىنا نازار اۋداردى.

– پرەزيدەنت «قۋاتتى قالالار قۋاتتى ايماقتاردىڭ، ال قۋاتتى ايماقتار كۇشتى مەملەكەتتىڭ نەگىزىن قالايدى» دەگەن بولاتىن. مەن ءۇشىن بۇل، ءبىرىنشى كەزەكتە – ينفراقۇرىلىمنىڭ دامۋى. ال جالپىحالىقتىق اۋقىمدى قۇرىلىس جىلىنىڭ جاريالانۋى – ينفراقۇرىلىمنىڭ دامىپ، بارشامىزدىڭ ياعني، قازاقستان ازاماتتارىنىڭ جالپى ءال-اۋقاتى دا كوتەرىلۋى ءتيىس ەكەنىن بىلدىرەدى، - دەدى ول.

الداعى ۋاقىتتا وندىرىستەردىڭ جاڭعىراتىنىنا «قازاقستان ەلەكتروليز زاۋىتى» اق جوندەۋ جانە سىناقتان وتكىزۋ ينجەنەرى ايگەرىم تەمىرباەۆا دا نازار اۋداردى.

– مەن وسى زاۋىتتا ءتورت جىلدان بەرى جۇمىس ىستەيمىن. اينالامىزداعى وڭ وزگەرىستەرگە ۇلەس قوسىپ، جۇمىسشىلاردىڭ كۇندەلىكتى قالاي جۇمىس ىستەيتىنىن كورىپ ءجۇرمىن. مەملەكەت باسشىسىنىڭ جولداۋىنداعى وتاندىق ونەركاسىپتى دامىتۋ، ءوندىرىستى جاڭعىرتۋ جانە زاماناۋي تەحنولوگيالاردى ەنگىزۋ جونىندەگى باستامالاردى ەرەكشە قولدايمىن. مەنىڭ ويىمشا، بۇل ەلدىڭ بولاشاعى ءۇشىن اسا ماڭىزدى باعىتتار، – دەدى ايگەرىم.

ەكىباستۇز بەن اقسۋدا دا وسىنداي كەزدەسۋلەر ءوتىپ، قۇرىلتاي دەپۋتاتتارى، قازاقستان حالىق كەڭەسى مۇشەلەرى جانە ورتالىق مەملەكەتتىك ورگانداردىڭ وكىلدەرى تۇرعىندارمەن جانە ەڭبەك ۇجىمدارىمەن جولداۋدىڭ نەگىزگى ەرەجەلەرىن جان-جاقتى تالقىلادى.

Abai.kz